ក្រសួងធនធានទឹករំឮកពលរដ្ឋរស់នៅខេត្តជាប់មាត់សមុទ្រ ឲ្យប្រុងប្រយ័ត្នស្ថានភាពភ្លៀងធ្លាក់ជោគជាំពេញមួយសប្ដាហ៍
អ្នកនាំពាក្យក្រសួងធនធានទឹក និងឧតុនិយមនៅថ្ងៃទី១៣ខែកក្កដានេះ បានអំពាវនាវដល់ប្រជាពលរដ្ឋរស់នៅខេត្តជាប់មាត់សមុទ្រទាំង៤ ត្រូវមានការប្រុងប្រយ័ត្នឲ្យបានខ្ពស់នូវស្ថានភាពភ្លៀងធ្លាក់ជោគជាំពេញមួយសប្ដាហ៍នេះ ចាប់ពីថ្ងៃទី១២ដល់ថ្ងៃទី១៨ខែកក្កដា។ ការប្រកាសរបស់ក្រសួងធនធានទឹកធ្វើឡើង បន្ទាប់ពីពិនិត្យឃើញថា មានភ្លៀងធ្លាក់ច្រើន ធ្វើឲ្យផ្ទៃមេឃមានភាពអួរអាប់នឹងនាំមកនូវ ខ្យល់បក់បោកខ្លាំង លាយឡំរលកខ្ពស់ៗ។
ចុះផ្សាយនៅថ្ងៃ៖
ស្តាប់ - ០២:០៣
អ្នកនាំពាក្យក្រសួងធនធានទឹក និងឧតុនិយមលោក ចាន់ យុត្ថា បានអះអាងប្រាប់វិទ្យុបារាំងអន្តរជាតិនៅថ្ងៃសុក្រនេះថា ប្រជានេសាទ និងអ្នកដំណើរនិយមជិះទូកកំសាន្តលើនៅតាមផ្ទៃសមុទ្រគឺជាក្រុមមនុស្សដែលត្រូវប្រុងប្រយ័ត្នឲ្យបានខ្ពស់នៅក្នុងស្ថានភាពភ្លៀងធ្លាក់ជោគជាំនៅខេត្តជាប់មាត់សមុទ្រទាំង៤រួមមានៈព្រះសីហនុ កោះកុង កំពត កែប ។
ជាក់ស្ដែងក្នុងចំណោមខេត្តជាប់សមុទ្រទាំង៤គឺ ខេត្តព្រះសីហនុគឺកម្រិតទឹកភ្លៀងបានឡើងដល់ជាង១០០មីលីម៉ែត្រ គិតត្រឹមថ្ងៃទី១២ខែកក្កដាម្សិលមិញ ខណៈខេត្តកោះកុងកម្រិតទឹកភ្លៀងឡើងដល់ជាង៨០មីលីម៉ែត្រ។ ប្រឈមស្ថានភាពបែបនេះអ្នកនាំពាក្យក្រសួងធនធានទឹកបានបញ្ជាក់ថា ខេត្តជាប់មាត់សមុទ្រ ភ្លៀងនឹងបន្តធ្លាក់ជោគជាំ ដែលចំណុចនេះជាក្ដីព្រួយបារម្ភរបស់ក្រសួងធនធានទឹក។ ព្រួយបារម្ភព្រោះថា កន្លងមកស្ថានភាពភ្លៀងធ្លាក់ជោគជាំបែបនេះ នាំឲ្យទឹកហូរច្រោះដាច់ចិញ្ចើមផ្លូវជាតិលេខ៤។ ប៉ុន្តែទោះជាបែបណាក៏ដោយ ស្ថានភាពទឹកភ្លៀងនៅខេត្តជាប់សមុទ្រមិនធ្ងន់ធ្ងររហូតការប្រកាសអាសន្នទេ។
ក្រៅពីតំបន់មាត់សមុទ្រ ខេត្តបាត់ដំបងកើតមានជំនន់ទឹកភ្លៀងនៅស្ទឹងសង្កែ កាលថ្ងៃទី១២ខែកក្កដាម្សិលមិញ ដោយសារតែការបើកទំនប់ទឹកសេកសក ក្នុងស្រុករតនៈមណ្ឌល។ ព្រោះទំនប់ទឹកនៅសេកសកបានហក់ឡើងខ្ពស់ រហូតឈានដល់ការបើកទ្វារទឹកទាំង៧ដើម្បីរំដោះទឹក។ តែស្ថានភាពនេះបានវិលទៅរកធម្មតាវិញហើយគិតមកដល់ថ្ងៃទី១៣ ខែកក្កដានេះ។ បើតាមលោក ចាន់ យុត្ថា ស្របពេលដែលខេត្តបាត់ដំបងជោគជន់ដោយទឹកភ្លៀង មួយផ្នែកនៃខេត្តនេះក៏ប្រឈមនឹងគ្រោះរាំងស្ងួតដែរ។
ខណៈខេត្តដទៃទៀតដូចជា៖ សៀមរាប និងបន្ទាយមានជ័យក៏ប្រឈមនឹងភាពរាំងស្ងួតដែរ។ នេះក៏ដោយសារតែភ្លៀងធ្លាក់ក្នុងក្របខណ្ឌរាយប៉ាយមិនទៅដល់។ ដោយឡែកសម្រាប់បណ្តារាជធានីខេត្តមួយចំនួន ដូចជារាជធានីភ្នំពេញ ខេត្តកណ្តាល កំពង់ស្ពឺ ការធ្លាក់ភ្លៀងនឹងថយមកក្នុងកម្រិតតិចនៅចន្លោះថ្ងៃទី១២ ដល់ថ្ងៃទី១៨ ខែកក្កដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ