លោកហ៊ុន សែន យកវេទិការដ្ឋសភាពន្យល់ពីមូលហេតុនៃវិសោធនកម្មបទបញ្ជាផ្ទៃក្នុងរដ្ឋសភានៅថ្ងៃនេះ
រដ្ឋសភាជាតិនៅថ្ងៃនេះ បានអនុម័តទាំងស្រុងលើសំណើសុំធ្វើវិសោធនកម្មបទបញ្ជាផ្ទៃក្នុងនៃរដ្ឋសភា ពីប្រការ ៤៨ថ្មី (៣) ទៅ ៤៨ថ្មី (៤) ដែលស្មើនឹងការលុបចោលតំណែងប្រធានក្រុមមតិភាគតិចនៃរដ្ឋសភារបស់លោកកឹម សុខា ដែលមានឋានៈស្មើនាយករដ្ឋមន្រ្តី។ នៅក្នុងកិច្ចប្រជុំសភានៅថ្ងៃនេះ លោកនាយករដ្ឋមន្រ្តី ហ៊ុន សែន បានយកវេទិការដ្ឋសភាស្ទើរតែទាំងអស់ ដើម្បីពន្យល់ផងព្រមានផងទៅលើគណបក្សប្រឆាំង ដែលមិនបានចូលរួមប្រជុំសភានៅថ្ងៃនេះ។
ចុះផ្សាយនៅថ្ងៃ៖
ស្តាប់ - ០២:៤០
ក្រោយពីទទួលបានភ្លើងខៀវពីប្រធានរដ្ឋសភា លោក ហេង សំរិន និងក្រោយពីការឡើងថ្លែងរបស់ លោក ប៉ែន បញ្ញា ក្នុងនាមជាប្រធានគណៈកម្មាការនីតិកម្មនិងយុត្តិធម៌នៃរដ្ឋសភាមកលោកនាយករដ្ឋមន្រ្តី ហ៊ុន សែន បានយកពេលវេលាប្រមាណជា ៤៥នាទី ដើម្បីពន្យល់ជុំវិញមូលហេតុដែលនាំទៅដល់ការធ្វើវិសោធនកម្មបទបញ្ជាផ្ទៃក្នុងនៃរដ្ឋសភា នៅថ្ងៃនេះ ដោយមិនមានការចូលរួមពីសមាជិកសភាគណបក្សសង្រ្គោះជាតិនោះទេ។
លោក ហ៊ុន សែន ស្ថិតក្នុងជំហររឹងប៉ឹង និងប្រកបដោយទឹកមុខម៉ឺងម៉ាត់ បានលើកឡើងពីមូលហេតុយ៉ាងតិចចំនួន ៥ ដែលនាំទៅដល់ការធ្វើវិសោធនកម្មបទបញ្ជាផ្ទៃក្នុងនៃរដ្ឋសភានៅថ្ងៃនេះ តែអ្វីដែលជាមូលហេតុសំខាន់ជាងគេនោះ វិសោធនកម្មនេះ គឺដើម្បីបិទបញ្ចប់ការប៉ុនប៉ងរបស់គណបក្សប្រឆាំងក្នុងការប្រើប្រាស់យន្តការសភានេះ ដើម្បីចរចាដោះលែងអ្នកទោសដែលជាសកម្មជនគណបក្សប្រឆាំង មន្រ្តីអង្គការសិទ្ធិមនុស្សអាដហុក, មន្រ្តី គ.ជ.ប និងសកម្មជនដីធ្លីនៅតំបន់បឹងកក់ផង។
ជាមួយនឹងពាក្យសំដីខ្លាំងៗ ដែលជាទម្លាប់របស់លោកនោះ លោក ហ៊ុន សែន បានព្រមានផង និងពន្យល់ផងថា លោកមិនអាចយកយន្តការនេះដើម្បីទៅរំលោភអំណាចតុលាការនោះទេ។ ប៉ុន្តែលោកបានទុកលទ្ធភាពមួយថា នឹងពិចារណាលើកលែងទោសដល់សកម្មជនដីធ្លីនៅតំបន់បឹងកក់ និងអ្នកទោសដែលមានស្ថានទម្ងន់ទោសស្រាលៗមួយចំនួនទៀត នៅពេលដែលតុលាការបញ្ចប់នីតិវិធីរបស់ខ្លួន។ ប៉ុន្តែលោកបានថ្លែងបិទផ្លូវរបស់សមាជិកព្រឹទ្ធសភាគណបក្សសម រង្ស៊ី លោក ហុង សុខហួរ និងសមាជិកសភាគណបក្សប្រឆាំងលោក អ៊ុំ សំអាន ថា មិនអាចលើកលែងទោសឲ្យបានទេ។
ម្តងហើយម្តងទៀត លោកនាយករដ្ឋមន្រ្តី ហ៊ុន សែន បានទទូចសុំការអនុញ្ញាតពីប្រធានរដ្ឋសភាលោក ហេង សំរិន ដើម្បីថ្លែងបន្ត នៅពេលដែលលោក ហេង សំរិន បានគោះតុជាសញ្ញាប្រាប់ថា ជិតអស់ម៉ោងក្នុងការឡើងថ្លែងរបស់សមាជិកសភាម្នាក់ ដែលមានត្រឹមតែ ២០នាទីនោះ។ ក៏ប៉ុន្តែលោកនាយករដ្ឋមន្រ្តី បានថ្លែងបន្ត ដោយលើកឡើងពីដំណើរដើមទង និងការសន្ទនារវាងលោក និងលោក កឹម សុខា មុនគ្រាត្រូវរ៉ូវគ្នាកាលពីខែតុលា ដែលឈានទៅដល់ការលើកលែងទោសលោកមេឃុំ ស៊ាង ចែត មកពីគណបក្សសមរង្ស៊ី និងលោក កឹម សុខា ផ្ទាល់។ លោក ហ៊ុន សែន បានព្រមានបញ្ចេញឯកសាររបស់លោក សម រង្ស៊ី និងឯកសាររបស់លោក កឹម សុខា ដែលលោកបានសេវ ឬរក្សាទុកដោយឡែកៗពីគ្នា និងថែមទាំងបានបបួលលោក កឹម សុខា ទៅស្បថថែមទៀត។
កិច្ចប្រជុំរដ្ឋសភាបានបញ្ចប់ទៅនៅប្រមាណជាម៉ោង ៩និង ២០នាទី ក្រោយពីសមាជិករដ្ឋសភាចំនួន ៦៧រូប មកតែពីគណបក្សប្រជាជនកម្ពុជាបានអនុម័តដោយការលើកដៃលើវិសោធនកម្មបទបញ្ជាផ្ទៃក្នុងនៃរដ្ឋសភានេះ។ សូមបញ្ជាក់ថា ចាប់តាំងពីឆ្នាំ ១៩៩៣មក បទបញ្ជាផ្ទៃក្នុងនៃរដ្ឋសភា ត្រូវបានស្នើធ្វើវិសោធនកម្មចំនួន ១០លើករួចមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ