អាមេរិកនិងបារាំងនឹងប្រគល់ផែនទីមកកម្ពុជា
បារាំង និង អាមេរិក នឹងឲ្យផែនទីមកកម្ពុជាតាមការស្នើសុំរបស់រដ្ឋាភិបាល។ ការសន្យានេះត្រូវធ្វើឡើងនៅក្នុងជំនួបជំរាបលា រវាងប្រមុខកាទូតកម្ពុជាលោក ហោ ណាំហុង និង ឯកអគ្គរដ្ឋទូតអាមេរិកចប់អាណត្តិ លោក វិល្លៀម អ៊ីថូត នៅព្រឹកថ្ងៃទី១៣សីហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
សហរដ្ឋអាមេរិកសុំពេលពិនិត្យឲ្យបានច្បាស់លាស់សិនមុននឹងប្រគល់ផែនទីមកកម្ពុជាជៀសវាងការភ័ន្ដច្រឡំ។ ប្រទេសបារាំងក៏បានឯកភាព ក្នុងការផ្ដល់ផែនទីមកកម្ពុជាដែរ។ នេះបើតាមការបញ្ជាក់របស់ លោក ជុំ សន្ទរី អ្នកនាំពាក្យក្រសួងការបរទេសកម្ពុជា។ ទោះជាមានការធានាអះអាងបែបនេះក៏ដោយតែថ្ងៃមកដល់របស់ផែនទី អ្នកនាំពាក្យរូបនេះនៅមិនទាន់បានដឹងនៅឡើយទេ។
លោក ជុំ សន្ទរី បន្តថា អាមេរិកកំពុងយកចិត្តទុកដាក់ក្នុងការស្វែងរកផែនទីមកឲ្យកម្ពុជា ព្រោះថាផែនទីមានច្រើនប្រភេទ។ កន្លងមករដ្ឋាភិបាលកម្ពុជាបានស្នើសុំផែនទីពី បារាំង សហរដ្ឋអាមេរិក និង អង់គ្លេស។
តាមការឲ្យដឹងរបស់លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី ឲ្យដឹងថា ផែនទីដែលរដ្ឋាភិបាលស្នើយកមកផ្ទៀងផ្ទាត់នេះជា ផែនទីបោនខ្នាត ១/១០០.០០០ធ្វើនៅចន្លោះឆ្នាំ១៩៣៣-១៩៥៣ ហើយដែលត្រូវបានទទួលស្គាល់ជាអន្តរជាតិនៅចន្លោះ ឆ្នាំ ១៩៦៣-១៩៦៩ ។ជាប្រភេទផែនទីតែមួយដូចគ្នាដែរ បើតាមលោកនាយករដ្ឋមន្រ្តី ហ៊ុន សែន អង្គការសហប្រជាជាតិនឹងប្រគល់មកឲ្យកម្ពុជានៅថ្ងៃទី១៨សីហា។ ប្រភេទ ផែនទីបោននេះ ស្ថិតនៅក្នុងមាត្រា២នៃរដ្ឋធម្មនុញ្ញដែលកំពុងតែមានភាពចម្រូងចម្រាស។
ដោយឡែកចំពោះជំនួបនៅព្រឹកមិញនេះដែរក្រៅពីប្រធានបទផែនទី របៀបវារៈច្បាប់ស្ដីពីសមាគមនិងអង្គការក្រៅរដ្ឋាភិបាលក៏បានលើកឡើងផងដែរ។ លោក ហោ ណាំហុង បានប្រាប់ទៅលោក វិល្លៀម អ៊ីថូត ថា មានតែក្រុមអង្គការតែ១០ស្ថាប័នទៀតប៉ុណ្ណោះនៅបន្តប្រឆាំងជាមួយនឹងច្បាប់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ