រដ្ឋមន្ត្រីក្រសួងអប់រំ៖«នឹងមិនឲ្យករណីច្រលំឈ្មោះសិស្ស កើតឡើងទៀតទេ»
រដ្ឋមន្ត្រីក្រសួងអប់រំ លោក ហង់ ជួន ណារ៉ុន បានថ្លែងឲ្យដឹងថា យុវសិស្សម្នាក់នៅខេត្តកំពង់ធំដែលមិនមានឈ្មោះប្រលងបាក់ឌុប មិនមានដំណោះស្រាយអ្វីក្រៅពីឲ្យរូបគេរៀនត្រួតថ្នាក់នោះទេ។ ការបញ្ជាក់របស់លោករដ្ឋមន្ត្រីដូច្នេះ ធ្វើឡើងនៅក្នុងពិធីផ្តល់អាហារូបករណ៍សហភាពអឺរ៉ុបដល់និស្សិតកម្ពុជា កាលពីរសៀលថ្ងៃព្រហស្បតិ៍ម្សិលមិញ។ សម័យប្រលងសញ្ញាបត្រមធ្យមសិក្សាទុតិយភូមិ ឬបាក់ឌុប កាលពីថ្ងៃទី២០ ខែសីហា កន្លងទៅនេះ មានការភ្ញាក់ផ្អើលមួយ ចេញពីខេត្តកំពង់ធំ ដោយយុវសិស្សម្នាក់ឈ្មោះ សុំ រស្មី និងក្រុមគ្រួសារធ្វើការទាមទាររកយុត្តិធម៌ ដោយសារយុវសិស្សរូបនេះ មិនមានឈ្មោះប្រលង ហើយទីបំផុតសិស្ស សុំ រស្មី មិនត្រូវបានអនុញ្ញាតឲ្យប្រលងឡើយ។ តាមលោក ហង់ ជួន ណារ៉ុន បញ្ហានេះមិនមែនជាកំហុសរបស់នាយកសាលាទេ ខណៈយុវសិស្ស បានដូរត្រកូល «សំ» ទៅជា «សុំ» ហើយដូរទៅរៀនថ្នាក់ផ្សេង មានឈ្មោះពីរ ក្នុងសាលាតែមួយ ជាហេតុធ្វើឲ្យការលុប បាត់ឈ្មោះទាំងពីរតែម្តង។ ទោះយ៉ាងណា លោករដ្ឋមន្ត្រីសន្យាថានឹងមិនឲ្យបញ្ហានេះកើតឡើងទៀតទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:០២
