អាជ្ញាធរកម្ពុជាច្រានចោលរបាយការណ៍ ស្វែងរកចាប់ខ្លួនជនភៀសខ្លួនម៉ុងតាញ៉ា
អ្នកនាំពាក្យក្រសួងមហាផ្ទៃ លោក ខៀវ សុភ័ក្រ បានច្រានចោលព័ត៌មាននៃការស្វែងរកចាប់ខ្លួន ជនជាតិភាគតិចម៉ុងតាញ៉ាចំនួន១៣នាក់ និង បញ្ជូនត្រលប់ទៅកាន់ប្រទេសវៀតណាម។ ឧត្តមស្នងការជាន់ខ្ពស់ទទួលបន្ទុកជនភៀសខ្លួននៃអង្គការសហប្រជាជាតិ UNHCR ទើបបានចេញសេចក្តីថ្លែងការណ៍មួយ សំដែងការព្រួយបារម្ភពីការតាមចាប់ខ្លួនជនជាតិភាគតិចម៉ុងតាញ៉ាដែលបានរត់ភៀសខ្លួនមកប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
គ្មានការស្វែងរកចាប់បញ្ជូនខ្លួនជនជាតិម៉ុងតាញ៉ាទៅកាន់ប្រទេសវៀតណាមនោះទេ។ នេះគឺជាការអះអាងរបស់លោក ខៀវ សុភ័ក្រ អ្នកនាំពាក្យក្រសួងមហាផ្ទៃនៅថ្ងៃទី៣ខែធ្នូឆ្នាំ២០១៤នេះ។ ការអះអាងបែបនេះ គឺដើម្បីឆ្លើយតបទៅនឹងសេចក្តីថ្លែងការណ៍របស់ឧត្តមស្នងការជាន់ខ្ពស់អង្គការសហប្រជាជាតិទទួលបន្ទុកជនភៀសខ្លួន UNHCR ដោយបានបង្ហាញការព្រួយបារម្ភយ៉ាងខ្លាំង ពីដំណឹងនៃការតាមចាប់ខ្លួន ជនភៀសខ្លួនម៉ុងតាញ៉ា១៣នាក់ ដែលកំពុងលាក់ខ្លួននៅក្នុងខេត្តរតនគីរី។ ប៉ុន្តែលោក ខៀវ សុភ័ក្រ អ្នកនាំពាក្យក្រសួងមហាផ្ទៃ និងលោក ងួន គឿន ស្នងការនគរបាលខេត្តរតនគីរី បានច្រានចោល ចំពោះព័ត៌មាននេះ ហើយថា គ្មានជនជាតិម៉ុងតាញ៉ានៅលើទឹកដីកម្ពុជានោះទេ។
បើតាមមន្ត្រីសិទ្ធិមនុស្សលីកាដូប្រចាំខេត្តរតនគីរី គេបានដឹងព័ត៌មាននៃការមកដល់របស់ជនជាតិភាគតិចម៉ុងតាញ៉ាចំនួន១៣នាក់ ហើយពួកគេកំពុងលាក់ខ្លួននៅក្នុងព្រៃមួយ នៅចន្លោះភូមិឡុំ ឃុំប៉ក់ញ៉ៃ ខេត្តរតនគីរី និងភូមិទេន ឃុំយ៉ាទុង ខេត្តយ៉ាឡាយប្រទេសវៀតណាម។
លោក សុវណ្ណ ប៊ុនថៃ អ្នកឃ្លាំមើលការរំលោភសិទ្ធិមនុស្សលីកាដូប្រចាំខេត្តភាគឦសានមួយនេះ បានអោយដឹងថា មានអ្នកភូមិជនជាតិចារ៉ាយនៅខេត្តរតនគីរី បានរាយការណ៍ពីវត្តមានរបស់ជនជាតិភាគតិចភ្នំម៉ុងតាញ៉ា មកកាន់ខេត្តរតនគីរី កាលពីចុងខែតុលា ដើម្បីគេចចេញពីការធ្វើទុក្ខបុកម្និញរបស់អាជ្ញាធរវៀតណាមទៅ លើសិទ្ធិសេរីភាពខាងសាសនា និងនយោបាយ។ ប៉ុន្តែពួកគេកំពុងលាក់ខ្លួននៅក្នុងព្រៃ។
នៅក្នុងសេចក្តីថ្លែងការណ៍របស់ឧត្តមស្នងការជាន់ខ្ពស់អង្គការសហប្រជាជាតិទទួលបន្ទុកជនភៀសខ្លួន UNHCR ដែលបានចេញផ្សាយពីទីក្រុងហ្សឺណែវ ប្រទេសស្វ៊ីស កាលពីថ្ងៃទី២ធ្នូ អង្គការUNHCR បានសំដែងការព្រួយបារម្ភយ៉ាងខ្លាំង ចំពោះសេចក្តីរាយការណ៍ដែលថា អាជ្ញាធរកម្ពុជាកំពុងតែស្វែងរកចាប់ខ្លួនជនជាតិម៉ុងតាញ៉ា១៣នាក់ នៅក្នុងប្រទេសកម្ពុជា។ UNHCR ក៏បានសរសេរលិខិតទៅកាន់ក្រសួងមហាផ្ទៃដើម្បីជួយដល់ជនជាតិភាគតិចទាំង១៣នាក់ ហើយថា រដ្ឋាភិបាលកម្ពុជា និងUNHCR គួរតែធ្វើការរួមគ្នា ដើម្បីជួយដល់ជនភៀសខ្លួនទាំងនោះ និងទទួលស្គាល់ថា ពួកគេគឺជាជនភៀសខ្លួន ដែលត្រូវបានការពារដោយច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ