លោកនេត សាវឿន ប្រាប់កម្លាំងនគរបាលឲ្យគោរពច្បាប់និងក្រមសីលធម៌ក្នុងការការពារដំណើរការបោះឆ្នោត
នៅព្រឹកមិញនេះ លោកនាយកឧត្តមសេនីយ៍នេត សាវឿន អគ្គស្នងការនគរបាលជាតិ បានជួបប្រជុំជាមួយស្នងការនគរបាលទាំង ២៥រាជធានី-ខេត្ត ដើម្បីបន្ដផ្សព្វផ្សាយផែនការការពារយុទ្ធនាការឃោសនា និងការបោះឆ្នោតជ្រើសរើសក្រុមប្រឹក្សាឃុំ-សង្កាត់។ ក្នុងកិច្ចប្រជុំនោះ លោកអគ្គស្នងការនគរបាលជាតិបានរំឮកប្រាប់ដល់កងកម្លាំងនគរបាលទាំងអស់ឲ្យគោរពតាមច្បាប់ នីតិវិធី និងក្រមសីលធម៌ដែលកំណត់ដោយគ.ជ.បក្នុងពេលការពារដំណើរការឃោសនាបោះឆ្នោតពេលបោះឆ្នោត និងពេលរាប់សន្លឹកឆ្នោតឃុំសង្កាត់។
ចុះផ្សាយនៅថ្ងៃ៖
ស្តាប់ - ០២:១៦
លោកគៀត ច័ន្ទថារិទ្ធ អគ្គស្នងការរងនិងជាអ្នកនាំពាក្យអគ្គស្នងការនគរបាលជាតិ បានប្រាប់ក្រុមអ្នកសារព័ត៌មានក្រោយពីបញ្ចប់កិច្ចប្រជុំផ្សព្វផ្សាយផែនការការពារយុទ្ធនាការឃោសនា និងការបោះឆ្នោតជ្រើសរើសក្រុមប្រឹក្សាឃុំ-សង្កាត់ថា ប្រមុខនគរបាលជាតិ បានដាស់តឿនឡើងវិញឲ្យគ្រប់កងកម្លាំងនគរបាលទាំងអស់នៅទូទាំងប្រទេស ត្រូវខិតខំប្រឹងប្រែងបំពេញការងារ ដើម្បីការពារបរិយាកាសនៃដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់ទាំងដំណើរការឃោសនាបោះឆ្នោត អំឡុងពេលបោះឆ្នោត និង រាប់សន្លឹកឆ្នោត ប្រកបភាពលក្ខណៈល្អប្រសើរ មានភាពស្ងប់ស្ងៀម និងគ្មានបញ្ហាអ្វីកើតឡើងដែលប៉ះពាល់ដល់សណ្តាប់ធ្នាប់នៃការបោះឆ្នោត។ ជាមួយគ្នានេះ លោកនេត សាវឿន ក៏បានរំឮកប្រាប់កងកម្លាំងនគរបាលត្រូវប្រព្រឹត្តឲ្យស្របទៅតាមច្បាប់ ទៅតាមនីតិវិធី និងក្រមសីលធម៌ដែលកំណត់ដោយគណៈកម្មាធិការរៀបចំការបោះឆ្នោត(គ.ជ.ប)ផងដែរ។
សូមជំរាបជូនថា ចាប់ពីថ្ងៃទី ២០ ឧសភាតទៅ គណបក្សនយោបាយទាំង ១២ នឹងចាប់ផ្តើមធ្វើយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ដែលមានរយៈពេល ១៤ថ្ងៃចាប់ពីថ្ងៃទី ២០ឧសភា រហូតដល់ថ្ងៃទី ០២ មិថុនាមុនការបោះឆ្នោតឈានមកដល់នៅថ្ងៃទី ០៤ មិថុនា។ សម្រាប់យុទ្ធនាការឃោសនាបោះឆ្នោតនេះ អគ្គស្នងការនគរបាលជាតិគ្រោងប្រើប្រាស់កងកម្លាំងចំនួន ១ម៉ឺន ៩ពាន់ ៣១១នាក់ក្នុងនោះនគរបាលចំនួនជាង ១ម៉ឺន ៥ពាន់ កងរាជអាវុធហត្ថចំនួនជិត ២ពាន់នាក់ និង កងយោធពលខេមរភូមិន្ទចំនួនជិត ២ពាន់នាក់ដូចគ្នា។ ដោយឡែក សម្រាប់ដំណើរការការពារការិយាល័យបោះឆ្នោត និងរាប់សន្លឹកឆ្នោតនៅថ្ងៃបោះឆ្នោត ៤ មិថុនាវិញ អគ្គស្នងការនគរបាលជាតិគ្រោងប្រើប្រាស់កម្លាំងសមត្ថកិច្ចចំនួន ៣ម៉ឺន ៧ពាន់ ៥៣០នាក់ ក្នុងនោះកម្លាំងនគរបាលចំនួនជាង ៣ម៉ឺន ៥ពាន់នាក់ កងរាជអាវុធហត្ថ ៦៤៣នាក់ និងកងយោធពលខេមរភូមិន្ទជាង ១ពាន់ ៨រយនាក់។
ចំពោះដំណើរការបោះឆ្នោតទាំងមូលនេះ លោកនេត សាវឿន អគ្គស្នងការនគរបាលជាតិ បានប្រាប់ឲ្យកងកម្លាំងទាំងអស់ឲ្យមានការប្រុងប្រយ័ត្នដោយត្រៀមគ្រប់លក្ខណៈសម្បត្តិទាំងអស់ទាក់ទងទៅនឹងបទល្មើសដែលគណបក្សនយោបាយអាចបកស្រាយពីរឿងធម្មតាទៅជារឿងនយោបាយ។ ដូច្នេះ បើតាមលោកនេត សាវឿន គ្រប់បទល្មើសដែលកើតឡើងនៅក្នុងតំបន់ទទួលខុសត្រូវនីមួយៗ កងកម្លាំងនគរបាលត្រូវក្តោបរឿងទាំងនោះឲ្យបានដោយមានព័ត៌មានគ្រប់គ្រាន់ មានឯកសាររឹងមាំតាមផ្លូវច្បាប់ ដើម្បីបកស្រាយរឿងហេតុនីមួយៗឲ្យបានច្បាស់លាស់ ប្រសិនបើមានការចោទប្រកាន់ណាមួយកើតឡើងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ