លោក ខឹម វាសនា ស្នើឲ្យ គ.ជ.ប កំណត់យកសញ្ញាធិក តែមួយគត់សម្រាប់គូសលើសន្លឹកឆ្នោត
ក្នុងលិខិតផ្ញើ ទៅប្រធានគណៈកម្មាធិការជាតិរៀបចំការបោះឆ្នោត គ.ជ.ប កាលពីថ្ងៃទី១១ ខែកក្កដា លោក ខឹម វាសនា បានស្នើឲ្យស្ថាប័នរៀបចំការបោះឆ្នោតមួយនេះ ធ្វើវិសោធកម្ម កំណត់យកសញ្ញាធិក(√) តែមួយប៉ុណ្ណោះ សម្រាប់គូសក្នុងប្រអប់បួនជ្រុងទ្រវែងតូចនៃគណបក្សនយោបាយណាមួយ ដែលអ្នកបោះឆ្នោតពេញចិត្ត។
ចុះផ្សាយនៅថ្ងៃ៖
លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ (LDP) តាមរយៈលិខិតផ្ញើទៅកាន់ លោក ស៊ិក ប៊ុនហុក ប្រធាន គ.ជ.ប បានបញ្ជាក់ថា ការអនុញ្ញាតឲ្យអ្នកបោះឆ្នោតអាចគូសសញ្ញាគាំទ្រគណបក្សនយោបាយក្នុងចំណោមគំនូសសញ្ញាដ៏ច្រើនប្រភេទ គឺជាការសម្រេចចិត្ត ដែលខ្វះសុក្រិតភាព ព្រោះបង្កឲ្យមានការទិញលក់សន្លឹកឆ្នោត និងគំរាមកំហែងអ្នកបោះឆ្នោតជាដើម។
បើតាមលោក ខឹម វាសនា ភាពមិនច្បាស់លាស់នៃការកំណត់គំនូសសញ្ញាគាំទ្រគណបក្សនយោបាយលើសន្លឹកឆ្នោត នឹងនាំឲ្យមានវិវាទក្នុងការបកស្រាយ និងអនុវត្ត ចាប់តាំងពីដំណាក់កាលគណៈកម្មការការិយាល័យរាប់សន្លឹកឆ្នោត រហូតដល់ក្រុមប្រឹក្សាធម្មនុញ្ញទៀតផង។
លោក ចិន ថុន អគ្គលេខាធិការគណបក្សសម្ព័ន្ធដើម្បីប្រជាធិបតេយ្យបានឲ្យដឹងថាជុំវិញបញ្ហានៃកំណត់សញ្ញាគាំទ្រនេះ ត្រូវបានគណបក្សយកទៅប្រាប់ស្ថានទូតជប៉ុន អាមេរិក អូស្រ្តាលី និងបារាំងជាដើម ដើម្បីឲ្យស្ថានទូតទាំងនោះ ដឹងពីភាពមិនប្រក្រតីមួយនេះ។ បើតាម លោក ចិន ថុន គណបក្សក៏គ្រោងធ្វើសន្និសីទកាសែតដែរ ប្រសិនបើ គ.ជ.ប មិនព្រមដោះស្រាយបញ្ហានេះ។
លោក ហង្ស ពុទ្ធា អ្នកនាំពាក្យ គ.ជ.ប បានបញ្ជាក់ថា គ.ជ.ប លើកទឹកចិត្តឲ្យអ្នកបោះឆ្នោតគូសសញ្ញាធិក(√) ប៉ុន្តែកន្លងមកធ្លាប់មានប្រជាពលរដ្ឋមួយចំនួនមិនអាចគូសសញ្ញាធិក(√) ទើប គ.ជ.ប កាលពីអាណត្តិមុន ទទួលស្គាល់ថាគំនូសសញ្ញាណាក៏ដោយ ដែលមិនបង្ហាញពីអត្តសញ្ញាណរបស់អ្នកបោះឆ្នោត គឺអាចយកជាការបាន។ អ្នកនាំពាក្យរូបនេះ បន្ថែមថា ការប្រើគំនូសសញ្ញាច្រើនប្រភេទ ដើម្បីគូសបង្ហាញការគាំទ្រចំពោះគណបក្សនយោបាយណាមួយ ត្រូវបានប្រើប្រាស់ជាយូរមកហើយ មិនមែនមាននៅពេលនេះទេ។
ជុំវិញការស្នើឲ្យធ្វើវិសោធនកម្មកំណត់ឲ្យបានច្បាស់លាស់ពីការប្រើគំនូសសញ្ញាគាំទ្រលើសន្លឹកឆ្នោត លោកហង្ស ពុទ្ធា អ្នកនាំពាក្យ គ.ជ.ប សង្កត់ធ្ងន់ថា ការធ្វើវិសោធនកម្មច្បាប់ គឺមិនមែនជាតួនាទីរបស់ គ.ជ.ប នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ