ក្រសួងវប្បធម៌៖ ចុងឆ្នាំ២០១៨នេះ កម្ពុជានឹងដឹងលទ្ធផលពីការដាក់ល្ខោនខោលក្នុងបញ្ជីបេតិកភណ្ឌ
លទ្ធផលស្តីពីការស្នើដាក់ល្ខោនខោលក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិនៅអង្គការយូណេស្កូនឹងត្រូវប្រកាសនៅចុងឆ្នាំ២០១៨ខាងមុខនេះ។ នេះបើតាមអ្នកនាំពាក្យក្រសួងវប្បធម៌ និងវិចិត្រសិល្បៈ។ ជាការបញ្ជាក់បន្ទាប់ពីអ្នកប្រើប្រាស់បណ្តាញសង្គមជាច្រើន ចង់ឲ្យអង្គការយូណេស្កូដាក់បញ្ចូលក្នុងបញ្ជីបេតិកភណ្ឌ។
ចុះផ្សាយនៅថ្ងៃ៖
ស្តាប់ - ០១:៥៧
លោក ថៃ នរៈសត្យា អ្នកនាំពាក្យក្រសួងវប្បធម៌ និងវិចិត្រសិល្បៈ បានអះអាងប្រាប់វិទ្យុបារាំងអន្តរជាតិថាជាទម្លាប់របស់អង្គការUNESCO ប្រកាសពីលទ្ធផលនៃសំណើដាក់សម្បត្តិវប្បធម៌អ្វីមួយចូលក្នុងបញ្ជីបេតិកភណ្ឌនៅចុងឆ្នាំ។ អ្នកនាំពាក្យរូបនេះរំពឹងថា ល្ខោនខោលរបស់កម្ពុជា(ល្ខោនខោលវត្តស្វាយអណ្តែត)នឹងត្រូវដាក់បញ្ចូលក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ ព្រោះកម្ពុជាមានភស្តុតាង និងមូលដ្ឋានច្បាស់លាស់។
កាលពីថ្ងៃទី២៩ ខែមីនា ឆ្នាំ២០១៧ កម្ពុជាបានបញ្ជូនឯកសារទាក់ទងទៅនឹងល្ខោនខោលទៅអង្គការយូណេស្កូ ដំណាលគ្នានឹងឯកសារគុនល្បុក្កតោខ្មែរ។ ក្រសួងវប្បធម៌អះអាងថា ឯកសានីមួយៗ ដែលដាក់ស្នើសុំ ត្រូវឆ្លងកាត់ការពិនិត្យវាយតម្លៃជាច្រើនដំណាក់កាលពីក្រុមជំនាញអន្តរជាតិ មុននឹងដាក់ពិនិត្យសម្រេចក្នុងកិច្ចប្រជុំគណៈកម្មាធិការអន្តររដ្ឋាភិបាល នៃអង្គការយូណេស្កូ នាចុងឆ្នាំ២០១៨នេះ។
ថ្មីៗនេះអ្នកប្រើប្រាស់បណ្តាញសង្គម បានសរសេរសារខ្លីៗដោយបញ្ជាក់ថាល្ខោនខោលជារបស់ខ្មែរ ហើយទាមទារឲ្យអង្គការយូណេស្កូចុះក្នុងបញ្ជីបេតិកភណ្ឌ។ ជាការឆ្លើយតប លោក ថៃ នរៈសត្យា អ្នកនាំពាក្យក្រសួងវប្បធម៌ និងវិចិត្រសិល្បៈ បានអំពាវនាវឲ្យអ្នកប្រើប្រាស់បណ្តាញសង្គមមានភាពស្ងប់ស្ងាត់ទាក់ទងនឹងការស្នើដាក់បញ្ចូលល្ខោនខោលជាសម្បត្តិបេតិកភណ្ឌនេះ ព្រោះក្រសួងវប្បធម៌បានបំពេញតួនាទីរួចរាល់អស់ហើយ ចំពោះការថែរក្សាសម្បត្តិវប្បធម៌ទាំងរូបី និងអរូបី។
សូមជម្រាបជូនថា រហូតមកដល់ពេលនេះសម្បត្តិវប្បធម៌របស់កម្ពុជា ដែលមានរួមមាន របាំព្រះរាជទ្រព្យ ល្ខោនស្រមោលស្បែកធំ ល្បែងទាញព្រ័ត្រ និងចាប៉ីដងវែងជាដើម ត្រូវបានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ។
យោងតាមគេហទំព័ររបស់អង្គការយូណេស្កូ ការពិនិត្យសម្រេចសំណើរបស់ប្រទេសនានា ដែលចង់ដាក់សម្បត្តិវប្បធម៌របស់ខ្លួនក្នុងបញ្ជីបេតិកភណ្ឌ នឹងត្រូវធ្វើឡើងក្នុងកិច្ចប្រជុំលើកទី១៣ នៅចុងខែវិច្ឆកា និងដើមខែធ្នូខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ