«សួនប្រជាធិបតេយ្យថ្មី» នឹងបើកឲ្យសម្តែងមតិមុនពេលឃោសនាបោះឆ្នោតឃុំសង្កាត់
យ៉ាងយូរបំផុតត្រឹមពាក់កណ្តាលខែឧសភា ទីលានប្រជាធិបតេយ្យថ្មី ដែលស្ថិតក្នុងសង្កាត់ឬស្សីកែវ នឹងបញ្ចប់ការស្ថាបនាទាំងស្រុង ហើយនឹងត្រូវដាក់សម្ពោធឲ្យប្រើប្រាស់ក្នុងការសម្តែងមតិ នៅមុនពេលឃោសនាបោះឆ្នោតឃុំសង្កាត់។ បើតាមអ្នកនាំពាក្យសាលារាជធានីភ្នំពេញ ទីលានប្រជាធិបតេយ្យថ្មី ដែលប្តូរពីទីតាំងចាស់ ក្នុងសង្កាត់វត្តភ្នំ ហើយកំពុងស្ថាបនាលើ សួនច្បារគីឡូម៉ែត្រលេខ ៦នេះ នឹងត្រូវប្រើឈ្មោះថា «សួនប្រជាធិបតេយ្យ» ជំនួសវិញ ព្រោះវាអាចប្រើប្រាស់ជា សួនច្បារធម្មតាសម្រាប់ពលរដ្ឋលំហែរកាយ និងហាត់កីឡា ប្រសិនបើគ្មានការប្រើប្រាស់ទីលានដើម្បីសម្តែងមតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៨
អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានបញ្ជាក់ប្រាប់វិទ្យុបារាំងអន្តរជាតិ RFI នៅថ្ងៃព្រហស្បតិ៍នេះថា សាលាក្រុងភ្នំពេញ នឹងបើកឲ្យមានការសម្តែងមតិនៅលើទីលានប្រជាធិបតេយ្យថ្មី ក្នុងសង្កាត់ឬស្សីកែវ ខណ្ឌឬស្សីកែវ អំឡុងពាក់កណ្តាលខែឧសភាខាងមុខ នៅមុនពេលយុទ្ធនាការឃោសនាបោះឆ្នោតក្រុមប្រឹក្សាឃុំសង្កាត់ អាណត្តិទី ៤ ដែលនឹងចាប់ផ្តើម ពីថ្ងៃទី ២០ ខែឧសភា ដល់ថ្ងៃទី ០២ ខែមិថុនា ឆ្នាំ ២០១៧។
បើទោះបីជា មិនទាន់បង្ហើបឲ្យដឹងពី ទំហំនៃការចំណាយសរុប ដើម្បីសាងសង់ទីលានប្រជាធិបតេយ្យថ្មី តែ មន្រ្តីសាលារាជធានីភ្នំពេញ បានថ្លែងថា ទីលានប្រជាធិបតេយ្យថ្មី មានទីតាំងស្ថិតនៅតាមបណ្តោយផ្លូវជាតិលេខ ៥ ស្ថាបនាលើ សួនច្បារគីឡូម៉ែត្រលេខ ៦ ក្នុងសង្កាត់ឬស្សីកែវ ខណ្ឌឬស្សីកែវ មានទំហំ ២២.៨៣៥ ម៉ែត្រការ៉េ ដែលអាចផ្ទុកមនុស្សបានច្រើន មាន ក្រាលការ៉ូឡា ចំណតយាន្តយន្ត ភ្លើងបំភ្លឺ បង់អង្គុយ បង្គន់អនាម័យ សួនច្បារដែលធំជាងមុន និងប្រសើរជាងទីលានចាស់។ ទីលានថ្មីនេះ នឹងត្រូវប្រើឈ្មោះថា «សួនប្រជាធិបតេយ្យ» វិញ ដើម្បីឲ្យស្របនឹងមុខងារពីរ គឺ ប្រើប្រាស់ជា សួនច្បារសម្រាប់ពលរដ្ឋលំហែកាយ និងហាត់កីឡា បន្ថែមលើមុខងារ ប្រើប្រាស់ទីលានដើម្បី សម្តែងមតិ។
គួររំលឹកថា កាលពីដើមខែធ្នូ ឆ្នាំ ២០១៦ លោកនាយករដ្ឋមន្រ្តី ហ៊ុន សែន បានស្នើឲ្យផ្លាស់ប្តូរ ទីលានប្រជាធិបតេយ្យចាស់ ដែលស្ថិតនៅក្បែរស្ថានទូតអាមេរិក ក្នុងសង្កាត់វត្តភ្នំ ដោយសារលោកយល់ថា បានបង្កការរំខានដល់ ភ្ញៀវទេសចរ ចូលទស្សនា បូជនីយដ្ឋានទេសចរណ៍វត្តភ្នំ និងដើម្បីយកទីតាំងទៅធ្វើជា សួនច្បារបម្រើជាប្រយោជន៍សាធារណៈ ព្រមទាំង មានការសាងសង់ជា កន្លែងសម្រាប់ ជនពិការប្រគុំតន្ត្រីផងដែរ។ លោក ហ៊ុន សែន ធ្លាប់ចំអកថា នឹងយក ទីលានប្រជាធិបតេយ្យ ទៅធ្វើនៅមុខ ស្ថានទូតអាមេរិកតែម្តង ប្រសិនបើអាមេរិក ប្រតិកម្មនឹងការរុះរើទីតាំងទីលានប្រជាធិបតេយ្យចាស់។
ទីលានប្រជាធិបតេយ្យ គឺជា កន្លែងបញ្ចេញមតិជាសាធារណៈមួយ ផ្តួចផ្តើមឡើងដោយស្មារតី ច្បាប់ស្តីពី ការធ្វើបាតុកម្មដោយសន្តិវិធី ឆ្នាំ ២០០៩ ដែលតម្រូវឲ្យ អាជ្ញាធរ រាជធានី ខេត្ត មានភារៈរៀបចំសម្រាប់ការធ្វើបាតុកម្មដោយសន្តិវិធី ឬការបញ្ចេញមតិជាសាធារណៈ ក្នុងទឹកដីនៃដែនសមត្ថកិច្ចរបស់ខ្លួន។ ទីលានប្រជាធិបតេយ្យចាស់ ស្ថិតនៅក្នុងសង្កាត់វត្តភ្នំ ខណ្ឌដូនពេញ មានទំហំ ១០.៨៩០ម៉ែត្រការ៉េ (ទទឹង ៥៥ម៉ែត្រ និងបណ្ដោយ ១៩៨ម៉ែត្រ) ត្រូវបានប្រកាសឲ្យប្រើប្រាស់ កាលពីថ្ងៃទី ៤ ខែវិច្ឆិកា ឆ្នាំ ២០១០ ដោយអតីតអភិបាលរាជធានីភ្នំពេញ លោក កែប ជុតិមា។ ក្រោយការបោះឆ្នោត ខែកក្កដា ឆ្នាំ ២០១៣ គណបក្សសង្រ្គោះជាតិ បានប្រើប្រាស់ ទីលានប្រជាធិបតេយ្យ ដើម្បីប្រមូលផ្តុំអ្នកគាំទ្ររាប់ពាន់នាក់ ធ្វើបាតុកម្មរាប់ខែ ប្រឆាំងលទ្ធផលបោះឆ្នោត រហូតឈានដល់ មានការបំបែកទីលានប្រជាធិបតេយ្យ ដោយកងកម្លាំងសន្តិសុខរបស់សាលារាជធានី នៅដើមខែមករា ឆ្នាំ ២០១៤ និងបិទទីលានមួយរយៈ។ ៦ខែក្រោយមក ពោលគឺនៅ ថ្ងៃទី ១៥ ខែកក្កដា ឆ្នាំ ២០១៤ តំណាងរាស្រ្ត និងសកម្មជនបក្សសង្រ្គោះជាតិមួយចំនួន បានរួមគ្នាតវ៉ា ទាមទាររំដោះទីលានប្រជាធិបតេយ្យមកវិញ តែត្រូវបានអាជ្ញាធរចាប់ខ្លួន។ តំណាងរាស្រ្ត ៧រូប រួមទាំងលោកស្រី មូរ សុខហួរ លោក ហូរ វ៉ាន់ លោក នុត រំដួល ជាដើម ត្រូវបានចាប់ខ្លួនជុំវិញ ហិង្សានៅទីលានប្រជាធិបតេយ្យ កាលពីថ្ងៃទី ១៥ ខែកក្កដា ឆ្នាំ ២០១៤ សុទ្ធតែ ត្រូវបាន តុលាការដោះលែង ពីពន្ធនាគារព្រៃស បន្ទាប់ពី គណបក្សកាន់អំណាច និងបក្សប្រឆាំងបានចរចាជាកញ្ចប់ ដើម្បីបញ្ចប់ជម្លោះនយោបាយ។ ប៉ុន្តែតុលាការ បានបន្តចោទប្រកាន់ទៅលើ សកម្មជនបក្សប្រឆាំង ១៤រូប ដោយចោទពីបទដឹកនាំ និងចូលរួមអំពើកុបកម្ម នៅទីលានប្រជាធិបតេយ្យ សម្រេចដាក់ពន្ធនាគារ ចន្លោះពី ៧ឆ្នាំ ដល់ ២០ឆ្នាំ និងបន្តឃុំខ្លួន រហូតមកដល់បច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ