ក្រសួងមហាផ្ទៃ ប្តឹងមន្រ្តីប្រាំរូបនៃចលនាសង្រ្គោះជាតិ ពីបទធ្វើសកម្មភាពនយោបាយខុសច្បាប់
ក្រសួងមហាផ្ទៃ កាលពីថ្ងៃទី ១៤ កុម្ភៈ បានសម្រេចដាក់ពាក្យប្តឹង មន្រ្តីសំខាន់ប្រាំរូបនៃចលនាសង្រ្គោះជាតិ ដែលបច្ចុប្បន្នកំពុងស្ថិតនៅក្រៅប្រទេស ពីបទធ្វើសកម្មភាពនយោបាយខុសច្បាប់។ យ៉ាងណាក៏ដោយ លោក អេង ឆៃអ៊ាង ដែលអះអាងថាជាសហស្ថាបនិកមួយរូបនៃចលនាសង្រ្គោះជាតិ ថាលោក មិនខ្វាយខ្វល់ចំពោះចំណាត់ការនេះឡើយ និងថាចលនាសង្រ្គោះជាតិ នឹងនៅតែបន្តសកម្មភាពតស៊ូដោយអហិង្សាពីក្រៅប្រទេស ដើម្បីឲ្យសហគមន៍អន្តរជាតិដាក់សម្ពាធលើរដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០២:២៣
អ្នកនាំពាក្យក្រសួងមហាផ្ទៃ លោក ខៀវ សុភ័គ បានអះអាងថា ក្រសួងមហាផ្ទៃ កាលពីពេលថ្មីៗនេះបានដាក់ពាក្យបណ្តឹងទៅសាលាដំបូងរាជធានីភ្នំពេញ ប្តឹងមន្រ្តីជាន់ខ្ពស់នៃចលនាសង្គ្រោះជាតិដែលកំពុងធ្វើសកម្មភាពនៅខាងក្រៅប្រទេស ពីបទធ្វើសកម្មភាពនយោបាយដោយខុសច្បាប់។ ទោះបីជាយ៉ាងណាក៏ដោយ ឈ្មោះមន្រ្តីសំខាន់ៗទាំង៥រូប នៃចលនាសង្រ្គោះជាតិនេះ មិនទាន់ត្រូវបានបង្ហើបឲ្យដឹងនោះទេ។
ពាក់ព័ន្ធនឹងការដាក់ពាក្យប្តឹងមន្រ្តីជាន់ខ្ពស់នៃចលនាសង្រ្គោះជាតិនាពេលនេះ លោក អេង ឆៃអ៊ាង សហស្ថាបនិកនៃចលនាសង្រ្គោះជាតិ បានបញ្ជាក់ប្រាប់វិទ្យុបារាំង នៅព្រឹកថ្ងៃទី ១៥ កុម្ភៈ នេះថា លោក មិនចាប់អារម្មណ៍ចំពោះចំណាត់ការនេះឡើយ មិនភ្ញាក់ផ្អើល ហើយក៏មិនចាប់អារម្មណ៍ដែរ។ មិនចាប់អារម្មណ៍ និងមិនភ្ញាក់ផ្អើល ព្រោះថានេះ មិនមែនជាលើកទីមួយទេ ដែលរដ្ឋាភិបាលកម្ពុជា ចាត់វិធានការមកលើអតីតគណបក្សប្រឆាំងធំជាងគេនៅកម្ពុជា។ នេះបើតាមលោក អេង ឆៃអ៊ាង។
លោក អេង ឆៃអ៊ាង បន្ថែមថា ចាប់តាំងពីការចាប់ខ្លួន លោក កឹម សុខា អតីតប្រធានគណបក្សប្រឆាំង ការរំលាយគណបក្សសង្រ្គោះជាតិ និងការកាត់សិទ្ធិធ្វើនយោបាយរយៈពេល ៥ ឆ្នាំទៀត មិនឲ្យមន្រ្តីជាន់ខ្ពស់នៃបក្សនេះ ចំនួន ១១៨នាក់ មក អ្នកគាំទ្រ សមាជិក រួមទាំងមន្រ្តីជាន់ខ្ពស់អតីតគណបក្សសង្រ្គោះជាតិ ក៏តែងតែត្រូវរងការគំរាមកំហែងជាបន្តបន្ទាប់។
ជាការកត់សម្គាល់ ក្រោយការរំលាយគណបក្សប្រឆាំង តំណាងរាស្ត្រ និងមន្រ្តីជាន់ខ្ពស់គណបក្សនេះ បានរត់ភៀសខ្លួនទៅបរទេស និងបានចូលរួមបង្កើតចលនាសង្គ្រោះជាតិជាមួយលោកសម រង្ស៊ី ដែលជាអតីតប្រធានគណបក្សប្រឆាំងមួយរូប ក្នុងគោលបំណងទាមទារឲ្យមានការដោះលែងលោក កឹម សុខា។ និងទាមទារឲ្យអតីតគណបក្សប្រឆាំងនេះ អាចចូលរួមការបោះឆ្នោត ក្នុងឆ្នាំ២០១៨ នេះ ប្រកបដោយសេរី ត្រឹមត្រូវ និងយុត្តិធម៌។
រដ្ឋាភិបាលកម្ពុជា កាលពីថ្មីៗនេះ បានអះអាងថានឹងប្តឹងទៅតុលាការឲ្យចាត់វិធានការលើអ្នកនយោបាយអតីតគណបក្សសង្រ្គោះជាតិ និងមន្រ្តីអង្គការសង្គមស៊ីវិលខ្លះ ដែលចូលរួមចលនាសង្រ្គោះជាតិ។ ចលនាសង្រ្គោះជាតិ ដែលត្រូវបាន លោក សម រង្ស៊ី បង្កើតជាផ្លូវការនៅថ្ងៃទី២៩ខែមករា ពីទីក្រុងឡុងប៊ិច រដ្ឋកាលីហ្វញ៉ា សហរដ្ឋអាមេរិក។ រដ្ឋាភិបាលកម្ពុជា បានចាត់ទុកចលនាថ្មីនេះថា ជាពួកឧទ្ទាមក្រៅច្បាប់ ប៉ុន្តែ លោក សម រង្ស៊ី បានគូសបញ្ជាក់ថា ចលនាសង្រ្គោះជាតិនេះ មិនចាំបាច់ចុះឈ្មោះនៅក្រសួងមហាផ្ទៃនោះទេ ហើយក៏គ្មាននរណាអាចរំលាយបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ