កម្ពុជា

ក្រសួងធម្មការថា បុគ្គលតាំងខ្លួនជាព្រះអរហន្តមិនមែនជា ធាន វុទ្ធី នោះទេ

ក្រសួងធម្មការ និងសាសនា អះអាងថា បុគ្គលដែលចេញមុខតាំងខ្លួនជាព្រះអរហន្តនៅពេលនេះ គឺមិនមែនជាបុគ្គល ធាន វុទ្ធី ដូចការចុះផ្សាយរបស់ព័ត៌មានមួយចំនួននោះទេ។ ការអះអាងថារបស់ក្រសួងនេះ ធ្វើឡើងបន្ទាប់ពី មន្រ្តីធម្មការនិងសាសនា រួមទាំងអាជ្ញាធរពាក់ព័ន្ធក្នុងកណ្តាល បានចុះទៅពិនិត្យដល់កន្លែងដែលបុគ្គលម្នាក់តាំងខ្លួនជាព្រះអរហន្ត នៅវត្តទួលរាជា ស្ថិតនៅភូមិកំពង់គរ ឃុំពោធិបាន ស្រុកកោះធំ កាលពីរសៀលម្សិលមិញ។

ចុះផ្សាយនៅថ្ងៃ៖ 13/10/2017 - 09:30

លោក សេង សុមុនី អ្នកនាំពាក្យក្រសួងធម្មការនិងកិច្ចការសាសនា។

ផ្សាយពាណិជ្ជកម្ម

លោក សេង សុមុនី អ្នកនាំពាក្យក្រសួងធម្មការ និងសាសនា បញ្ជាក់ប្រាប់វិទ្យុបារាំងRFI នៅថ្ងៃសុក្រនេះថា មានតួអង្គពីរដែលតាំងខ្លួនព្រះអរហន្ត។ លោកថាតួអង្គដែលទទួលក្រាលគ្រងកឋិនទានគឺមិនមែនជា ធាន វុទ្ធីទេ ចំណែកអ្នកតែងខ្លួនជាតួអង្គព្រះមហាក្សត្រក៏មិនមែនជា ធាន វុទ្ធី ដែរ តែពួកគេស្ថិតក្នុងទីកន្លែងជាមួយគ្នា។

ដោយឆ្លងកាត់តាមការពិនិត្យផ្ទាល់របស់មន្រ្តីពាក់ព័ន្ធកាលពីម្សិលមិញ លោក សេង សុមុនី អះអាងថា របាយការណ៍បឋមគ្រាន់តែដឹងថា បុគ្គលទាំងពីរដែលតាំងខ្លួនជាព្រះអរហន្តនោះបានចេញមកជួបអាជ្ញាធរដែរ ហើយអះអាងថា ពួកគេមិនមែនជា ធាន វុទ្ធី នោះទេ។ ប៉ុន្តែលោកថា បុគ្គល ធាន វុទ្ធីដែលធ្លាប់តាំងខ្លួនឯងថាជាព្រះសិរិអារ្យមេត្រីនោះ ក៏រស់នៅក្នុងទីកន្លែងជាមួយគ្នានេះដែរ។

ចំពោះចំណាត់យ៉ាងណាលើករណីបុគ្គលតាំងខ្លួនជាព្រះអរហន្តនេះ អ្នកនាំពាក្យក្រសួងធម្មការថា ភាគីពាក់ព័ន្ធកំពុងតែប្រជុំគ្នានៅឡើយ មិនទាន់ដឹងថានឹងមានវិធានការបែបណាទេ។

សូមរំលឹកថា កាលពីឆ្នាំ២០១៤ លោក ធាន វុទ្ធី ដែលតាំងខ្លួនជាព្រះសិរិអាមេត្រីនោះ បាន ចូលបំភ្លឺនៅចំពោះមុខតុលាការខេត្តកណ្តាលនិងទទួលបានលិខិតព្រមានពីក្រសួងធម្មការឲ្យបញ្ឈប់ធ្វើសកម្មភាពនេះបន្តទៀត ហើយក៏បាត់មុខមួយរយៈ។

បើតាមក្រសួងធម្មការ លោក ធាន វុទ្ធី បន្តរស់នៅក្នុងវត្តទួលរាជា ស្ថិតនៅភូមិកំពង់គរ ឃុំពោធិបាន ស្រុកកោះធំ ខេត្តកណ្តាល ដោយមានអ្នកដើរតាមស្លៀកស ពាក់ស ក្មេងចាស់ ប្រុសស្រី ជាច្រើននាក់។

ទាក់ទងករណីនេះ ព្រះគ្រូពុទ្ធង្គល់ វ៉ង់ សុភស្ត សាស្ត្រាចារ្យ នៃពុទ្ធិកសាកលវិទ្យាល័យ ព្រះសីហនុរាជ មានថេរៈដីកាថា តាមគម្ពីរព្រះពុទ្ធសាសនា គឺមិនមានព្រះអរហន្តទៀតទេនៅសម័យកាលនេះ។ ព្រះអង្គបន្តថា តួអង្គព្រះអរហន្ត រស់បានតែ៧យប់៧ថ្ងៃនឹងអស់អាយុសង្ខាហើយ។ ព្រះអង្គចាត់ទុកថាអ្នកដែលតាំងខ្លួនជាព្រះអរហន្តនៅពេលនេះគឺជាការបោកប្រាស់៕