ចលនាសង្រ្គោះជាតិបើកយុទ្ធនាការប្រឆាំងនឹងក្រុមហ៊ុនរបស់ក្រុមគ្រួសារលោកនាយករដ្ឋមន្រ្តីហ៊ុន សែន
ចលនាសង្រ្គោះជាតិដែលរដ្ឋាភិបាលកម្ពុជាចាត់ទុកថាជាចលនាខុសច្បាប់នោះ នៅដើមសប្តាហ៍នេះបានចាប់ផ្តើមធ្វើយុទ្ធនាការទី១របស់ខ្លួនហើយដោយអំពាវនាវដល់ពលរដ្ឋខ្មែរឲ្យឈប់ផឹកទឹកបរិសុទ្ធម៉ាកវីតាល់តទៅទៀត។ នេះបើតាមការអះអាងរបស់លោករី គា ដែលជាអគ្គលេខាធិការនៃចលនានេះ។ ប៉ុន្តែតំណាងក្រុមហ៊ុនវីតាល់បញ្ជាក់តបវិញថា គេត្រូវញែកឲ្យដាច់ពីគ្នារវាងវិស័យរដ្ឋាភិបាល និងវិស័យឯកជន។
ចុះផ្សាយនៅថ្ងៃ៖
ស្តាប់ - ០២:២៧
យុទ្ធនាការទីមួយរបស់ចលនាសង្រ្គោះជាតិនេះ មានរយៈពេល២សប្តាហ៍ដោយធ្វើការអំពាវនាវឲ្យពលរដ្ឋខ្មែរទាំងក្រៅប្រទេស និងក្នុងប្រទេសបញ្ឈប់ទិញនូវទឹកបរិសុទ្ធម៉ាកវីតាល់បរិភោគតទៅទៀត។ ក្រុមហ៊ុនទឹកបរិសុទ្ធវីតាល់ ត្រូវបានលោករី គាអះអាងថា ជារបស់លោកស្រីហ៊ុន ម៉ាណា ដែលជាកូនស្រីរបស់លោកនាយករដ្ឋមន្រ្តីហ៊ុន សែន។ ដូច្នេះហើយ ទើបបានជាចលនាសង្រ្គោះជាតិចាប់ផ្តើមយុទ្ធនាការដំបូងរបស់ខ្លួនសំដៅប្រឆាំងនឹងក្រុមហ៊ុននេះតែម្តង។
ក៏ប៉ុន្តែលោកឧកញ៉ាឡាវ វ៉ាន់ នាយកប្រតិបត្តិក្រុមហ៊ុនវីតាល់ បានប្រតិកម្មតបវិញដោយឲ្យចលនានេះចែកឲ្យដាច់ពីគ្នារវាងវិស័យរដ្ឋាភិបាល និងវិស័យឯកជន។ លោកថា ចលនាសង្រ្គោះជាតិ កំពុងតែភាន់ច្រឡំលើបញ្ហានេះ ហើយថាចលនានេះដឹកនាំខ្លួនឯងមិនទាន់បានផង តែចង់មកដឹកនាំប្រទេសជាតិ។
សម្រាប់លោករី គា ដោយសារតែក្រុមហ៊ុនវីតាល់ដឹកនាំដោយក្រុមគ្រួសារលោកនាយករដ្ឋមន្រ្តីហ៊ុន សែននេះហើយ ទើបក្លាយជាមុខសញ្ញារបស់ចលនាសង្រ្គោះជាតិ។ លោកថា ក្រុមគ្រួសារលោកនាយករដ្ឋមន្រ្តីហ៊ុន សែន និងគណបក្សប្រជាជនកម្ពុជាពាក់ព័ន្ធនឹងការរំលាយគណបក្សសង្រ្គោះជាតិ។ ដូចនេះហើយ លោករី គា អះអាងថាយុទ្ធនាការបន្ទាប់របស់ចលនាសង្រ្គោះជាតិ គឺនឹងអំពាវនាវឲ្យពលរដ្ឋខ្មែរបន្តឈប់ប្រើប្រាស់ប្រេងសាំងរបស់ក្រុមហ៊ុនប្រេងឥន្ទនៈតេឡាថែមទៀតដែលលោករី គា អះអាងថា ជារបស់លោកស្រីហ៊ុន ម៉ាណា និងលោកស្រីប៊ុន រានី ដែលជាភរិយារបស់លោកនាយករដ្ឋមន្ត្រីហ៊ុន សែន។ និយាយជារួមទៅ បើតាមលោករី គា មុខសញ្ញារបស់ចលនាសង្រ្គោះជាតិ គឺក្រុមហ៊ុនទាំងឡាយណាដែលជាប់ពាក់ព័ន្ធនឹងក្រុមគ្រួសារលោកនាយករដ្ឋមន្រ្តីហ៊ុន សែនតែម្តង។
លោកសុខ ឥសាន អ្នកនាំពាក្យគណបក្សប្រជាជនកម្ពុជា បានចាត់ទុកយុទ្ធនាការរបស់ចលនាសង្រ្គោះជាតិនេះថា ធ្វើឡើងដោយសារតែអស់ផ្លូវដើរ។ លោកសង្កត់ធ្ងន់ថា ការអំពាវនាវនេះមិនមានប្រសិទ្ធភាពអ្វីនោះទេ ដោយគ្មានប្រជាជនកម្ពុជាណាម្នាក់ធ្វើតាមការញុះញង់នេះឡើយ ។ សម្រាប់លោកសុខ ឥសាន កុំថាឡើយតែរឿងចង់បង្អត់ទឹកប្រជាជន ទោះបញ្ហាផ្សេងៗទៀត ក៏គ្មានប្រជាជនណាលុះតាមឧបាយកលអាក្រក់របស់ក្រុមលោកសម រង្ស៊ីនោះដែរ ។
សូមបញ្ជាក់ថា ចលនាសង្រ្គោះជាតិដែលបង្កើតឡើងដោយលោកសម រង្ស៊ី និងអតីតមន្រ្តីគណបក្សប្រឆាំង៨នាក់ទៀត ត្រូវបានរដ្ឋាភិបាលកម្ពុជាចាត់ទុកថា ក្រុមឧទ្ទាមក្រៅច្បាប់។ មិនតែប៉ុណ្ណោះ ថ្នាក់ដឹកនាំនៃចលនានេះក៏ត្រូវបានក្រសួងមហាផ្ទៃប្តឹងឲ្យតុលាការកម្ពុជាចាត់ការទៅតាមផ្លូវច្បាប់ថែមទៀត។ សម្រាប់រដ្ឋាភិបាលកម្ពុជា ចលនាសង្រ្គោះជាតិទោះធ្វើសកម្មភាពអ្វីក៏ដោយ គឺជាសកម្មភាពខុសច្បាប់ទាំងអស់ដែលត្រូវតែកំទេចចោលភ្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ