ក្រុមមេធាវីទាមទារឲ្យចៅក្រមនាំខ្លួនលោកកឹម សុខា មកសួរចម្លើយនៅតុលាការក្រុងភ្នំពេញ
ចុងសប្ដាហ៍នេះ ក្រុមមេធាវីលោកកឹម សុខា ទាំង៨រូបនឹងជួបប្រជុំគ្នាដើម្បីសរសេរលិខិតស្នើសុំឲ្យចៅក្រមស៊ើបសួរនាំខ្លួនលោកកឹម សុខា មកសួរចម្លើយនៅតុលាការក្រុងភ្នំពេញ។ គម្រោងស្នើសុំនេះគឺបន្ទាប់ពីចៅក្រមស៊ើបសួរតុលាការក្រុងភ្នំពេញគ្រោងចុះទៅសួរចម្លើយលោកកឹម សុខា ដោយផ្ទាល់នៅក្នុងពន្ធនាគារត្រពាំងផ្លុងក្នុងខេត្តត្បូងឃ្មុំនៅថ្ងៃទី២៤ វិច្ឆិកាខាងមុខនេះ។ សម្រាប់ក្រុមមេធាវី ការចុះសួរចម្លើយក្នុងពន្ធនាគារនេះគឺខុសនឹងនីតិវិធីច្បាប់។ ប៉ុន្តែអ្នកនាំពាក្យតុលាការក្រុងភ្នំពេញអះអាងថា គេអាចធ្វើទៅបាន។
ចុះផ្សាយនៅថ្ងៃ៖
ស្តាប់ - ០២:១៩
មានមូលហេតុសំខាន់ពីរដែលក្រុមមេធាវីគណបក្សប្រឆាំងចង់ឲ្យនាំខ្លួនលោកកឹម សុខា មកសួរចម្លើយនៅក្នុងតុលាការក្រុងភ្នំពេញ។ ទីមួយ គឺវាជាការគោរពសិទ្ធិជនសង្ស័យដែលការពារដោយរដ្ឋធម្មនុញ្ញ ហើយស្របតាមក្រមនីតិវិធីព្រហ្មទណ្ឌដែលជាការផ្តល់យុត្តិធម៌ដល់លោកកឹម សុខា។ ទីពីរ ប្រសិនបើលោកកឹម សុខា ត្រូវបានសួរចម្លើយនៅក្នុងតុលាការក្រុងភ្នំពេញ នោះលោកនឹងមានអារម្មណ៍ថាមានសុវត្ថិភាព និងសន្តិសុខជាងនៅក្នុងពន្ធនាគារ។ នេះបើតាមការអះអាងរបស់លោកសំ សុគង់ សហមេធាវីម្នាក់របស់លោកកឹម សុខា។ លោកសំ សុគង់ ដែលបានទៅជួបលោកកឹម សុខា នៅថ្ងៃសុក្រនេះ ដើម្បីប្រាប់ពីការគ្រោងចុះទៅសួរចម្លើយលោកដោយផ្ទាល់ពីសំណាក់ចៅក្រមស៊ើបសួរលោកគី ឬទ្ធី។
លោក គី ឬទ្ធី ចៅក្រមស៊ើបសួរសាលាដំបូងរាជធានីភ្នំពេញគ្រោងនឹងចុះទៅសួរចម្លើយលោកកឹម សុខានៅក្នុងពន្ធនាគារត្រពាំងផ្លុងតែម្តងនៅថ្ងៃទី២៤ វិច្ឆិកា។ ជាដំណើរទៅសួរចម្លើយដែលលោកមេធាវីសំ សុគង់ថា មិនដែលបានជួបទេក្នុងអាជីពជាមេធាវីរបស់លោកជិត១៥ឆ្នាំមកនេះ។ បើតាមលោកសំ សុគង់ ការសួរចម្លើយក្នុងពន្ធនាគារបែបនេះ គឺគ្មានការចំណេញសោះឡើយដល់កូនក្តីរបស់លោក ដោយហេតុថា វាខុសនឹងក្រមនីតិវិធីព្រហ្មទណ្ឌ និងធ្វើឲ្យលោកកឹម សុខាមិនមានអារម្មណ៍សុវត្ថិភាពក្នុងការឆ្លើយដោះបន្ទុក។ មួយវិញទៀត សិទ្ធិមេធាវីការពារក្តីក៏ត្រូវបានកាត់បន្ថយផងដែរ។ ដូច្នេះហើយទើបក្រុមមេធាវីចង់ឲ្យសួរចម្លើយនៅតុលាការក្រុងភ្នំពេញវិញ។
ប៉ុន្តែលោកលី សុផាណា អ្នកនាំពាក្យសាលាដំបូងរាជធានីភ្នំពេញ បានបញ្ជាក់ប្រាប់វិទ្យុបារាំងអន្តរជាតិថា លោកគី ឬទ្ធីអាចចុះទៅសួរចម្លើយលោកកឹម សុខា ដល់ពន្ធនគារបាន។ បើតាមលោកលី សុផាណា ចៅក្រមស៊ើបសួរអាចចុះទៅដល់ទីកន្លែងនិងប្រើប្រាស់នូវវិធានការស្រាវជ្រាវនានាដែលកំណត់ដោយក្រមនីតិវិធីព្រហ្មទណ្ឌក្នុងក្របខណ្ឌនៃការស៊ើបសួរទៅលើជនត្រូវចោទនិងបុគ្គលដែលពាក់ព័ន្ធ។
ជាការកត់សម្គាល់ មុននឹងចូលដល់ដំណាក់កាលសាកសួររបស់ចៅក្រមស៊ើបសួរនេះ ក្រុមព្រះរាជអាជ្ញាតុលាការក្រុងភ្នំពេញចំនួន៣នាក់បានចុះទៅសួរចម្លើយលោកកឹម សុខា ដល់ពន្ធនាគារម្តងរួចហើយៗបានសម្រេចចោទប្រកាន់លោក កឹម សុខា ជាផ្លូវការពីបទឃុបឃិតជាមួយបរទេសក្បត់ជាតិខ្លួនឯង។ សម្រាប់លោកមេធាវីសំ សុគង់ នីតិវិធីបែបនេះ វាជារឿងចម្លែកដែលលោកពុំធ្លាប់បានឃើញទេ។ តែទោះជាយ៉ាងណាក៏ដោយចុះ លោកអះអាងថា ក្រុមមេធាវីទាំង៨រូបនឹងចូលរួមក្នុងកិច្ចសួរចម្លើយលោកកឹម សុខា ប្រសិនបើការទាមទាររបស់ខ្លួនមិនទទួលបានលទ្ធផលទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ