លីកាដូថា ច្បាប់ស្ដីពីទូរគមនាគមន៍ជាផ្នែកមួយគម្រាមដល់សេរីភាពនៅក្នុងការបញ្ចេញមតិ
អង្គការលីកាដូនៅថ្ងៃនេះ បានចេញផ្សាយរបាយការណ៍មួយ កម្រាសប្រាំទំព័រ ក្រោមចំណងជើងថា ច្បាប់ថ្មីស្ដីពី«ទូរគមនាគមន៍ប៉ះពាល់ដល់សិទ្ធិ និងសេរីភាពបុគ្គល»។ លីកាដូចាត់ទុកច្បាប់នេះជាផ្នែកមួយនៃ ការគម្រាមកំហែងដល់សេរីភាពក្នុងការបញ្ចេញមតិជាសាធារណៈលើប្រព័ន្ធអ៊ិនធើណេត និងទំនាក់ទំនងឯកជន។
ចុះផ្សាយនៅថ្ងៃ៖
ស្តាប់ - ០២:០០
អង្គការលីកាដូបានធ្វើការ វិភាគទៅលើមាត្រាជាច្រើននៃច្បាប់ស្ដីពីទូរគមនាគមន៍នេះដោយពិនិត្យឃើញថា មានការរឹតត្បឹតយ៉ាងខ្លាំង ហើយវាបានផ្ដល់សិទ្ធិឲ្យអាជ្ញាធរជ្រៀតជ្រែកចូលទៅក្នុងជីវិតឯកជនរបស់បុគ្គលម្នាក់ៗ។ វិធានការដ៏លើសលុបរបស់ច្បាប់នេះជាពិសេសមាត្រាដែលចែងពីបទល្មើសព្រហ្មទណ្ឌថ្មីៗបង្ហាញនូវគោលបំណងពិតរបស់ច្បាប់នេះ ដើម្បីបំភិតបំភ័យបុគ្គលម្នាក់ៗ ដោយដាក់ទណ្ឌកម្មដល់ការអនុវត្តសិទ្ធិ និងសេរីភាពជាមូលដ្ឋាននិងកាត់បន្ថយឬក្រុមជំទាស់។
លីកាដូ ជឿថា ពីពេលនេះរហូតដល់ការបោះឆ្នោតឃុំ-សង្កាត់ឆ្នាំ២០១៧ និងការបោះឆ្នោតថ្នាក់ជាតិឆ្នាំ២០១៨ ហាក់ដូចជារដ្ឋាភិបាលបានរៀបចំមធ្យោបាយថ្មីមួយដែលជាការទប់ស្កាត់ និងរារាំងសង្គមស៊ីវិល។ ច្បាប់ស្ដីពីទូរគមនាគមន៍ បានផ្ដល់សិទ្ធិអំណាចដល់អាជ្ញាធររដ្ឋដោយសម្ងាត់ក្នុងការចូលរួមស្ដាប់គ្រប់ប្រព័ន្ធទូរគមនាគមន៍ និងដាក់ទណ្ឌកម្មចំពោះការប្រើប្រាស់ប្រព័ន្ធទូរគមនាគមន៍អេឡិចត្រូនិចរវាងបុគ្គលនិងបុគ្គល ដែលផ្ដល់ផលវិជ្ជមានយ៉ាងខ្លាំងដល់សេរីភាពនៃការបញ្ចេញមតិ។ ច្បាប់នេះក៏អនុញ្ញាតឲ្យព្រះរាជអាជ្ញាអាចបញ្ជាឲ្យបំផ្លាញភស្ដុតាងដែល ហាមឃាត់ឬមានគ្រោះថ្នាក់មុនពេលមានការជំនុំជម្រះ។
លោកស្រី ណាលី ពីឡូក នាយិកាអង្គការលីកាដូបានទាញយកករណីច្បាប់នេះជាមួយនឹងការផ្ដន្ទាទោស និងការដាក់ពន្ធនាគារមិនត្រឹមត្រូវទៅលើនិស្សិតឈ្មោះ គង់ រ៉ៃយ៉ា ដោយសារការបង្ហោះសារនៅលើគេហទំព័រហ្វេសប៊ុកនោះ។ ទង្វើនេះលោកស្រីនាយិកាចាត់ទុកថា ជាការបង្ហាញថា អាជ្ញាធរមានឆន្ទៈរួចស្រេចក្នុងការដាក់ទណ្ឌកម្មទៅលើការបញ្ចេញមតិលើប្រព័ន្ធអ៊ិនធើណេត។
នៅផ្នែកចុងក្រោយនៃរបាយការណ៍របស់ខ្លួនលីកាដូ បានបន្ទោសទៅលើគ្រប់តំណាក់កាលតាំងពីការធ្វើសេចក្ដីព្រាងរហូតដល់ការអនុម័ត គឺពោពេញដោយកង្វះខាតតម្លាភាព និងការពិភាក្សាដ៏មានអត្ថន័យ។ ហើយច្បាប់នេះឥលូវក្លាយជាឧបករណ៍ផ្នែកច្បាប់របស់អាជ្ញាធររដ្ឋ ជាមួយនឹងច្បាប់ស្ដីពីសមាគមន៍និងអង្គការមិនមែនរដ្ឋាភិបាល។ សូមបញ្ជាក់ថា ច្បាប់ស្ដីពីទូរគមនាគមន៍អនុម័តកាលពីចុងខែធ្នូឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ