លោក យ៉ង សាំងកុមារ ថាថវិកាជាតិកើនឡើងគួរតែដក២០០លានដុល្លារជួយសង្គ្រោះតម្លៃស្រូវរបស់កសិករ
ស្របពេលដែលនៅថ្ងៃនេះ សភាជាតិដែលជាសមាជិកជាគណបក្សប្រជាជនកម្ពុជា បានអនុម័តច្បាប់ថវិកាជាតិសម្រាប់រដ្ឋចាយនៅឆ្នាំ២០២០ចំនួនជាង៨០០០លានដុល្លារ និងមានគម្រោងខ្ចីបន្ថែមចំនួន១៩០០លានដុល្លារនោះ អ្នកនយោបាយនៅក្រៅរដ្ឋាភិបាលបានចោទសួរថា ហេតុអ្វីរដ្ឋាភិបាលមិនប្រើថវិកាជាតិតែ២០០លានដុល្លារដើម្បីជួយសង្គ្រោះកសិករ និងវិស័យស្រូវអង្ករ? ការលើកឡើងរបស់ប្រធានគណបក្សប្រជាធិបតេយ្យមូលដ្ឋានបែបនេះគឺស្របពេលដែលកសិករមួយចំនួនកំពុងត្អូញត្អែរពីតម្លៃស្រូវធ្លាក់ថ្លៃក្នុងរដូវប្រមូលផលឆ្នាំនេះ ដែលកើតឡើងដូចរៀងរាល់ឆ្នាំដែរ។
ចុះផ្សាយនៅថ្ងៃ៖
ស្តាប់ - ០២:០៤
គឺតាមរយៈហ្វេសប៊ុកផ្លូវការ លោកបណ្ឌិត យ៉ង សាំងកុមារ បានបញ្ជាក់ថា កសិករកំពុងលំបាករឿងស្រូវចុះថោកនិងអត់សូវមានអ្នកទិញ ហេតុអ្វីបានជាមិនប្រើថវិកាជាតិខ្លះ (តែ ២០០ លានដុល្លារក៏បានដែរ) ដើម្បីជួយសង្គ្រោះកសិករនិងវិស័យស្រូវអង្ករផង? ការចោទសួររបស់ប្រធានគណបក្សនៅក្រៅរដ្ឋាភិបាលបែបនេះ គឺស្របពេលដែលរដ្ឋសភាដែលជាសមាជិកជាគណបក្សប្រជាជនកម្ពុជាបានអនុម័តទាំងស្រុងលើសេចក្តីព្រាងច្បាប់ថវិកាជាតិសម្រាប់ចំណាយនៅឆ្នាំ២០២០ដែលគ្រោងរហូតដល់ជាង៨ពាន់លានដុល្លារ កើនលើសឆ្នាំ២០១៩ដែលមាន៦៧០០ លានដុល្លារ។ ការបង្កើនថវិកាជាតិនៅឆ្នាំក្រោយនេះ ក៏មានគម្រោងខ្ចីចំនួន១៩០០លានដុល្លារថែមទៀត។
កាលពីប៉ុន្មានថ្ងៃមុននេះ លោក យ៉ង សាំងកុមារ ជាអតីតប្រធានអង្គការសិកម្មមួយហៅកាត់ថា សេដាក បានលើកឡើងថា «តម្លៃស្រូវចុះថោក មិនសូវមានអ្នកទិញ តែរដ្ឋាភិបាលដឹកនាំដោយគណបក្សប្រជាជនដូចជាទុកឲ្យទីផ្សារសេរីជាអ្នកសម្រេចជោគវាសនាកសិករ»។
ដោយឡែករដ្ឋាភិបាលថៃបានត្រៀមវិធានការនយោបាយជាច្រើនដើម្បីលូកដៃចូលទីផ្សារ ដោយលើកស្ទួយសហករណ៍នៅប្រទេសថៃឲ្យកសិករមានទីផ្សារនិងលក់ស្រូវបានថ្លៃ។ វិធានការទាំងនោះរួមមាន ឲ្យកសិករស្តុកស្រូវទុកដោយរដ្ឋឧបត្ថម្ភប្រាក់១០០០ទៅ១៥០០បាតក្នុងស្រូវ១តោន។ ជាងនេះទៀត គឺផ្តល់កម្ចីដល់កសិករដើម្បីកែច្នៃស្រូវទៅជាផលិតផលផ្សេងទៀតដោយការប្រាក់តែ ១ ភាគរយក្នុងមួយឆ្នាំពីកសិករហើយរដ្ឋបង់ជំនួស៣ភាគរយក្នុងមួយឆ្នាំ។ នេះបើតាមលោក យ៉ង សាំងកុមារ។
សូមបញ្ចាក់ថា នៅឆ្នាំ២០១៩នេះតម្លៃស្រូវនៅតាមខេត្តមួយចំនួននៅតែមានការធ្លាក់ថ្លៃបន្តិច ខណៈរដូវកាលប្រមូលផលចូលមកដល់ ដែលជាធម្មតាតម្លៃស្រូវខុសគ្នាទៅតាមប្រភេទស្រូវ តែជាមធ្យមក្នុងមួយគីឡូក្រាមក្នុងរង្វង់១០០០រៀល។ ប៉ុន្តែនៅក្នុងរដូវប្រមូលផលនេះ ស្រូវក្នុងមួយគីឡូក្រាមមានតម្លៃក្រោមមួយពាន់រៀលចំពោះស្រូវរបស់កសិករទូទៅ ប៉ុន្តែចំពោះកសិករជាសមាជិកសហគមន៍គឺលក់បានតម្លៃជាង១០០០រៀលក្នុងមួយគីឡូក្រាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ