ឆ្នាំ២០១៥៖ មនុស្សជាង១០០នាក់រងគ្រោះដោយសារគ្រាប់មីន
នៅថ្ងៃទី២៤ កុម្ភៈស្អែក គឺជាទិវាយល់ដឹងពីមីន លើកទី១៧នៅកម្ពុជា រដ្ឋាភិបាលនៅថ្ងៃនេះបានបញ្ចេញសារលិខិតរបស់ប្រមុខរដ្ឋាភិបាលកម្ពុជាដើម្បីអបអរសាទរនៃទិវានេះ។ ក្នុងនោះ រដ្ឋាភិបាលបានឱ្យដឹងថា ក្នុងឆ្នាំ២០១៥កន្លងទៅ មានមនុស្សយ៉ាងហោចណាស់ប្រមាណជាង១០០នាក់បានរងគ្រោះដោយសារគ្រាប់មីន។
ចុះផ្សាយនៅថ្ងៃ៖
ស្តាប់ - ០១:៥៨
យ៉ាងហោចណាស់មនុស្ស១១១នាក់បានរងគ្រោះដោយសារគ្រាប់មីននៅកម្ពុជាសម្រាប់ឆ្នាំ២០១៥។ នេះបើយោងតាមសារលិខិតអំពាវនាវរបស់លោកនាយករដ្ឋមន្ត្រីហ៊ុន សែននៅថ្ងៃទី២៣ កុម្ភៈនេះ។ ក្នុងរយៈពេល២៤ឆ្នាំនៃការសម្អាតមីននៅកម្ពុជា អាជ្ញាធរបានសំអាតផ្ទៃដីបានប្រមាណ១ពាន់៤រយគីឡូម៉ែត្រក្រឡា និងកំទេចចោលនៅគ្រាប់មីនប្រឆាំងមនុស្សចំនួនជាង ១លាន ២ម៉ឺនគ្រាប់ មីនប្រឆាំងរថក្រោះជាង២ម៉ឺ៣ពាន់គ្រាប់ រួមទាំងសំណល់ជាតិផ្ទុះពីសង្គ្រាមចំនួន២លាន ៦ម៉ឺនគ្រាប់។ ដោយឡែកអ្នករងគ្រោះបានធ្លាក់ចុះពីជាង៤ពាន់ ក្នុងឆ្នាំ១៩៩៦ មកត្រឹម១១១នាក់ ក្នុងឆ្នាំ២០១៥។ សម្រាប់លោក ហេង រតនា ប្រធានមជ្ឈមណ្ឌលសកម្មភាពកំចាត់មីនកម្ពុជា បានបន្ថែមថាចំនួនករណីនេះ មានការធ្លាក់ចុះប្រមាណជាង៣០ករណី បើប្រៀបធៀបទៅនឹងរយៈពេលដូចគ្នាកាលពីឆ្នាំ២០១៤ ដែលមានចំនួន១៤៦ករណី។
កម្ពុជានៅមានផ្ទៃដីសង្ស័យថា មានមីននិងគ្រាប់យុទ្ធភ័ណ្ឌមិនទាន់ផ្ទុះប្រមាណជាង១ពាន់៦រយគីឡូម៉ែត្រក្រឡាទៀតដែលត្រូវសំអាត។ គួររំលឹកបន្ថែមថា ក្នុងរយៈពេលបីឆ្នាំចុងក្រោយ ពីឆ្នាំ២០១៣ និងឆ្នាំ២០១៥ បញ្ហាគ្រោះថ្នាក់ដោយសារមីនតោននៅតែបន្តកើតឡើងជាញឹកញាប់ ដែលបណ្តាលមកពីការប្រើប្រាស់គ្រឿងចក្រធុនធ្ងន់នៅក្នុងតំបន់ដែលមានផលប៉ះពាល់ដោយសារមីនតោន។
លោកហេង រតនា បានបញ្ជាក់ថាសម្រាប់ផ្ទៃដីដែលនៅសេសសល់ជាង១ពាន់៦រយគីឡូម៉ែត្រក្រឡានេះ មជ្ឈមណ្ឌលសកម្មភាពកំចាត់មីន អាចត្រូវការពេលវេលាប្រមាណជាង១០ឆ្នាំដើម្បីសំអាតផ្ទៃដីទាំងនោះ។ ជាផ្ទៃដីដែលសុទ្ធសឹងតែជាតំបន់សង្គ្រាមក្នុងអំឡុងពេលសង្គ្រាមស៊ីវិលកម្ពុជា។ លោកបន្ថែមថា សម្រាប់រយៈពេលមួយឆ្នាំៗ មជ្ឈមណ្ឌលមានផែនការសំអាតផ្ទៃដីប្រមាណ១៣០គីឡូម៉ែត្រក្រឡា។ ជាការសំអាតដែលផ្តោតទៅលើតំបន់អតិភាពនៅតាមខែត្រជាប់ព្រំដែនកម្ពុជា-ថៃដូចជាព្រះវិហារ បន្ទាយមានជ័យ ឧត្តរមានជ័យ បាត់ដំបង និងប៉ៃលិនជាដើម។ បើទោះបីជាបែបណាក៏ដោយ ចំនួននៃករណីរងគ្រោះដោយសារគ្រាប់មីននៅឆ្នាំ២០១៥នេះ ត្រូវបានគេវាយតម្លៃថានៅមានកម្រិតខ្ពស់នៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ