ព្រះសង្ឃវត្តសាមគ្គីរង្សី ប្រតិកម្មនឹងអ្នកនាំពាក្យសាលារាជធានីភ្នំពេញ
ព្រះសង្ឃគង់នៅវត្តសាមគ្គីរង្សី ដែលជាវត្តព្រះសង្ឃខ្មែរកម្ពុជាក្រោម ស្ថិតនៅសង្កាត់ស្ទឹងមានជ័យ ក្នុងរាជធានីភ្នំពេញ បានចេញប្រតិកម្ម តបនឹងអ្នកនាំពាក្យសាលារាជធានីភ្នំពេញ លោកឡុង ឌីម៉ង់។ លោកឡុង ឌីម៉ង់ ដែលបានលើកឡើងថា វត្តសាមគ្គរង្សី មិនសហការជាមួយអាជ្ញាធរដែនដី អនុញ្ញាតឲ្យប្រជាពលរដ្ឋ អ្នកធ្វើបាតុកម្ម រស់នៅក្នុងវត្តអារាម និងមានព្រះសង្ឃនៅក្នុងវត្តនោះ ចូលរួមក្នុងបាតុកម្ម ឬកូដកម្មផ្សេង។ ប៉ុន្តែតាមព្រះសង្ឃវត្តសាមគ្គីរង្សី ការលើកឡើងរបស់អ្នកនាំពាក្យនេះ មិនអាចទទួលយកបានទេ។
ចុះផ្សាយនៅថ្ងៃ៖
ស្តាប់ - ០២:០៤
ប្រតិកម្មរបស់ព្រះសង្ឃវត្តសាមគ្គីរង្សី បានធ្វើឡើង តាមរយៈសេចក្តីប្រកាសព័ត៌មាន ចុះថ្ងៃទី២កុម្ភៈ។ ព្រះសង្ឃ មិនជំទាស់នឹងអាជ្ញាធរ ដែលចង់បង្កើតគណៈកម្មការ ដើម្បីត្រួតពិនិត្យរដ្ឋបាល នៅវត្តសាមគ្គីរង្សី ព្រោះជាតួនាទីរបស់សមត្ថកិច្ចគ្រប់លំដាប់ថ្នាក់ ដើម្បីរក្សានូវសន្តិសុខ និងសណ្តាប់ធ្នាប់សង្គម។
ប៉ុន្តែករណីដែលអ្នកនាំពាក្យសាលារាជធានីភ្នំពេញ លោកឡុង ឌីម៉ង់ បានផ្តល់បទសម្ភាសន៍ជូនប្រព័ន្ធផ្សព្វផ្សាយ ត្រូវបានព្រះសង្ឃចាត់ទុកជាការចោទប្រកាន់លើវត្តសាមគ្គីរង្សី ដែលធ្វើឲ្យប៉ះពាល់យ៉ាងធ្ងន់ធ្ងរ មកលើកិត្តិយសរបស់វត្ត។ ព្រះសង្ឃ និងពុទ្ធបរិស័ទវត្តសាមគ្គីរង្សី អះអាងថា មិនអាចទទួលយកបានទេ។
ក្នុងសេចក្តីប្រកាសព័ត៌មាន ព្រះសង្ឃវត្តសាមគ្គីរង្សី បានស្រង់សម្តីលោកឡុង ឌីម៉ង់ ដែលបានផ្តល់បទសម្ភាសន៍តាមប្រព័ន្ធផ្សព្វផ្សាយ មានជាអាទិ៍ថា វត្តសាមគ្គីរង្សី មិនសហការជាមួយនឹងអាជ្ញាធរដែនដី អនុញ្ញាតឲ្យប្រជាពលរដ្ឋរស់នៅក្នុងវត្តអារាម ដែលប្រជាពលរដ្ឋទាំងនោះ តែងតែចេញពីវត្តនេះ ទៅធ្វើបាតុកម្ម ឬកូដកម្ម ព្រះសង្ឃបានធ្វើសកម្មភាពដុតរថយន្តរបស់រដ្ឋ ព្រះសង្ឃនៅក្នុងវត្តសាមគ្គីរង្សី តែងតែចូលរួមក្នុងបាតុកម្ម និងកូដកម្មផ្សេងៗ និងមានព្រះសង្ឃប្រព្រឹត្តអំពើហិង្សា ជាដើម។
ក្នុងលិខិត ព្រះសង្ឃវត្តសាមគ្គីរង្សី បានទាមទារឲ្យអ្នកនាំពាក្យ បង្ហាញភស្តុតាង ហើយថា ការចូលរួមធ្វើបាតុកម្ម ឬកូដកម្ម ជាសិទ្ធិរបស់ប្រជាពលរដ្ឋ និងព្រះសង្ឃ ដែលមានកំណត់ក្នុងរដ្ឋធម្មនុញ្ញ។ ម្យ៉ាងទៀត វត្តអារាម ជាទីស្នាក់អាស្រ័យរបស់ប្រជាពលរដ្ឋ រងគ្រោះដោយបញ្ហាដីធ្លី មកពីតាមបណ្តាខេត្តនានា។
លោកឡុង ឌីម៉ង់ អ្នកនាំពាក្យសាលារាជធានីភ្នំពេញ ចាត់ទុកសេចក្តីប្រកាសខាងលើ ជាសិទ្ធិរបស់ព្រះសង្ឃ។ រីឯអាជ្ញាធរ បានប្រជុំត្រៀមលក្ខណៈរួចហើយ ដើម្បីចុះទៅធ្វើរដ្ឋបាល ត្រួតពិនិត្យនៅវត្តសាមគ្គីរង្សី តែរហូតដល់ថ្ងៃនេះ លោកឡុងឌីម៉ង់ បញ្ជាក់ថា អាជ្ញាធរ មិនទាន់កំណត់ថ្ងៃចុះទៅត្រួតពិនិត្យវត្តខ្មែរកម្ពុជាក្រោមនោះនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ