គ.ជ.ប អំពាវនាវឲ្យគណបក្សនយោបាយត្រូវគោរពច្បាប់ពេលឃោសនាបោះឆ្នោត
គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃនេះ បានចេញសេចក្តីអំពាវនាវដល់គណបក្សនយោបាយទាំងអស់ត្រូវគោរពគោលការណ៍និងច្បាប់ស្តីពីការបោះឆ្នោត ជ្រើសតាំងតំណាងរាស្ត្រនីតិកាលទី៦ ដើម្បីធានាការបោះឆ្នោតប្រព្រឹត្តិទៅដោយសន្តិវិធី និងគ្មានអំពើហិង្សា។ ការអំពាវនាវនេះធ្វើឡើងមុនមួយសប្តាហ៍ដែលការឃោសនាបោះឆ្នោតទ្រង់ទ្រាយធំថ្ងៃដំបូងនឹងចាប់ផ្តើមនៅថ្ងៃទី៧កក្កដា ហើយបញ្ចប់នៅថ្ងៃ២៧កក្កដាខាងមុខ។
ចុះផ្សាយនៅថ្ងៃ៖
នៅក្នុងសេចក្តីប្រកាសព័ត៌មានដាច់ដោយឡែកពីគ្នាចំនួនពីរ ចេញថ្ងៃទី១ និងទី២កក្កដា តែមានខ្លឹមសារដូចគ្នា ប្រធានគណៈកម្មាធិការជាតិរៀបចំការបោះឆ្នោត លោក ស៊ិក ប៊ុនហុក បានអំពាវនាវដល់គណបក្សនយោបាយ បេក្ខជន និងអ្នកគាំទ្រគណបក្សនយោបាយទាំងអស់ ត្រូវតែអនុវត្តតាមវិធាន បទប្បញ្ញត្តិ និងគោលការណ៍ ដែលមានចែងក្នុងច្បាប់ស្តីពីការបោះឆ្នោតជ្រើសតាំងតំណាងរាស្ត្រ នីតិវិធីក្រមសីលធម៌ និងគោលការណ៍នានា ដែលកំណត់ដោយ គ.ជ.ប។ តាម គ.ជ.ប ការអំពាវនាវនេះ គឺដើម្បីធានាថាការឃោសនាបោះឆ្នោតរបស់គណបក្សនយោបាយទាំងអស់ ប្រព្រឹត្តិទៅដោយសន្តិវិធី អហិង្សា មានសន្តិសុខ និងសុវត្ថិភាព។ លើសពីនេះ គ.ជ.ប ក៏បានអំពាវនាវផងដែរ ដល់អាជ្ញាធរដែនដី ត្រូវប្រកាន់ជំហរអព្យាក្រឹត និងជួយសម្របសម្រួលដល់សកម្មភាពឃោសនាបោះឆ្នោត ឲ្យបានស្មើភាពគ្នា។
លោក ហង្ស ពុទ្ធា អ្នកនាំពាក្យ គ.ជ.ប បានបញ្ជាក់បន្ថែមថា ការឃោសនាទ្រង់ទ្រាយធំអនុញ្ញាតឲ្យធ្វើបានចំនួន៤ដងក្នុងរយៈពេល២១ថ្ងៃនៃយុទ្ធនាការទាំងមូល។ ការឃោសនាទ្រង់ទ្រាយធំ មានន័យថា មានការចូលរួមរបស់មនុស្សចាប់ពី២០នាក់ឡើងទៅ ដោយមានម៉ូតូ១០គ្រឿង និងរថយន្ត២គ្រឿងឡើងទៅ ព្រមទាំងឧបករណ៍បំពងសំឡេង។ ចំណែកការឃោសនាទ្រង់ទ្រាយធំតាមផ្លូវទឹក គឺចាប់ពីមានមនុស្សចូលរួម០៥នាក់ឡើងទៅ ដោយប្រើកាណូត៥គ្រឿង និងមានឧបករណ៍បំពងសំឡេងផងដែរ។ នេះបើតាម លោក ហង្ស ពុទ្ធា។
អ្នកនាំពាក្យដដែលបន្តថា គណបក្សនីមួយៗអាចជ្រើសរើសថ្ងៃឃោសនាទ្រង់ទ្រាយធំតាមអ្វីដែលខ្លួនចង់បានប៉ុន្តែត្រូវជូនដំណឹងទៅអាជ្ញាធរពាក់ព័ន្ធជាមុន ដើម្បីបញ្ជៀសការឃោសនាប៉ះទង្គិចគ្នាជាមួយគណបក្សផ្សេងទៀត។
សូមបញ្ជាក់ថា យុទ្ធនាការឃោសនាបោះឆ្នោត ជ្រើសតាំងតំណាងរាស្ត្រ នីតិកាលទី ៦ មានរយៈពេល ២១ថ្ងៃ ចាប់ពីថ្ងៃទី ៧ ដល់ថ្ងៃទី ២៧ខែកក្កដា ខណៈការបោះឆ្នោតជាតិ នឹងធ្វើឡើងនៅថ្ងៃទី ២៩ខែកក្កដា ឆ្នាំ ២០១៨។
ការបោះឆ្នោតលើកនេះ គឺមានគណបក្សនយោបាយរហូតដល់២០ ត្រូវបាន គ.ជ.ប ចុះឈ្មោះឲ្យចូលរួមប្រកួតប្រជែង នៅគ្រាដែល គណបក្សប្រឆាំងធំជាងគេ ត្រូវបានរំលាយកាលពីចុងឆ្នាំមុន បុគ្គលសំខាន់ៗរបស់អតីតគណបក្សសង្គ្រោះជាតិចំនួន១១៨នាក់ ត្រូវបានដកសិទ្ធិធ្វើនយោបាយ ហើយមេដឹកនាំអតីតគណបក្សនេះ គឺលោក កឹម សុខា ត្រូវបានចាប់ដាក់ពន្ធនាគារ ក្រោមបទចោទក្បត់ជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ