ស្តង់ដាទីក្រុងទេសចរណ៍ស្អាតអាស៊ានត្រូវបានប្រកាសឱ្យត្រៀមអនុវត្តនៅកម្ពុជា
លោក ថោង ខុន រដ្ឋមន្ត្រីក្រសួងទេសចរណ៍កម្ពុជា នៅព្រឹកថ្ងៃចន្ទនេះ បានប្រកាសឱ្យអ្នកពាក់ព័ន្ធនៅកម្ពុជា ត្រៀមអនុវត្តស្តង់ដាទីក្រុងទេសចរណ៍ស្អាតអាស៊ាន។ លោករដ្ឋមន្ត្រីបានឱ្យដឹងថា ស្តង់ដាទីក្រុងទេសចរណ៍ស្អាតអាស៊ាននេះ«ជាគំនិតផ្តួចផ្តើមរបស់កម្ពុជា» ក្នុងការរៀបចំ ហើយដែលត្រូវបានអនុម័តដោយបណ្តារដ្ឋមន្ត្រីទេសចរណ៍ក្នុងសមាគមអាស៊ាន កាលពីខែមករា ឆ្នាំ២០១៥។
ចុះផ្សាយនៅថ្ងៃ៖
ស្តាប់ - ០២:០៥
កំណើនទេសចរនៅក្នុងប្រទេសកម្ពុជា ក៏ដូចជានៅក្នុងពិភពលោក ការប្រែប្រួលអាកាសធាតុដែលជាបញ្ហាប្រឈមចម្បងមួយនៃបញ្ហាសាកលជាច្រើន ព្រមទាំងការកើនឡើងនៃប្រជាជននៅក្នុងទីក្រុង និងតំបន់ជុំវិញទីក្រុង សុទ្ធសឹងជាមូលហេតុចាំបាច់សម្រាប់ការអភិវឌ្ឍបៃតង និងភាពស្អាតក្នុងទីក្រុង ដោយឈរលើគោលការណ៍និរន្តរភាព។ នេះបើយោងតាមលោក ថោង ខុន ដែលបានថ្លែងក្នុងពេលផ្សព្វផ្សាយអំពីការត្រៀមអនុវត្តស្តង់ដាទីក្រុងស្អាតអាស៊ាន និងចលនាប្រឡងប្រណាំងរង្វាន់សម្ដេចតេជោនាយករដ្ឋមន្ត្រីសម្រាប់ធុរកិច្ចបៃតងក្នុងវិស័យ ទេសចរណ៍ ឆ្នាំ២០១៦ លើកទី២ នាព្រឹកថ្ងៃចន្ទ នៅរាជធានីភ្នំពេញ។
រដ្ឋមន្ត្រីទេសចរណ៍កម្ពុជាក៏បានបញ្ជាក់ដែរថា ការត្រៀមឆ្ពោះទៅការអនុវត្តស្តង់ដាទីក្រុងស្អាតអាស៊ាននេះ គឺឆ្លើយតបទៅនឹងគោលដៅទី១១ក្នុងរបៀវវារៈនៃការអភិវឌ្ឍប្រកបដោយនិរន្តរភាពក្រោយឆ្នាំ២០១៥។ គោលដៅនេះផ្តោតលើកិច្ចប្រឹងប្រែងរួមគ្នា ក្នុងការធ្វើឱ្យទីក្រុងកាន់តែមាននិរន្តរភាព ដោយឈរលើមូលដ្ឋានសំខាន់ៗចំនួន៤ ដែលត្រូវដើរទន្ទឹមគ្នា ពោលគឺការធានាបែងចែកផលដោយសមធម៌ ការធានាសុវត្ថិភាព ការធានាភាពធន់នឹងវិបត្តិនានា និងការធានាឱ្យបាននិរន្តរភាពដែលកើតចេញពីការអភិវឌ្ឍទីក្រុង។
ស្តង់ដាទីក្រុងទេសចរណ៍ស្អាតអាស៊ានត្រូវបានលោក ថោង ខុន អះអាងថា«ជាគំនិតផ្តួចផ្តើមរបស់កម្ពុជា» ហើយត្រូវបានអនុម័តដាក់ឱ្យប្រើប្រាស់ដោយរដ្ឋមន្ត្រីទេសចរណ៍ក្នុងសមាគមអាស៊ាន កាលពីខែមករា ឆ្នាំ២០១៥នេះ។ ក្នុងការអនុវត្តស្តង់ដានេះ ប្រទេសជាសមាជិកអាស៊ានត្រូវបន្តអភិវឌ្ឍទីក្រុងទេសចរណ៍ទាំងអស់ជាទីក្រុងស្អាត ជាទីក្រុងបៃតង ជាទីក្រុងមានការអភិវឌ្ឍប្រកបដោយនិរន្តរភាព និងជាទីក្រុងទេសចរណ៍ប្រកបដោយការទាក់ទាញ និងប្រកួតប្រជែងខ្ពស់។
កន្លងទៅ កម្ពុជាបានដាក់ចេញឱ្យអនុវត្តរួចហើយនូវយុទ្ធនាការ ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ និងបានបង្កើតឱ្យមានការប្រឡងប្រណាំងទីក្រុងស្អាត តាំងពីឆ្នាំ២០១២មក។ តាមការសិក្សាស្រាវជ្រាវ មាន៣៤ភាគរយនៃភ្ញៀវទេសចរណ៍ ហ៊ានបង់ថ្លៃក្នុងកម្រិតខ្ពស់ជាងធម្មតា ដើម្បីស្នាក់នៅតាមសណ្ឋាគារដែលគិតគូរដល់បរិស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ