លោក ផៃ ស៊ីផាន៖ ផែនទីចំនួន១៨ផ្ទាំងនឹងមកដល់ល្ងាចនេះឬយ៉ាងយូរថ្ងៃស្អែក
ផែនទីចំនួន១៨ផ្ទាំងនឹងមកដល់កម្ពុជានៅល្ងាចថ្ងៃអាទិត្យនេះឬក៏យ៉ាងយូរត្រឹមថ្ងៃស្អែកព្រោះថាផែនទីនេះត្រូវបានបញ្ចូនមកហើយតាមជើងហោះហើរពីទីក្រុង New York សហរដ្ឋអាមេរិកឆ្ពោះមកកម្ពុជាតែម្ដង។ ផែនទីទាំងនេះត្រូវបានប្រទេសកម្ពុជាដាក់ប្តឹងទៅអង្គការសហប្រជាជាតិពីការ ទំលាក់គ្រាប់បែកលើប្រទេសរបស់ខ្លួននៅក្នុងអំឡុងសម័យសង្គមរាស្ត្រនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២២
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីបានឲ្យវិទ្យុបារាំងដឹងនៅថ្ងៃអាទិត្យ ទី២៦កក្ដដា ថា ផែនទីចំនួន១៨ផ្ទាំងត្រូវបានគេបញ្ចេញមកហើយនិងបានបញ្ចូនបន្តមកកម្ពុជាតាំងពីសៅរ៍ម្សិលមិញវេលាម៉ោង២ ម៉ោងនៅកម្ពុជា ។ ដូច្នេះគណនាតាមម៉ោងពេលលោក ផៃ ស៊ីផាន បានសន្មតទុកថា ផែនទីអាចមកដល់នៅល្ងាចនេះឬក៏យ៉ាងយូរត្រឹមថ្ងៃស្អែក ព្រោះផែនទីនេះធ្វើដំណើរតាមជើងហោះហើរពីទីក្រុង New york ឆ្ពោះមកកម្ពុជាតែម្ដងដោយចំណាយពេលជាង២០ម៉ោង។
យ៉ាងណាក៏ដោយ លោក វ៉ា គឹមហុង ប្រធានគណៈកម្មាធិការកិច្ចការព្រំដែននិងអ្នកនាំពាក្យក្រសួងការបរទេសកម្ពុជាសុទ្ធតែអះអាងថានៅមិនទទួលបានដំណឹងនៃការមកដល់របស់ផែនទីចំនួន១៨ផ្ទាំងនេះទេ។
កន្លងមក លោក ហ៊ុន សែន ថាទោះបីជាមានឬគ្មានផែនទី ដែលត្រូវបានយកទៅតម្កល់នៅអង្គការសហប្រជាជាតិយ៉ាងណាក្តី ក៏ប៉ុន្តែការវិវត្តចុងក្រោយគឺផែនទីដទៃផ្សេងទៀតដែលមានចំនួន១៨ ផ្ទាំង ជាផែនទីដែលកម្ពុជាបានប្តឹងពាក់ព័ន្ធទៅនឹងការដែលគេទំលាក់ គ្រាប់បែកលើទឹកដីកម្ពុជា ដែលនឹងទទួលបាននៅពេលខាងមុខ។
សូមបញ្ជាក់ថា បញ្ហាព្រំដែនដែលបានផ្ទុះឡើងនៅច្រើនចំណុចជាមួយវៀតណាម ត្រូវបានប្រមុខរដ្ឋាភិបាលកម្ពុជាសរសេរលិខិតស្នើសុំកិច្ចសហការពី អង្គការសហប្រជាជាតិ និងប្រទេសមហាអំណាចចំនួនបីគឺអាមេរិក បារាំង និងអង់គ្លេស ដើម្បីសុំខ្ចីផែនទីបោនរបស់កម្ពុជាខ្នាត ១លើ១រយពាន់។ ក៏ប៉ុន្តែរហូតមកទល់ពេលនេះនៅមិនទាន់ឃើញមានឆ្លើយតប ពីខាងណាមួយនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ