ក្រសួងការបរទេសកម្ពុជា ច្រានចោលព័ត៌មានថាអាល្លឺម៉ង់ដាក់សម្ពាធទិដ្ឋាការលើមន្ត្រីរដ្ឋាភិបាលកម្ពុជា
អ្នកនាំពាក្យក្រសួងការបរទេសកម្ពុជា បានបញ្ជាក់ប្រាប់វិទ្យុបារាំងអន្តរជាតិ នៅព្រឹកថ្ងៃចន្ទនេះថា រដ្ឋាភិបាលអាល្លឺម៉ង់ មិនបានព្យួរការផ្តល់ទិដ្ឋាការដល់មន្ត្រីជាន់ខ្ពស់រដ្ឋាភិបាលកម្ពុជា និងក្រុមគ្រួសារ ធ្វើដំណើរទៅកាន់ប្រទេសអាល្លឺម៉ង់នោះទេ។ ការបញ្ជាក់នេះ ត្រូវបានធ្វើឡើងបន្ទាប់ពីសារព័ត៌មានភ្នំពេញប៉ុស្តិ៍ បានចេញផ្សាយអត្ថបទមួយនៅថ្ងៃនេះថា អាល្លឺម៉ង់ ព្យួរការផ្តល់ទិដ្ឋាការអនុគ្រោះចំពោះសមាជិករដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០១:៥៩
លោក ជុំ សុន្ទរី អ្នកនាំពាក្យក្រសួងការបរទេសកម្ពុជា បានឲ្យដឹងថា ពុំមានលិខិតផ្លូវការណាមួយពីរដ្ឋាភិបាលអាល្លឺម៉ង់ ជុំវិញការព្យួរទិដ្ឋាការ ចាប់ពីលោកនាយករដ្ឋមន្ត្រីហ៊ុន សែន និងក្រុមគ្រួសារ មន្ត្រីយោធាជាន់ខ្ពស់ និងប្រធានតុលាការកំពូលរបស់កម្ពុជា ដូចការចុះផ្សាយរបស់សារព័ត៌មាន ភ្នំពេញប៉ុស្តិ៍នោះទេ។ តាមលោក ជុំ សុន្ទរី ទំនាក់ទំនងរវាងរដ្ឋាភិបាលកម្ពុជា និងអាល្លឺម៉ង់ ដូចជាពុំមានភាពចម្រូងចម្រាស់អ្វីនោះទេ ក្នុងរយៈពេលចុងក្រោយនេះ។ ហើយក៏ពុំមានការព្រមាន ឬ ការដាក់សម្ពាធណាមួយ ធ្វើឡើងតាមស្ថានទូតអាល្លឺម៉ង់ប្រចាំកម្ពុជា មកដល់ក្រសួងការបរទេស ឬ រដ្ឋាភិបាលកម្ពុជា នោះឡើយ។
ចំណែកអ្នកនាំពាក្យគណបក្សកាន់អំណាច លោក សុខ ឥសាន បានអះអាងដែរថា ប្រសិនបើមានការព្យួរទិដ្ឋាការ មិនឲ្យសមាជិករដ្ឋាភិបាលកម្ពុជា ធ្វើដំណើរទៅកាន់ប្រទេសអាល្លឺម៉ង់មែន ក៏មិនមានផលប៉ះពាល់អ្វីនោះទេ ពីព្រោះថាគ្មានមន្ត្រីណាចង់ទៅលេងប្រទេស ដែលមានស្ថានភាពអាកាសធាតុមិនសូវអំណោយផល បូករួមទាំងសន្តិសុខក្នុងតំបន់ មិនសូវប្រកបដោយសុវត្ថិភាព ហើយមានរួមរឹតដោយអំពើភេរវកម្ម និងឧក្រិដ្ឋកម្មបែបនោះទេ។
សូមបញ្ជាក់ថា នៅព្រឹកនេះ កាសែតភ្នំពេញប៉ុស្តិ៍ បានចេញផ្សាយអត្ថបទវែងអន្លាយមួយ ដោយបញ្ជាក់ថា រដ្ឋាភិបាលអាល្លឺម៉ង់ បានចាត់វិធានការមួយចំនួន ក្នុងរយៈពេលប៉ុន្មានខែនេះ ដើម្បីដាក់សម្ពាធ លើរដ្ឋាភិបាលកម្ពុជា ក្នុងគោលដៅជម្រុញឲ្យកែលម្អបរិយាកាសនយោបាយ ដែលអាល្លឺម៉ង់ ចាត់ទុកថា ជាការរំលាយរបបប្រជាធិបតេយ្យ និងសិទ្ធិមនុស្សក្នុងប្រទេសកម្ពុជា តាមរយៈការរំលាយគណបក្សប្រឆាំងដ៏ធំ ការចាប់ឃុំខ្លួនលោក កឹម សុខា ការផ្អាកសកម្មភាពនយោបាយរបស់មន្ត្រីអតីតបក្សប្រឆាំង និងការរឹតត្បិតសេរីភាពរបស់អង្គការក្រៅរដ្ឋាភិបាល និងអ្នកសារព័ត៌មានមួយចំនួន។
យ៉ាងណាក៏ដោយ ចំពោះអ្នកនាំពាក្យក្រសួងការបរទេសកម្ពុជា មកដល់ពេលនេះ មានតែក្រសួងការបរទេសសហរដ្ឋអាមេរិកមួយគត់ ដែលបានចេញប្រកាសជាផ្លូវការផ្អាកការផ្តល់ទិដ្ឋាការ ដល់មន្ត្រីរដ្ឋាភិបាលកម្ពុជា ក្នុងការធ្វើដំណើរទៅកាន់សហរដ្ឋអាមេរិក។ ប៉ុន្តែបើតាមលោក ជុំ សុន្ទរី ការផ្អាកទិដ្ឋាការរបស់អាមេរិក អាចនឹងត្រូវបញ្ឈប់ក្នុងពេលឆាប់ៗ នៅពេលដែលអនុស្សារណៈកិច្ចសហការ ក្នុងការបញ្ជូនពលរដ្ឋខ្មែរប្រមាណ ១០០នាក់ពីសហរដ្ឋអាមេរិក មកប្រទេសកម្ពុជាវិញ ត្រូវបានបំពេញគ្រប់សព្វ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ