ក្រសួងអប់រំ ត្រៀមខ្លួនទប់ទល់នឹងស្ថានភាពទឹកជំនន់ មុនពេលប្រឡងបាក់ឌុប
រដ្ឋមន្ត្រីក្រសួងអប់រំយុវជននិងកីឡា លោក ហង់ ជួនណារ៉ុន បានអះអាងនៅថ្ងៃទី៩សីហានេះថា ក្រសួងអប់រំបានត្រៀមខ្លួនទប់ទល់នឹងស្ថានភាពទឹកជំនន់រួចហើយ ដើម្បីកុំឲ្យប៉ះពាល់ដល់ដំណើរការប្រឡងសញ្ញាបត្រមធ្យមសិក្សាទុតិយភូមិឬបាក់ឌុប នៅថ្ងៃទី២០សីហាខាងមុខ។ បើតាមលោករដ្ឋមន្រ្តីក្រសួងអប់រំដដែល គិតត្រឹមពេលនេះ នៅមិនទាន់មានមណ្ឌលប្រឡងណាមួយត្រូវប្ដូរទីតាំងដោយសារទឹកជំនន់នៅឡើយទេ។
ចុះផ្សាយនៅថ្ងៃ៖
ស្តាប់ - ០២:០១
គិតមកដល់ថ្ងៃទី៩សីហានេះ មណ្ឌលប្រឡងនៅទូទាំងប្រទេសចំនួន១៩៥មណ្ឌល ដែលត្រៀមទទួលបេក្ខជនថ្នាក់ទី១២ ចូលប្រឡងនៅថ្ងៃទី២០សីហា នៅមិនទាន់ទទួលរងការជន់លិចដោយសារស្ថានភាពទឹកជំនន់នៅឡើយទេ។ គឺនៅក្នុងករណីដែលទឹកជំនន់ជន់លិចទីរួមខេត្តទាំងមូលប៉ុណ្ណោះ ដែលក្រសួងអប់រំនឹងផ្លាស់ប្ដូរមណ្ឌលប្រឡងបាក់ឌុបទៅកាន់ទីទួលមានសុវត្ថិភាព។ នេះគឺជាការអះអាងរបស់លោក ហង់ ជួនណារ៉ុន រដ្ឋមន្ត្រីក្រសួងអប់រំ ដែលបានថ្លែងប្រាប់វិទ្យុបារាំងអន្តរជាតិនៅថ្ងៃព្រហស្បតិ៍នេះ។
ទោះបីជាត្រៀមខ្លួនទប់ទល់នឹងស្ថានភាពទឹកជំនន់រួចហើយក្ដី ក៏លោករដ្ឋមន្ត្រីនៅមានក្ដីព្រួយបារម្ភថា អាកាសធាតុដែលមានភ្លៀងបន្តធ្លាក់ជោគជាំបែបនេះអាចជន់លិចមណ្ឌលប្រឡង ហើយក្រសួងនឹងត្រូវបង្ខំចិត្តផ្លាស់ប្ដូរមណ្ឌលប្រឡង យ៉ាងហោចណាស់ចំនួន២ ក្នុងចំណោមមណ្ឌលសរុប១៩៥។ ក្នុងឆ្នាំកន្លងមក ក្រសួងអប់រំធ្លាប់មានបទពិសោធផ្លាស់ប្ដូរមណ្ឌលប្រឡងនៅក្នុងទីរួមខេត្តក្រចេះរួចហើយ។
អ្នកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ បានសម្ដែងស្វាគមន៍ចំពោះវិធានការរបស់ក្រសួងអប់រំ ត្រៀមទប់ទល់នឹងទឹកជំនន់ដូច្នេះ។ យ៉ាងណាក៏ដោយ លោកស្រីបានអំពាវនាវឲ្យក្រសួងអប់រំផ្ដល់ការអនុគ្រោះដល់បេក្ខជនដែលមកយឺតក្នុងម៉ោងប្រឡង ក្នុងករណីមេឃភ្លៀងនាំមកនូវទឹកជំនន់។ ការឡើងថ្លៃអាហារ និងកន្លែងស្នាក់នៅចំពោះសិស្សដែលត្រូវប្រឡង ក៏ជាបញ្ហាដែលប្រធានសមាគមគ្រូបង្រៀនកម្ពុជាឯករាជ្យ ប្រាប់ឲ្យក្រសួងអប់រំយកចិត្តទុកដាក់ដោះស្រាយផងដែរ។
ជាការកត់សម្គាល់ ប្រឈមនឹងក្ដីព្រួយបារម្ភនេះ ក្រសួងអប់រំតែងតែក្រើនរំឭកដល់គ្រប់អ្នកប្រកបរបរអាជីវកម្មកុំឲ្យឆ្លៀតឱកាសដំឡើងថ្លៃសេវានានាក្នុងអំឡុងក្រសួងអប់រំកំពុងរៀបចំដំណើរការប្រឡង។
សូមបញ្ជាក់ថា ការប្រឡងមធ្យមសិក្សាទុតិយភូមិឆ្នាំ២០១៨ នឹងមានបេក្ខជនចូលរួមប្រឡងទាំងសិស្សថ្នាក់វិទ្យាសាស្ត្រ និងសង្គម ចំនួនសរុប ១១៧ ០៦១នាក់ និងមានមណ្ឌលប្រឡងចំនួន១៩៥មណ្ឌល ចែកចេញជា ៤ ៧១៦បន្ទប់ នៅទូទាំង២៥រាជធានី-ខេត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ