៣ថ្ងៃមុនបញ្ចប់ស៊ីហ្គេម កម្ពុជាទទួលបានមេដាយមាស១ និងសំរឹទ្ធ១០
គិតត្រឹមថ្ងៃទី២៧ ខែសីហានេះ កម្ពុជាបានទទួលមេដាយមាស១ និងមេដាយសំរឹទ្ធ១០ នៅក្នុងព្រឹត្តិការណ៍កីឡាអាស៊ីអាគ្នេយ៍ ឬស៊ីហ្គេម លើកទី២៩ នៅទីក្រុងគូឡាឡាំពួរ ប្រទេសម៉ាឡេស៊ី។ ចំណាក់ថ្នាក់នេះធ្វើឲ្យប្រទេសឡាវស្ថិតនៅចំណាត់ថ្នាក់ទី៨ ពីលើកម្ពុជា។ នេះបើតាមអគ្គលេខាធិការគណៈកម្មាធិការជាតិអូឡាំពិកកម្ពុជា។
ចុះផ្សាយនៅថ្ងៃ៖
ស្តាប់ - ០២:០៥
លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយកបេសកកម្មដឹកនាំកីឡានៅក្នុងឱកាសការប្រកួតស៊ីហ្គេម(SEA Games)នៅម៉ាឡេស៊ីលើក២៩ ឲ្យដឹងថាបើទោះបីជាពេលនេះកម្ពុជាស្ថិតនៅក្រោមឡាវ ប៉ុន្តែថ្ងៃស្អែកកម្ពុជាអាចនឹងមានលទ្ធផលនៅពីលើប្រទេសឡាវវិញ។
លោកវ៉ាត់ ចំររើនបន្ថែមថាការមានសង្ឃឹមយកចំណាត់ថ្នាក់លើប្រទេសឡាវ ដោយសារតែថ្ងៃទី២៨ ខែសីហាកម្ពុជា នឹងប្រគួតប្រដាល់គុណខ្មែរពាក់កណ្តាលផ្តាច់ព្រ័ត្រជាមួយនឹងម៉ាឡេស៊ី និងហ្វីលីពីន ដូច្នេះបើកម្ពុជាជៀសផុតពីថៃនោះកម្ពុជាអាចឡើងទៅវគ្គផ្តាច់ព្រ័ត្រ ដែលធ្វើឲ្យកម្ពុជាមានឱកាសអាចទទួលបានមេដាយមាស និងប្រាក់។
បើតាមលោកវ៉ាត់ ចំរើនក្នុងចំណោមប្រភេទកីឡារបស់ស៊ីហ្គេមទាំង៣៨ កម្ពុជាបានចូលរួមប្រកួតតែ២៤ប្រភេទកីឡាប៉ុណ្ណោះ។ គិតត្រឹមថ្ងៃទី២៧ ខែសីហានេះ កម្ពុជានៅសល់ការប្រកួតប៉េតង់វាយគូ តេក្វាន់ដូ និងប្រដាល់គុនខ្មែរតែប៉ុណ្ណោះ។ លោកវ៉ាត់ ចំរើនបញ្ជាក់ថាកម្ពុជានៅមានសង្ឃឹមទៅរកមេដាយមាសនៅក្នុងកីឡាដែលនៅសល់ខាងលើនេះ។
កាលពីថ្ងៃទី២៤ ខែសីហា កម្ពុជាបានស្ថិតនៅក្នុងចំណាត់ថ្នាក់ទី៨ ក្នុងចំណោមប្រទេសទាំង១១ បន្ទាប់ពីកម្ពុជាបានឈ្នះមេដាយមាសលើកីឡាប៉េតង់។
បើតាមលោកលទ្ធផលនៃការប្រកួតបង្ហាញថាម្ចាស់ផ្ទះម៉ាឡេស៊ីស្ថិតនៅលើគេ ដោយទទួលបានមេដាយសរុបប្រមាណ២១០ ក្នុងនោះមេដាយមាសប្រមាណ៩០ ចំណាត់ថ្នាក់ទី១។ ចំណែកឯប្រទេសវៀតណាមស្ថិតនៅក្នុងចំណាត់ថ្នាក់បន្ទាប់ពីម៉ាឡេស៊ីដោយទទួលបានមេដាយសរុប១២៩ ក្នុងនោះមានមេដាយមាសប្រមាណ៥០។ ចំណែកប្រទេសថៃបានទទួលមេដាយសរុប១៨០ ក្នុងនោះមេដាយមាស៤៨ ស្ថិតនៅក្នុងចំណាត់ថ្នាក់ទី៣។
គួរជម្រាបជូនថា ការប្រកួតកីឡាស៊ីហ្គេមត្រូវបានរៀបចំធ្វើរយៈពេល២ឆ្នាំម្ដង។ នៅឆ្នាំ២០១៧នេះ ព្រឹត្តិការណ៍ស៊ីហ្គេមលើកទី២៩ ចាប់ផ្ដើមជាផ្លូវការពីថ្ងៃទី១៩ ដល់ថ្ងៃទី៣០ សីហា។ សម្រាប់ព្រឹត្តិការណ៍នេះ កម្ពុជាបានបញ្ជូនគណៈប្រតិភូទៅចូលរួមសរុបចំនួន២៧៥នាក់ ក្នុងនោះមានអត្តពលិក១៧០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ