អគ្គនាយកដ្ឋានអន្តោប្រវេសន៍ បញ្ជាមន្រ្តីឲ្យទប់ស្កាត់មិនឲ្យលោក សម រង្ស៊ីចូលកម្ពុជា
អគ្គនាយកដ្ឋានអន្តោប្រវេសន៍ បានបញ្ជាឲ្យមន្រ្តីទាំងអស់ដែលនៅតាមបណ្តាច្រកទ្វារអន្តរជាតិ ព្រមទាំងប៉ុស្តិ៍ច្រកទ្វារព្រំដែនអន្តរជាតិ រាយការណ៍ជាបន្ទាន់ រារាំងមិនឲ្យ លោក សម រង្ស៊ី ចូលប្រទេសកម្ពុជាបាន។ នេះបើតាមលិខិតរបស់អគ្គនាយកដ្ឋានអន្តោប្រវេសន៍ចុះថ្ងៃទី ១៨ ខែ តុលា។ សូមបញ្ជាក់ថាលិខិតរបស់អគ្គនាយកដ្ឋានអន្តោប្រវេសន៍ ធ្វើឡើងបន្ទាប់ពីទទួលបានលិខិតពីទីស្តីការគណៈរដ្ឋមន្រ្តី ស្នើសុំអន្តរាគមន៍ពីអគ្គនាយកដ្ឋានអន្តោប្រវេសន៍ ដើម្បីចាត់វិធានការបង្ការទុកមុន ចំពោះការប៉ុនប៉ងណាមួយ ពីប្រធានគណបក្សសង្គ្រោះជាតិ ដែលចង់វិលមកកម្ពុជាវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
យោងតាមលិខិត ចុះថ្ងៃទី១៨ ខែតុលា អគ្គនាយកនៃអគ្គនាយកដ្ឋានអន្តោប្រវេសន៍ បង្គាប់ឲ្យ អគ្គនាយក និង និង នាយកដ្ឋានទាំងអស់ត្រូវយកចិត្តទុកដាក់ ពង្រឹងការត្រួតពិនិត្យ នៅតាមច្រកទ្វារអាកាសយានដ្ឋានទាំងបី នៅភ្នំពេញ សៀមរាប និង ក្រុងព្រះសីហនុ ក៏ដូចជា នៅតាមប៉ុស្តិ៍ច្រកទ្វារព្រំដែនអន្តរជាតិ នានា និង រាយការណ៍ជាបន្ទាន់ក្នុងករណី លោក សម រង្ស៊ី ចាកចេញផុតពីយន្តហោះ តាមច្រកសំខាន់ទាំងនោះ។
លិខិតដដែលសរសេរទៀតថា ស្ថាប័នពាក់ព័ន្ធខាងលើចំាបាច់ត្រូវចាត់វិធានការតាមផ្លូវច្បាប់ដើម្បីកុំឲ្យ លោក សម រង្ស៊ី ប្រធានគណបក្សសង្រ្គោះ ចូលមកកម្ពុជាបាន និង ចាត់វិធានការផ្សេងទៀតតាមការចំាបាច់ដោយអនុវត្តឲ្យបានម៉ត់ចត់។
សូមរំឮកជូនថា លិខិតរបស់អគ្គនាយកដ្ឋានអន្តោប្រវេសន៍នេះ ធ្វើឡើងបន្ទាប់ពីទទួលបានលិខិតពីទីស្ដីការគណៈរដ្ឋមន្ដ្រី ចុះថ្ងៃទី១២តុលាឆ្នាំ២០១៦ ផ្ញើជូនលោក សុខ ផល អគ្គនាយកនៃអគ្គនាយកដ្ឋានអន្តោប្រវេសន៍។ ជាលិខិតដែលបានដាក់ចេញនូវវិធានការមួយចំនួន រារាំង និងហាមឃាត់មិនឲ្យលោក សម រង្ស៊ី ចូលប្រទេសកម្ពុជាវិញ យោងតាមចំណាររបស់លោកនាយករដ្ឋមន្ដ្រី និងកិច្ចប្រជុំរបស់គណៈកម្មាធិការសន្តិសុខអាកាសយានដ្ឋានអន្ដរជាតិ។
លិខិតរបស់គណរដ្ឋមន្រ្តី នោះបានណែនាំឲ្យអាជ្ញាធរមានសមត្ថកិច្ច ចាត់វិធានការ៤សំខាន់ៗ គឺការតម្រូងឲ្យគ្រប់ក្រុមហ៊ុនអាកាសចរទាំងអស់ ដែលធ្វើប្រតិបត្តិការហោះហើរមកកម្ពុជា មិនត្រូវអនុញ្ញាតឲ្យលោកសម រង្ស៊ី ឡើងយន្តហោះមកកម្ពុជាទេ ហើយត្រូវផ្ដល់របាយការណ៍ទៀងទាត់ក្នុងករណីមានការទិញសំបុត្រយន្តហោះធ្វើដំណើរមកកម្ពុជា។
បន្ថែមពីនេះ ករណីធ្វើដំណើរមកកាន់កម្ពុជា តាមរយៈយន្តហោះណាមួយ យន្តហោះនោះនឹងត្រូវបង្វែរឲ្យវិលត្រឡប់ទៅកាន់អាកាសយានដ្ឋានដើមវិញ ដោយមិនអនុញ្ញាតឲ្យចុះចតនៅកម្ពុជាឡើយ។ មិនត្រឹមតែប៉ុណ្ណោះ ក្នុងករណីយន្តហោះណាដែលដឹកប្រធានបក្សប្រឆាំងនេះចុះចតដល់អាកាសយានដ្ឋានណាមួយនៅកម្ពុជា យន្តហោះនោះនឹងមិនត្រូវបានអនុញ្ញាតឲ្យភ្ញៀវចាកចេញពីយន្តហោះឡើយ និងត្រូវបញ្ជាឲ្យត្រឡប់ទៅអាកាសយានដ្ឋានដើមវិញ។ និងចុងក្រោយ គឺក្នុងករណីដែលបុគ្គល សម រង្ស៊ី បានចាកចេញផុតពីយន្តហោះ នគរបាលអន្តោប្រវេសន៍ ត្រូវចាត់វិធានការតាមផ្លូវច្បាប់ ដើម្បីកុំឲ្យបុគ្គលនេះចូលកម្ពុជាបាន និងចាត់វិធានការផ្សេងទៀតតាមការចាំបាច់។
ភ្លាមៗ ក្រោយពីលិខិតដែលបង្ហាញពីវិធានការរបស់រដ្ឋាភិបាលទប់ស្កាត់មិនឲ្យលោកសម រង្ស៊ីចូលប្រទេសកម្ពុជា អ្នកវិភាគនយោបាយបានលើកឡើងថារដ្ឋាភិបាលកំពុងតែរកវិធីមិនឲ្យលោកសម រង្ស៊ី ចូលស្រុក ជាជាងការចាប់ខ្លួនលោកដាក់ពន្ធនាគារ។ លោកថាវត្តមានរបស់លោកសម រង្ស៊ីនឹងធ្វើឲ្យប៉ះពាល់ដល់ប្រជាប្រិយគណបក្សកាន់អំណាច។
សូមជម្រាបជូនថា ជាញឹកញាប់ លោកសម រង្ស៊ី ប្រធានគណបក្សសង្គ្រោះជាតិ បង្ហាញពីជំហចង់វិលត្រឡប់មកប្រទេសកម្ពុជាវិញ ប្រសិនបើរដ្ឋាភិបាលកម្ពុជាដោះលែងសកម្មជននិងមន្រ្តីអង្គការសង្គមស៊ីវិលដែលកំពុងជាប់ពន្ធនាគារជាង៣០នាក់។ ជាថ្នូរនឹងការដោះលែងនេះ លោកសុខចិត្តវិលត្រលប់មកកាន់ប្រទេសកម្ពុជាវិញ និងយល់ព្រមដើរចូលគុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ