៥ខែក្នុងឆ្នាំ២០១៨៖ រន្ទះបាញ់សម្លាប់មនុស្ស៥១នាក់
យ៉ាងហោចណាស់មានមនុស្ស៥១នាក់បានស្លាប់ និងរបួសជាង៣០នាក់ ដោយសារហេតុការណ៍រន្ទះបាញ់។ ចំនួននេះគិតត្រឹមរយៈពេល៥ខែដើមឆ្នាំ២០១៨នេះ ក្នុងនោះរួមទាំង មនុស្ស៥នាក់ ដែលបានស្លាប់ កាលពីថ្ងៃម្សិលមិញ ដោយរន្ទះបាញ់ នៅស្រុកថ្មបាំង ខេត្តកោះកុង។ នេះបើតាម គណៈកម្មាធិការជាតិគ្រប់គ្រងគ្រោះមហន្តរាយ។
ចុះផ្សាយនៅថ្ងៃ៖
ស្តាប់ - ០២:០១
លោក កែវ វី អ្នកនាំពាក្យ គណៈកម្មាធិការជាតិគ្រប់គ្រងគ្រោះមហន្តរាយបានថ្លែងប្រាប់វិទ្យុបារាំងអន្តរជាតិនៅថ្ងៃសុក្រនេះថា មនុស្សស្លាប់ ដោយសារហេតុការណ៍រន្ទះបាញ់នៅឆ្នាំ២០១៨នេះ មានចំនួន៥១នាក់ និងរបួសជាង៣០នាក់។ ចំនួននេះ មានការកើនឡើងជាងឆ្នាំ២០១៧ ដែលមានមនុស្សស្លាប់៤១នាក់។ នេះបើគិតត្រឹមរយៈពេល៥ខែដូចគ្នា។ ហេតុការណ៍រន្ទះបាញ់ក្នុងឆ្នាំនេះ ត្រូវបានកត់សម្គាល់ថា មានការកើនឡើងនិងមានមនុស្សស្លាប់ច្រើន ក្នុងពេលតែមួយរហូតដល់៥នាក់ នៅក្នុងស្រុកថ្មបាំង ខេត្តកោះកុង។
មុនកើតមានករណីមនុស្សស្លាប់៥នាក់ ក្នុងពេលតែមួយ កន្លែងតែមួយ ដោយសាររន្ទះ កោះកុងនេះ គេនៅចាំបានថា កាលពីថ្ងៃទី១៤ឧសភា ពីខេត្តឧត្តរមានជ័យឯណោះវិញ ក៏មានករណីមនុស្ស២នាក់ស្លាប់និង៣នាក់របួស ដោយសាររន្ទះដែរ។ មូលហេតុនៃគ្រោះថ្នាក់នេះ កើតឡើងដោយសារ ជនរងគ្រោះទៅភ្ជួរស្រែ ហើយពេលមានភ្លៀងធ្លាក់ក៏នាំគ្នាទៅជ្រកក្រោមដើមឈើ ក៏ត្រូវរន្ទះបាញ់តែម្តង។
ចំណុចនេះលោក កែវ វី ទទួលស្គាល់ថា ប្រជាពលរដ្ឋភាគច្រើនធ្វើការនៅកណ្ដាលវាលស្រែ ឬនៅលើផ្ទៃទឹកក្រោមហេតុផលបញ្ចប់ការងារ ដោយមិនសូវគិតពីសុវត្ថិភាពផ្ទាល់ខ្លួន។ រន្ទះបាញ់ជាហេតុការណ៍មួយមិនអាចបញ្ជៀសបាន តែពលរដ្ឋត្រូវមានការប្រុងប្រយ័ត្នដោយខ្លួនឯង នៅពេលមេឃរកភ្លៀង គួរស្វែងកន្លែងមានសុវត្ថិភាព ឬចូលទៅក្នុងផ្ទះដែលជាទីកន្លែងមានសុវត្ថិភាពបំផុត។ ម្យ៉ាងទៀត ពលរដ្ឋត្រូវធ្វើតាមការណែនាំរបស់ស្ថាប័នជំនាញនាពេលកន្លងមកដោយរួមមាន ផ្អាកប្រើទូរស័ព្ទ បិទទូរទស្សន៍ ជៀសវាងកាន់របស់ដែលមានជាតិដែកនៅក្នុងដៃ។ នេះបើតាមលោក កែវ វី ។
ពាក់ព័ន្ធករណីគ្រោះធម្មជាតិបង្កឡើងដោយបាតុភូតខ្យល់កន្ត្រាក់វិញ ៥ខែក្នុងឆ្នាំ២០១៨នេះ បាតុភូតខ្យល់កន្ត្រាក់ កើតឡើង៨៦លើក នៅក្នុងរាជធានីខេត្ត២៤លើកលែងតែខេត្តកែបនិងរលំផ្ទះសម្បែងក្នុងរូបភាពធ្ងន់ធ្ងរជាង៣០០កន្លែង បណ្តាលឲ្យ មនុស្សស្លាប់២នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ