គ.ជ.ប មានកម្មវិធីចុះឈ្មោះបោះឆ្នោតដល់ផ្ទះ ខណៈថ្ងៃដំបូងនៃដំណើរការចុះឈ្មោះ ឆ្នាំ២០១៨ ស្ងប់ស្ងាត់
ការិយាល័យចុះឈ្មោះបោះឆ្នោត ស្ថិតនៅឃុំ-សង្កាត់ ជិត២ពាន់ បានបើកដំណើរការចុះឈ្មោះបោះឆ្នោតហើយ ចាប់ពីថ្ងៃទី១ដល់ថ្ងៃទី១៨តុលា។ អ្វីជាការកត់សម្គាល់ក្រៅពីតម្រូវឲ្យពលរដ្ឋអញ្ជើញទៅចុះឈ្មោះនៅសាលាឃុំ-សង្កាត់ មន្ត្រីគណៈកម្មាធិការជាតិរៀបចំការបោះឆ្នោត(គ.ជ.ប)ក៏ធ្វើដំណើរទៅតាមភូមិ ដើម្បីទទួលចុះឈ្មោះពលរដ្ឋដល់ផ្ទះផងដែរ។ ដោយឡែក អ្នកនាំពាក្យគ.ជ.បឲ្យដឹងថាដំណើរការចុះឈ្មោះបោះឆ្នោតឆ្នាំ២០១៨ នៅថ្ងៃដំបូងមានស្ថានភាពស្ងប់ស្ងាត់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
សេចក្តីប្រកាសរបស់ គ.ជ.ប ឲ្យដឹងថា រយៈពេល៥ថ្ងៃដំបូងក្នុងអំឡុងពេល១៨ថ្ងៃ ដំណើរការចុះឈ្មោះបោះឆ្នោតថ្មី ដែលមានពលរដ្ឋជិតកន្លះលាននាក់នេះ គឺត្រូវបានធ្វើឡើងនៅ សាលាឃុំ-សង្កាត់ ។ ហើយ៩ថ្ងៃក្រោយមកទៀត ទើបមន្ត្រី.គ.ជ.ប អញ្ជើញទៅចុះឈ្មោះពលរដ្ឋ ដល់ក្នុងភូមិ និង៤ថ្ងៃចុងក្រោយត្រឡប់មកចុះឈ្មោះនៅសាលាឃុំ-សង្កាត់ វិញ។
អ្នកនាំពាក្យគណៈកម្មការជាតិរៀបចំការបោះឆ្នោត លោក ហង្ស ពុទ្ធា ថ្លែងនៅថ្ងៃទី២តុលានេះថា ដំណើរការចុះឈ្មោះបោះឆ្នោតថ្ងៃដំបូង គឺថ្ងៃទី១ ខែតុលាម្សិលមិញ មានសភាពស្ងប់ស្ងាត់បន្តិច ដោយសារតែពេលវេលានេះជារដូវវស្សា និងជាឱកាសនៃការកាន់បិណ្ឌ។ តែ គ.ជ.ប រំពឹងថា ពលរដ្ឋ ដែលមានអាយុចាប់ពី១៨ឆ្នាំឡើងទៅ ឬអ្នកដែលមានបញ្ហាឈ្មោះខុសជាដើម នឹងសម្រុកទៅចុះឈ្មោះ និងពិនិត្យឈ្មោះនៅកៀកថ្ងៃបុណ្យភ្ជុំធំ ព្រោះតែជាឱកាសឈប់សម្រាកពេញលេញ។
បើតាមលោក ហង្ស ពុទ្ធា ការណ៍ដែល គ.ជ.ប.ដាក់ចេញដំណើការថ្មីចុះឈ្មោះបោះឆ្នោតថ្មី ចុះទៅភូមិឃុំពលរដ្ឋរស់នៅ គឺដើម្បីបង្ខិតសេវាឲ្យនៅជិតពលរដ្ឋ។
សូមរំឮកថា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៨នេះ ធ្វើឡើងចំពោះតែពលរដ្ឋ ដែលមានសិទ្ធិបោះឆ្នោត ហើយពុំទាន់បានចុះឈ្មោះពីមុនមក និងពលរដ្ឋដែលទើបគ្រប់អាយុ១៨ឆ្នាំ ដោយគិតត្រឹមរយៈពេលមុនឬកើតត្រឹមថ្ងៃទី១ខែមករាឆ្នាំ២០១៨។ ក្រៅពីនេះការចុះឈ្មោះបោះឆ្នោតក៏តម្រូវផងដែរ សម្រាប់អ្នកផ្លាស់ប្តូរលំនៅឋាន ការកែតម្រូវឈ្មោះ ការស្រង់ និងលុបឈ្មោះចំពោះអ្នកទទួលមរណភាព និងអ្នកត្រូវបានដកសិទ្ធិបោះឆ្នោតបណ្តោះអាសន្ន ។
ផ្អែកតាមការបង្ហាញរបស់ គ.ជ.ប ចំនួនអ្នកចុះឈ្មោះបោះឆ្នោតថ្មី នៅក្នុងឆ្នាំ២០១៨នេះមានប្រហែលជាង៤៨ម៉ឺន៩ពាន់នាក់។ ជាមួយគ្នានេះ គ.ជ.ប ក៏លុបឈ្មោះអ្នកបោះឆ្នោតចេញពីបញ្ជីជាង៩ម៉ឺននាក់ផងដែរ។ បន្ថែមលើនេះ គ.ជ.ប បានអំពាវនាវដល់ពលរដ្ឋ ដែលមានឈ្មោះនៅក្នុងបញ្ជីឈ្មោះបោះឆ្នោតចាស់ក្នុងឆ្នាំ២០១៧ ត្រូវទៅពិនិត្យមើលឈ្មោះរបស់ខ្លួន ដែលបិទផ្សាយនៅតាមសាលាឃុំសង្កាត់ ដើម្បីឲ្យប្រាកដថា ខ្លួនពិតជាមានឈ្មោះនិងទិន្នន័យត្រឹមត្រូវនៅក្នុងបញ្ជីបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ