លោកហ៊ុន សែន ជួបគណបក្សអត់សម្លេងក្នុងសភាចំនួន១៦ ដើម្បីបង្កើត «ឧត្តមក្រុមប្រឹក្សាពិគ្រោះ និងផ្តល់យោបល់»
លោកនាយករដ្ឋមន្ត្រីហ៊ុន សែន នាព្រឹកនេះ បានជួបជាលើកដំបូងជាមួយគណបក្សនយោបាយចំនួន១៦ ដែលបានចូលរួមក្នុងការបោះឆ្នោតកាលពីថ្ងៃទី២៩កក្កដា កន្លងទៅ ខណៈគណបក្សចំនួន៤ផ្សេងទៀតបដិសេធ ការចូលរួមជជែកពិភាក្សានេះ។ ជាជំនួបដែលលោក ហ៊ុន សែន អះអាងថា ធ្វើឡើង លើការងារកសាង និងអភិវឌ្ឍន៍កម្ពុជា។
ចុះផ្សាយនៅថ្ងៃ៖
ស្តាប់ - ០២:២១
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានឲ្យដឹងតាមបណ្តាញសង្គមហ្វេសប៊ុករបស់លោកថា នេះគឺជាលើកទីមួយ ជាប្រវត្តិសាស្រ្តកម្ពុជា ដែលមានវត្តមានចូលរួមរបស់គណបក្សនយោបាយ នៅក្នុងវិមានសន្តិភាព។
គណបក្សនយោបាយទាំង១៦ ដែលចូលរួមក្នុងវេទិកានៅវិមានសន្តិភាពនោះរួមមានគណបក្សខ្មែររួបរួមជាតិ, គណបក្សពន្លឺថ្មី, គណបក្សសញ្ជាតិកម្ពុជា, គណបក្សខ្មែរក្រោក, គណបក្សសំបុកឃ្មុំសង្គមប្រជាធិបតេយ្យ, គណបក្សសាធារណរដ្ឋប្រជាធិបតេយ្យ, គណបក្សសាធារណរដ្ឋខ្មែរ, គណបក្សរស្មីខេមរា, គណបក្សហ៊្វុនស៊ិនប៉ិច, គណបក្សខ្មែរអភិវឌ្ឍសេដ្ឋកិច្ច, គណបក្សយុវជនកម្ពុជា, គណបក្សធម្មាធិបតេយ្យ, គណបក្សឆន្ទៈខ្មែរ, គណបក្សជនជាតិដើមប្រជាធិបតេយ្យកម្ពុជា, គណបក្សខ្មែរតែមួយ, និងគណបក្សប្រជាជនកម្ពុជា។ ដោយឡែកគណបក្សចំនួន៤ ដែលប្រកាសមិនចូលរួមវិញរួមមាន គណបក្សមាតុភូមិយើង, គណបក្សប្រជាធិបតេយ្យមូលដ្ឋាន, គណបក្សខ្មែរឈប់ក្រ, និងគណបក្សសម្ព័ន្ធដើម្បីប្រជាធិបតេយ្យ។
លោកនាយករដ្ឋមន្ត្រី ហ៊ុន សែន ធ្លាប់បានអះអាងថា ជំនួបនាពេលនេះ ធ្វើឡើងដើម្បីផ្តល់ឱកាសដល់គណបក្សទាំងនោះ ចូលរួមអភិវឌ្ឍន៍ប្រទេសជាតិ ជាពិសេសជាការបង្កើតវប្បធម៌សន្ទនារវាង បក្សនយោបាយនៅក្នុងរដ្ឋសភា និងបក្សនយោបាយនៅក្រៅរដ្ឋសភា។
លោក ផៃ ស៊ីផានតាមរយៈទំព័រហ្វេសប៊ុករបស់លោកឲ្យដឹងថា លោកនាយករដ្ឋមន្ត្រីហ៊ុន សែន ក្នុងជំនួបជាមួយគណបក្សនយោបាយទាំង១៦នោះ បានផ្តួចផ្តើមគំនិត និង ពន្យល់ពីហេតុផលនៃការបង្កើតឲ្យមាន “ឧត្តមក្រុមប្រឹក្សាពិគ្រោះ និងផ្តល់យោបល់”។
ឧត្តមក្រុមប្រឹក្សាពិគ្រោះ និងផ្តល់យោបល់ បើតាមលោក ផៃ ស៊ីផាន គឺមាននាទីផ្តួចផ្តើមគំនិត ឬផ្តល់មតិ នៅលើការរៀបចំគោលនយោបាយ ដល់រាជរដ្ឋាភិបាល, ចូលរួមផ្តល់យោបល់ដល់សេចក្តីព្រាងច្បាប់, ធ្វើញត្តិជូនព្រឹទ្ធសភាតតាំង និងច្បាប់ដែលបានអនុម័តដោយរដ្ឋសភា។
លោក ឯម សុវណ្ណរ៉ា សាស្រ្តាចារ្យវិទ្យាសាស្រ្តនយោបាយ និងជាអ្នកវិភាគនយោបាយ បានលើកឡើងថា វេទិកាគណបក្សនយោបាយ ដែលរៀបចំដោយរដ្ឋាភិបាលនាពេលនេះ គឺគ្រាន់ជាយន្តការរបស់គណបក្សកាន់អំណាច ដើម្បីឲ្យគេមើលឃើញថា កម្ពុជាមានការឯកភាពគ្នា ហើយក៏ជាយន្តការដើម្បីកុំឲ្យគណបក្សនយោបាយទាំងនោះ ងាកទៅចងសម្ព័ន្ធភាពជាមួយអតីតគណបក្សប្រឆាំង។
សូមបញ្ជាក់ថាលោកនាយករដ្ឋមន្ត្រី ហ៊ុន សែន កាលពីពេលថ្មីៗនេះ បាន សន្យាថានឹងផ្តល់តំណែងដល់ប្រធានគណបក្សនយោបាយ ដែលបានចូលរួមការបោះឆ្នោត ហើយមិនមានអាសនៈរដ្ឋសភា បានធ្វើជាទីប្រឹក្សា ឬរដ្ឋលេខាធិការនៅតាមក្រសួងនានា ដើម្បីជាការចូលរួមចំណែកអភិវឌ្ឍន៍ជាតិផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ