កម្មកររោងចក្រMV 80% ធ្វើកូដកម្មទាមទារប្រាក់បាយថ្ងៃត្រង់
កម្មកររោងចក្រកាត់ដេរ MV (អឺម វេ) សង្កាត់ចាក់អង្រែក្រោម នៅព្រឹកថ្ងៃចន្ទ ទី០៨មិថុនានេះ បាននាំគ្នាដើរដង្ហែរក្បួនកូដកម្មជាថ្មី យកញ្ញត្តិទៅដាក់នៅក្រសួងការងារ។ ជាញ្ញត្តិ ដើម្បីស្នើឲ្យក្រសួងរកដំណោះស្រាយ ជុំវិញបញ្ហាការងារ ដែលពួកគាត់កំពុងទាមទារ។ កម្មករប្រមាណ ៨០ភាគរយ ក្នុងរោងចក្រនេះ បាននាំគ្នាធ្វើកូដកម្ម ទាមទារលក្ខខណ្ឌ ១០ចំនុច ដែលក្នុងនោះប្រាក់បាយថ្ងៃត្រង់ គឺជាចំនុចសំខាន់ជាងគេ។
ចុះផ្សាយនៅថ្ងៃ៖
ស្តាប់ - ០១:៥៨
នេះគឺជាសប្តាហ៍ទី៣ហើយ ដែលក្រុមកម្មកររោងចក្រកាត់ដេរ MV បាននាំគ្នាធ្វើកូដកម្ម ទាមទារលក្ខខណ្ឌការងារចំនួន ១០ចំណុច ពីរោងចក្រ។ កូដកម្មរយៈពេល ៣សប្តាហ៍នេះ គឺកម្មករគ្រាន់តែអង្គុយ លើកបដា នៅមុខរោងចក្រ មិនចូលធ្វើការ ហើយពេលខ្លះ ពួកគេបាននាំគ្នាហែរក្បួន យកញ្ញត្តិទៅដាក់នៅតាមស្ថាប័នកំពូលផ្សេងៗ។ តួយ៉ាង នៅថ្ងៃទី ០៨មិថុនានេះ ពួកគេក៏បានដើរថ្មើរជើង ពីសង្កាត់ចាក់អង្រែក្រោម ដើម្បីយកញ្ញត្តិ មកដាក់នៅក្រសួងការងារ។
លោកសោម អូន ប្រធានក្រុមប្រឹក្សាសហជីពជាតិកម្ពុជា បានប្រាប់វិទ្យុបារាំងអន្តរជាតិថា ក្នុងលក្ខខណ្ឌ ១០ចំណុចនោះ គឺក្រុមកម្មករប្រមាណជា ៨០ភាគរយ នៃចំនួនកម្មករសរុប ៣ពាន់នាក់ ក្នុងរោងចក្រ MV បានទាមទារឲ្យរោងចក្រ ផ្តល់ប្រាក់បាយថ្ងៃត្រង់ តម្លៃ ២ពាន់រៀលរៀងរាល់ថ្ងៃ ដល់កម្មករ។ លោកសោម អូន បានបញ្ជាក់ថា លក្ខខណ្ឌនេះ មិនមានក្នុងច្បាប់ការងារនោះទេ ប៉ុន្តែនេះជាទម្លាប់ ដែលរោងចក្រជាច្រើន បានអនុវត្តរួចមកហើយ។ ក្នុងនោះ កម្មករ ក៏បានទាមទារសុំផ្តាច់កិច្ចសន្យា សម្រាប់កម្មករ ដែលមានអាយុច្រើននិងសុំតំលៃឡូដ៍ ទៅតាមពលកម្ម ដែលកម្មករ បានធ្វើការថែមម៉ោង។
តាមលោកសោម អូន នៅព្រឹកថ្ងៃចន្ទនេះ ក្រសួងការងារ បានទទួលយកញ្ញត្តិរបស់ក្រុមកម្មករ ហើយសន្យានឹងបើកការពិភាក្សាជាមួយភាគីរោងចក្រ និងតំណាងសហជីព ក្នុងពេលឆាប់ៗ។ យ៉ាងណាក៏ដោយ ក្រុមកម្មករ នៅមិនទាន់បញ្ជាក់ថានឹងបញ្ឃប់សកម្មភាពកូដកម្មរបស់ខ្លួនសិន ឬយ៉ាងណានោះទេ។ ប៉ុន្តែបើតាមលោកសោម អូន កម្មករនឹងបន្តធ្វើកូដកម្មឡើងវិញ ប្រសិនបើមិនមានដំណោះស្រាយសមរម្យណាមួយ។
នៅព្រឹកថ្ងៃចន្ទនេះ ក្រុមសមត្ថកិច្ច បានឃាត់ក្បួនរបស់ក្រុមកម្មករ នៅគល់ស្ពានក្បាលថ្នល់។ ប៉ុន្តែជាការឃាត់ ដើម្បីជួយសម្របសម្រួល រករថយន្តឲ្យកម្មករជិះមកក្រសួងការងារវិញ កុំឲ្យពួកគេដើរតាមផ្លូវឆ្ងាយ ដែលអាចបង្កឲ្យមានភាពរញ៉េរញ៉ៃលើដងផ្លូវ។
គួរជម្រាបជូនថា រោងចក្រកាត់ដេរ MV ដែលមានទីតាំងនៅសង្កាត់ចាក់អង្រែក្រោម មានសហជីពកម្មករចំនួន៤ ប៉ុន្តែការធ្វើកូដកម្មនៅពេលនេះ គឺមានសហជីពចូលរួមក្នុងរោងចក្រចំនួន ៣ និង ៥ទៀត ជាសហព័ន្ធ សហជីព ពីខាងក្រៅ។ ដោយឡែកចំពោះសហជីពមួយទៀត ដែលជាបណ្តាញរបស់សហជីពលោកអាត់ ធន់ គឺមិនបានចូលរួមនោះទេ។ តាមលោកអាត់ ធន់ ខាងក្រុមសហជីពរបស់លោក អាចទទួលយកលក្ខខណ្ឌការងារ ដែលកំពុងតែអនុវត្តនាពេលបច្ចុប្បន្ននេះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ