មេខ្លោងដែលបង្ខំឲ្យក្មេងៗដើរសុំទាន ត្រូវបានព្រះរាជអាជ្ញារងចោទប្រកាន់
កាលពីថ្ងៃម្សិលមិញ តុលាការក្រុង បានបើកការស៊ើបសួរ ដោយចោទប្រកាន់លើមេខ្លោង ដែលបង្ខំឲ្យក្មេងៗដើរសុំទានឈ្មោះ ភួង ចន្នី ទាក់ទងនឹងការជួញដូរមនុស្ស។ ការបើកការស៊ើបសួរនេះធ្វើឡើង ក្រោយពី ជនសង្ស័យខាងលើ ត្រូវបានសមត្ថកិច្ចឃាត់ខ្លួន កាលពីថ្ងៃទី៣០ មិថុនា កន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
អត្ថបទដោយ សឿង ភារៈ និងហេង ពុធីរៈ
អ្នកនាំពាក្យសាលាដំបូងរាជធានីភ្នំពេញ លោក លី សុផាណា បានប្រាប់អ្នកសារព័ត៌មាន កាលពីថ្ងៃទី៤ ខែកក្កដាថា ព្រះរាជអាជ្ញារងបានបើកការស៊ើបសួរ ដោយចោទប្រកាន់លើឈ្មោះ ភួង ចន្នី អាយុ ៥០ឆ្នាំ ពីបទ ការជ្រើសរើស ដោយមិនស្របច្បាប់សម្រាប់កេងប្រវ័ញ្ច តាមមាត្រា១២ ច្បាប់ស្តីពីការទប់ស្កាត់ការជួញដូរមនុស្ស ហើយបញ្ជូនទៅចៅក្រមស៊ើបសួរ ដើម្បីចាត់ការបន្តតាមនីតិវិធី។
ស្ត្រីខាងលើ រួមជាមួយស្ត្រីវ័យចំណាស់ម្នាក់ទៀត ត្រូវបានកម្លាំងកងរាជអាវុធហត្ថរាធានីភ្នំពេញ សហការជាមួយ ភាគីពាក់ព័ន្ធ ចាប់បានកាលពីយប់ថ្ងៃទី៣០ ខែមិថុនា នៅចំណុចមុខសណ្ឋាគារកាហ្សា ផ្លូវ៤៧ សង្កាត់វត្តភ្នំ ខណ្ឌដូនពេញ ខណៈដែលពួកគេបានបង្ខំឲ្យក្មេងៗដើរសុំទាន។ នេះបើតាមទំព័រហ្វេសប៊ុករបស់កងរាជអាវុធហត្ថរាជធានីភ្នំពេញ។
ក្នុងប្រតិបត្តិការនោះ សមត្ថកិច្ចក៏បានរំដោះកុមាររងគ្រោះ០៧នាក់ ក្នុងនោះមានទារក០២នាក់។ ទំព័រហ្វេសប៊ុករបស់កងរាជអាវុធហត្ថរាជធានីភ្នំពេញ បានឲ្យដឹងទៀតថា ក្រោយពេលឃាត់ខ្លួន ស្ត្រីជាមេខ្លោងខាងលើ បានសារភាពថា រូបគេពិតជាបានប្រមូលក្មេងៗ ពីឳពុកម្តាយក្រីក្រ និងអ្នកសុំទានផ្សេងទៀត ឲ្យមកនៅជាមួយក្នុងនាមជាកូនចៅ ឬក្មួយ ដើម្បីឲ្យដើរសុំទាន ពិតប្រាកដមែន ហើយរូបគេធ្វើបែបនេះ ប្រហែល៧ទៅ៨ឆ្នាំមកហើយ។
លោកស្រី ជូ ប៊ុនអេង អនុប្រធានអចិន្ត្រៃយ៍របស់គណៈកម្មាធិការជាតិប្រយុទ្ធប្រឆាំងការជួញដូរមនុស្សកម្ពុជា បានប្រាប់វិទ្យុបារាំងRFI នាព្រឹកថ្ងៃទី៥កក្កដាថា ការដែលប្រើប្រាស់កុមារឲ្យទៅធ្វើបែបនេះគឺមិនត្រឹមតែកេងប្រវ័ញ្ចពលកម្មកុមារនោះទេ តែវាពាក់ព័ន្ធទៅ នឹងសិទ្ធិកុមារ ដែលមិនបានឲ្យកុមារទៅសិក្សារៀនសូត្រ។ ករណីនេះមិនមែនជាលើកទី១ទេ ដែលសមត្ថកិច្ចចុះទៅបង្ក្រាប វាមានច្រើនលើករួចមកហើយ។ នេះបើតាមលោកស្រី ជូ ប៊ុនអេង។
លោកស៊ឹង សែនករុណា មន្ត្រីស៊ើបអង្កេតជាន់ខ្ពស់ផ្នែកសិទ្ធិមនុស្សនៃសមាគមអាដហុក បានបញ្ជាក់ប្រាប់វិទ្យុបារាំងថា ការចាត់វិធានការទៅលើមេខ្លោងនេះ គឺជារឿងដដែលៗ ព្រោះកន្លងមកអាជ្ញាធរធ្លាប់ចាត់ការលើរឿងកុមារសុំទាននៅតាមផ្លូវនេះជាច្រើនដងមកហើយ តែបញ្ហានេះនៅតែបន្តកើតមានដដែល។
ជាដំណោះស្រាយដ៏ល្អ លោកស៊ឹង សែនករុណាបន្ថែមថា ការដាក់ទោសលើមេខ្លោងជារឿងមួយ ប៉ុន្តែអាជ្ញាធរគួរតែមានវិធានការស្រោចស្រង់ល្អជាងនេះ ជាជាងការដាក់ទណ្ឌកម្ម ឬទោសទណ្ឌលើអ្នកទាំងនោះ។ បើតាមមន្ត្រីសិទ្ធិមនុស្សរូបនេះ ការបង្កើតមណ្ឌលមួយ ដែលផ្គត់ផ្គង់ការរៀនសូត្រ និងជីវភាព គឺជាវិធានការមួយជួយកុមារសុំទានតាមភ្លើងស្តុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ