គ.ជ.ប៖ ប្រជាពលរដ្ឋជាង៧លាន៨សែននាក់នឹងមានសិទ្ធិបោះឆ្នោតនាពេលខាងមុខ
នៅព្រឹកនេះ គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថាខ្លួនបានប្រកាសសុពលភាពបញ្ជីឈ្មោះបោះឆ្នោតផ្លូវការហើយ សម្រាប់ការបោះឆ្នោតក្រុមប្រឹក្សាឃុំ-សង្កាត់ នាថ្ងៃទី៤ ខែខែមិថុនា ឆ្នាំ២០១៧ ខាងមុខនេះ។ ជាបញ្ជីបោះឆ្នោតផ្លូវការ ដែលមានអ្នកមានសិទ្ធិក្នុងការបោះឆ្នោត ប្រមាណ៨១.៣៨ភាគរយ។
ចុះផ្សាយនៅថ្ងៃ៖
ស្តាប់ - ០២:០៤
លោហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត បានឲ្យដឹងនៅថ្ងៃទី១២ ខែកុម្ភៈនេះ ថាបញ្ជីបោះឆ្នោតផ្លូវការមានប្រជាពលរដ្ឋមានសិទ្ធិបោះឆ្នោតប្រមាណ ៧,៨៦៥,០៣៣នាក់ ត្រូវនឹង៨១.៣៨ភាគរយនៃចំនួនពលរដ្ឋដែល គ.ជ.ប បានកំណត់ថាមានសិទ្ធិក្នុងការចុះឈ្មោះបោះឆ្នោត។ តាមតួលេខខាងលើនេះ គឺមានស្ត្រីប្រមាណ ៤,២១០,៩១៤នាក់។
ការប្រកាសសុពលភាពបញ្ជីឈ្មោះសម្រាប់បោះឆ្នោតនាពេលខាងមុខនេះ មាននន័យថាប្រជាពលរដ្ឋប្រមាណ១លានកន្លះ ដែលជាអ្នកមានសិទ្ធិចុះឈ្មោះបោះឆ្នោត តែមិនបានចុះឈ្មោះនោះ នឹងមិនអាចចូលរួមបោះឆ្នោតជ្រើសរើសក្រុមប្រឹក្សាឃុំសង្កាត់នៅខែមិថុនាបានឡើយ។
លោកហង្ស ពុទ្ធា បានបន្ថែមថាចំនួនប្រជាពលរដ្ឋ ដែលមានសិទ្ធិក្នុងការបោះឆ្នោតតែប្រមាណ៨១ភាគរយនេះ គឺដោយសារតែប្រជាពលរដ្ឋកម្ពុជាប្រមាណ១លានកន្លះទៀត ជាពលករ ឬជាអ្នកធ្វើការក្រៅប្រទេសមិនបានវិលត្រឡប់មកចូលរួមក្នុងការចុះឈ្មោះបោះឆ្នោត។ មូលហេតុមួយចំនួនទៀតមានដូចជាប្រជាពលរដ្ឋ ដែលមានវ័យចាស់ជរាមិនមានឯកសារគ្រប់គ្រាន់ ហើយអ្នកខ្លះទៀតសម្រេចចិត្តមិនទៅចុះឈ្មោះបោះឆ្នោតតែម្តង។
បើតាមអ្នកនាំពាក្យ គ.ជ.ប ឈ្មោះក្នុងបញ្ជី ដែលគេសង្ស័យថាជាជនបរទេសនោះ មិនត្រូវបានលុបចេញពីបញ្ជីបោះឆ្នោតឡើង បើទោះបីជាមានការប្តឹងផ្តល់ពីគណបក្សប្រឆាំងរហូតដល់ក្រុមប្រឹក្សារដ្ឋធម្មនុញ្ញក៏ដោយ ហើយក៏មិនមានទៀតដែរ ចំពោះការជំទាស់ផ្សេងៗចាប់ពីពេលប្រកាសសុពលភាពនេះតទៅ។ ចំពោះការបិទផ្សាយបញ្ជីឈ្មោះផ្លូវការនេះ គឺប្រជាពលរដ្ឋអាចស្វែងរកឃើញនៅលើកគេហទំព័ររបស់គណៈកម្មាធិការជាតិរៀបចំការបោះឆ្នោត បន្ទាប់ពីថ្ងៃប្រកាសសុពលភាពនេះរយៈពេល៥ថ្ងៃ។
គួរបញ្ជាក់ថាក្នងការចុះឈ្មោះបោះឆ្នោតក្នុងបញ្ជីបោះឆ្នោតថ្មី ដែលប្រព្រឹត្តិទៅចាប់ពីថ្ងៃទី១ ខែកញ្ញា ដល់ថ្ងៃទី៣០ ខែវិច្ឆកា ឆ្នាំ២០១៦ មានប្រជាពលរដ្ឋប្រមាណ ៧,៨៧៣,១៩៤នាក់ បានចុះឈ្មោះ ស្មើនឹង៨១.៤៧ភាគរយ នៃចំនួនប្រជាពលរដ្ឋ ដែលមានសិទ្ធិចុះឈ្មោះបោះឆ្នោតប្រមាណ៩,៦៦៤,២១៦នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ