កម្ពុជានាំចូលឱសថពីបរទេសប្រមាណជា ១០០លានដុល្លារក្នុងមួយឆ្នាំៗ
ការនាំចូលឱសថពីបរទេសចូលមកស្រុកខ្មែរ មានការកើនឡើងប្រមាណជា១០% ក្នុងមួយឆ្នាំៗ។ នេះបើតាមមន្ត្រីជាន់ខ្ពស់របស់ក្រុមហ៊ុន សាណូហ្វីកម្ពុជា ដែលបានថ្លែងប្រាប់កាសែតក្នុងស្រុកកាលពីពេលថ្មីនេះ។ ក្នុងមួយឆ្នាំៗកម្ពុជា ក៏ត្រូវចំណាយទឹកប្រាក់អស់ប្រមាណ ១០០ លានដុល្លារផងដែរ ដើម្បីនាំចូលឱសថ មកពីបណ្តាប្រទេសមួយចំនួនមានដូចជា បារាំង ឥណ្ឌា ថៃ ចិន ឥណ្ឌូនេស៊ី ហើយនិងបណ្តាប្រទេសដទៃផ្សេងទៀត។
ចុះផ្សាយនៅថ្ងៃ៖
ស្តាប់ - ០១:៤៣
ការនាំចូលឱសថពីបរទេសមានការកើនឡើងនៅពេលនេះ គឺមិនមែនមកពីសុខភាពប្រជាពលរដ្ឋមិនល្អនោះទេ ប៉ុន្តែមកពីកំណើនប្រជាជនកើនឡើងខ្លាំង។ នេះបើតាមមន្ត្រីជំនាញ។ រហូតមកទល់នឹងពេលនេះ កម្ពុជាមានសហគ្រាសផលិតឱសថនៅក្នុងស្រុកប្រមាណ ១៣ ក្រុមហ៊ុន ហើយក្រុមហ៊ុនអស់ទាំងនេះក៏បានកំពុងតែផ្គត់ផ្គង់ទាំងទីផ្សារនៅក្នុងស្រុក និងក្រៅស្រុកផងដែរ។ ក្រៅពីនេះ ក្រសួងសុខាភិបាលកម្ពុជាក៏បានលើកទឹកចិត្ត និងជំរុញឲ្យមានវិនិយោគិនមកបណ្តាក់ទុនខាងផ្នែកផលិតផលថ្នាំពេទ្យ នៅក្នុងក្រសួងសុខាភិបាល។
លោកហៃ លីអ៊ាង ប្រធានក្រុមហ៊ុនផលិតឱសថ PPM បានឲ្យដឹងថា បច្ចុប្បន្ននេះ ឱសថដែលក្រុមហ៊ុនរបស់លោកផលិតបាន លក់នៅក្នុងស្រុកបានចំនួន ៤៥% និងនាំចេញទៅកាន់បរទេសបានរហូតដល់៥៥%។ ហើយបណ្តាប្រទេសដែលអស់ទាំងនោះមាន១៤ ប្រទេសជាច្រើននៅក្នុងតំបន់អាហ្វ្រិក ដែលនិយាយភាសាបារាំង និង៦ប្រទេសទៀត ដែលស្ថិតនៅក្បែរៗនោះដែរ។
ទាក់ទងនឹងទីផ្សារឱសថនៅកម្ពុជានេះដែរ មន្ត្រីជំនាញដែលធ្វើការងារខាងផ្នែកត្រួតពិនិត្យផលិតផលក្លែងក្លាយនៅកម្ពុជាបានបញ្ជាក់ថា ចំនួនឱសថក្លែងក្លាយគឺមានចំនួនច្រើន ដោយយោងទៅលើការសិក្សាស្រាវជ្រាវក្នុងជំហានដំបូងរបស់ក្រុមមន្ត្រីជំនាញ និងអង្គការដែលធ្វើការងារពាក់ព័ន្ធខាងផ្នែកនេះ។ ហើយចំពោះការគ្រប់គ្រងពីចំនួននាំចូលវិញ ក៏នៅមិនទាន់មានភាពត្រឹមត្រូវនិងច្បាស់លាស់ ហើយក៏គ្មានតួរលេខពិតប្រាកដណាមួយដែរ។
បើនិយាយពីថ្នាំពេទ្យដែលត្រូវបាននាំចូលមកលក់នៅកម្ពុជាវិញ គឺមានការប្រកួតប្រជែងគ្នាខ្លាំងណាស់ខាងផ្នែកតម្លៃ។ ឧទាហរណ៍ថ្នាំប៉ារ៉ាមួយមុខ គឺមកពីបណ្តាក្រុមហ៊ុនផលិតជាច្រើន ហើយក៏មកពីប្រទេសផ្សេងៗគ្នាដែរ។ ថ្នាំខ្លះត្រូវបានផលិតឡើងដោយលួចចម្លងរូបមន្តគេទាំងស្រុង ហើយខ្លះវិញក៏ត្រូវបានផលិតឡើង ដោយកាត់បន្ថយសមាសធាតុផ្សំសំខាន់ៗផងដែរ ដើម្បីកាត់បន្ថយថ្លៃដើម ហើយទទួលបានប្រាក់ចំនេញខ្ពស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ