កែប្រែឥរិយាបថលើដងផ្លូវ ដើម្បីកាត់បន្ថយគ្រោះថ្នាក់ចរាចរណ៍
ចុះផ្សាយនៅថ្ងៃ៖
ស្តាប់ - ០៥:១៥
ចំនួនមនុស្សស្លាប់ដោយសារគ្រោះថ្នាក់ចរាចរណ៍នៅកម្ពុជាមិនថយចុះទេ។ ផ្ទុយទៅវិញ វាបានកើនឡើងជាលំដាប់ ពីមួយឆ្នាំទៅមួយឆ្នាំ។ ក្រៅពីចំនួនកើនឡើង លក្ខណៈនៃការស្លាប់នៅលើដងផ្លូវក៏កាន់តែសាហាវឡើងៗផងដែរ។ ជាក់ស្ដែងដូចជាគ្រោះថ្នាក់ចរាចរណ៍នៅស្រុកស្វាយទាប ខេត្តស្វាយរៀង កាលពីម្សិលមិញ។ រថយន្តក្រុងបុកជាមួយរថយន្តដឹកកម្មករ បណ្ដាលឲ្យស្លាប់មនុស្សជិត២០នាក់ និងច្រើននាក់ផ្សេងទៀតរងរបួស។ នៅក្នុងបរិបទនេះ សំណួរដដែលៗបានចោទឡើងជាថ្មីម្ដងទៀត ថាតើគេគួរធ្វើអ្វីខ្លះ ដើម្បីកាត់បន្ថយគ្រោះថ្នាក់ចរាចរណ៍ប្រកបដោយប្រសិទ្ធិភាព?
ស្ថានភាពគ្រោះថ្នាក់ចរាចរណ៍នៅកម្ពុជា មិនមានភាពធូរស្រាលសោះឡើយ។ ពោល គ្រោះថ្នាក់ចរាចរណ៍នៅតែជាក្ដីបារម្ភពីសំណាក់អ្នកប្រើប្រាស់ផ្លូវថ្នល់គ្រប់គ្នា និងគ្រប់ពេលទាំងអស់។ ជារៀងរាល់ថ្ងៃ មនុស្សយ៉ាងហោចណាស់៦នាក់ស្លាប់ដោយសារតែគ្រោះថ្នាក់ចរាចណ៍។ ហើយចំនួននេះ នៅតែកើនឡើងពីមួយឆ្នាំទៅមួយឆ្នាំ ដោយគ្មានថយចុះសោះឡើយ។ ផ្អែកតាមសភាពការណ៍នេះ ប្រជាពលរដ្ឋមួយចំនួនបានចោទសំណួរដោយក្ដីអស់សង្ឃឹមថា តើកម្ពុជាអាចកាត់បន្ថយគ្រោះថ្នាក់ចរាចរណ៍បានដែរឬទេ? ហើយប្រសិនបើបាន តើតាមរបៀបណា?
ជាបឋម មុននឹងឈានទៅកាត់បន្ថយគ្រោះថ្នាក់ចរាចរណ៍ គេត្រូវយល់ឲ្យច្បាស់ជាមុនសិនអំពីមូលហេតុចម្បងៗ ដែលបង្កឲ្យមានគ្រោះថ្នាក់ចរាចរណ៍។ បើតាមរបាយការណ៍របស់ក្រុមការងារគណៈកម្មាធិការជាតិសុវត្ថិភាពចរាចរណ៍ផ្លូវគោក គ្រោះថ្នាក់ចរាចរណ៍នៅកម្ពុជាភាគច្រើនបណ្ដាលមកពី ការមិនគោរពច្បាប់ចរាចរណ៍។ ក្រៅពីនេះ គ្រោះថ្នាក់ចរាចរណ៍ក៏កើតឡើងផងដែរ ដោយសារការបើកបរហួសល្បឿនកំណត់ ការបើកបរក្នុងពេលស្រវឹង ករណីយានយន្ត និងកត្តាផ្លូវថ្នល់ជាដើម។
និយាយពីច្បាប់ចរាចណ៍ផ្លូវគោកថ្មី។ ច្បាប់នេះត្រូវបានអនុម័តរួចហើយកាលពីចុងឆ្នាំ២០១៤ ដោយគ្រប់ភាគីទាំងអស់សង្ឃឹមថា ច្បាប់ថ្មីនេះ នឹងអាចកាត់បន្ថយគ្រោះថ្នាក់ចរាចណ៍ដ៏ធ្ងន់ធ្ងរនៅកម្ពុជាបាន។ យ៉ាងណាក៏ដោយ ច្បាប់នេះនៅមិនទាន់ត្រូវបានអនុវត្តនៅឡើយទេ។ មិនទាន់អនុវត្ត ព្រោះត្រូវការផ្សព្វផ្សាយឲ្យបានទូលំទូលាយជាមុនសិន។
សម្រាប់ច្បាប់ចរាចណ៍ផ្លូវគោកថ្មីនេះ អ្នកបើកបរល្មើសច្បាប់នឹងត្រូវផាកពិន័យយ៉ាងធ្ងន់ធ្ងរ។ ដោយក្នុងនោះ ប្រសិនបង្កគ្រោះថ្នាក់ដែលបណ្ដាលឲ្យមានមនុស្សរបួសឬស្លាប់ អ្នកប្រព្រឹត្តអាចត្រូវជាប់ពន្ធនាគាររហូតដល់ទៅ៥ឆ្នាំ ចំណែកការផាកពិន័យអាចកើនឡើងដល់២៥លានរៀលឯណោះ។ ចំណែកអ្នកបើកបរដែលបំពានច្បាប់ចរាចណ៍ បើកបរបំពានបទបញ្ជារបស់សមត្ថកិច្ច បើកបរដោយស្រវឹង និងបើកបរដោយគ្មានប័ណ្ណបើកបរ ក៏នឹងត្រូវទទួលទោសព្រមទាំងការផាកពិន័យយ៉ាងធ្ងន់ធ្ងរផងដែរ។ ទោសជាប់ពន្ធនាគារនិងការផាកពិន័យក៏មានផងដែរសម្រាប់ភ្នាក់ងារនគរបាលដែលបំពានទៅលើអ្នកបើកបរ។
ប៉ុន្តែយ៉ាងណាក៏ដោយ បើទោះបីជាមានច្បាប់ថ្មី តើគ្រោះថ្នាក់ចរាចរណ៍ពិតជាអាចកាត់បន្ថយបានមែនឬ ប្រសិនបើអ្នកប្រើប្រាស់ផ្លូវថ្នល់មិនគោរពច្បាប់ ហើយនៅតែមិនកែប្រែឥរិយាបថធ្វេសប្រហែសរបស់ខ្លួនក្នុងពេលបើកបរនោះ?
ឥរិយាបថធ្វេសប្រហែសរបស់អ្នកប្រើប្រាស់ផ្លូវនៅកម្ពុជា កើតចេញពីការមិនយកចិត្តទុកដាក់ និងមិនទទួលខុសត្រូវ ទាំងបញ្ហាបច្ចេកទេសយានយន្ត និងទាំងបញ្ហាការបើកបរនៅតាមដងផ្លូវ។ ការប្រើប្រាស់យានយន្តដែលគ្មានសុវត្ថិភាព ដោយមិនបានត្រួតពិនិត្យលក្ខណៈបច្ចេកទេសត្រឹមត្រូវ គឺនៅតែជាបញ្ហានៅកម្ពុជា។ ចំណែកឯការបើកបរដោយភាពធ្វេសប្រហែស សរបង្ហាញតាមរយៈបើកបរដោយមិនគោរពច្បាប់ចរាចរណ៍ បើកបរហួសល្បឿនកំណត់ បើកបរដោយមិនពាក់មួកសុវត្ថិភាពឬមិនដាក់ខ្សែក្រវាត់សុវត្ថិភាព បើកបរក្នុងស្ថានភាពស្រវឹង និងបើកបរដោយមិនគោរពសិទ្ធិអាទិភាពជាដើម។
ទន្ទឹមគ្នានេះ កម្សោយនៃការអនុវត្តច្បាប់នៅកម្ពុជា ក៏ជាកត្តាដែលធ្វើឲ្យការកាត់បន្ថយគ្រោះថ្នាក់ចរាចរណ៍ទទួលបរាជ័យផងដែរ។
ជាក់ស្ដែង អ្នកបើកបរខុសច្បាប់តាមដងផ្លូវ អាចរួចខ្លួនពីសំណាញ់ច្បាប់បានដោយសារឥទ្ធិពលនៃទឹកប្រាក់។ ចំណែកបណ្ណបើកបរ ក៏ដូចជាការត្រួតពិនិត្យយានយន្តជាដើម ជារឿយៗ គឺសុទ្ធតែអាចទទួលបានដោយទឹកប្រាក់ ដោយមិនចាំបាច់រៀនបើកបរ មិនបាច់ចេះច្បាប់ចរាចរណ៍ និងមិនចាំបាច់យកយានយន្តទៅពិនិត្យដោយផ្ទាល់ក៏បាន។ ការដាក់ស្លាកសញ្ញា និងគំនូសនៅតាមដងផ្លូវទូទាំងប្រទេស ក៏នៅមានការខ្វះខាតផងដែរ។ ទាំងអស់នេះ គឺជាកត្តាសំខាន់ៗ ដែលជំរុញឲ្យគ្រោះថ្នាក់ចរាចរណ៍នៅតែកើតឡើង និងកើនឡើងជាលំដាប់នៅកម្ពុជា។
មែនទែនទៅ គ្រោះថ្នាក់ចរាចរណ៍គឺជារឿងអកុសល ដែលមិនមាននរណាចង់ឲ្យកើតមាននោះទេ។ ហើយប្រសិនបើមានគ្រោះថ្នាក់ចរាចរណ៍ ជាការពិត គឺវាកើតឡើងដោយគ្មាននរណាអាចមើលឃើញបានមុននោះឡើយ។ បើទោះបីជាបញ្ហាគ្រោះថ្នាក់ចរាចរណ៍នៅតែជាចំណងសម្លាប់មុខ ពិបាកនឹងស្រាយ។
ប៉ុន្តែបើមើលឲ្យបានជ្រៅទៅក្នុងបញ្ហានេះ គេអាចសង្កេតឃើញថា គ្រោះថ្នាក់ចរាចណ៍ពិតជាអាចកាត់បន្ថយបាន ដោយគ្រាន់តែអ្នកប្រើប្រាស់ផ្លូវថ្នល់គ្រប់ៗគ្នា កុំធ្វេសប្រហែស ព្រមទាំងបង្កើនការប្រុងប្រយ័ត្ន។ ព្រោះសូមកុំភ្លេចថា បើពលរដ្ឋគ្រប់គ្នានៅតែធ្វេសប្រហែស និងមិនព្រមលះបង់ចោលឥរិយាបទអាក្រក់ៗរបស់ខ្លួននៅលើដងផ្លូវចោលទេនោះ បើទោះបីជាកម្ពុជាមានច្បាប់ចរាចរណ៍ថ្មី១០ឬ២០ដងទៀត ក៏មិនអាចកាត់បន្ថយគ្រោះថ្នាក់ចរាចរណ៍បានដែរ។ ការគោរពច្បាប់ចរាចណ៍ ត្រូវដើរទន្ទឹមនឹងការកែប្រែឥរិយាបទរបស់មនុស្សខ្មែរគ្រប់គ្នា ទើបសុវត្ថិភាពលើដងផ្លូវពិតប្រាកដ អាចកើតមានបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ