ក្រសួងមហាផ្ទៃ បើកភ្លើងខៀវឲ្យលោកសួន សេរីរដ្ឋាបង្កើតគណបក្ស
ក្រសួងមហាផ្ទៃនៅថ្ងៃសុក្រ ម្សិលមិញ បានសម្រេចអនុញ្ញាតឲ្យលោកសួន សេរីរដ្ឋា ដែលកំពុងសំងំលាក់នៅក្រៅប្រទេសបង្កើតគណបក្សនយោបាយត្រៀមប្រកួតប្រជែងការបោះឆ្នោតនាពេលខាងមុខ។ ការអនុញ្ញាតនេះ ជាការឆ្លើយតបទៅនឹងសំណើសុំបង្កើត“គណបក្សអំណាចខ្មែរ” របស់លោកសួន សេរីរដ្ឋា កាលពីថ្ងៃទី២១ ធ្នូ ឆ្នាំ២០១៤ កន្លងទៅ។ ភា្លមៗ លោកសួន សេរីរដ្ឋា ប្រធានស្ថាបនិកគណបក្សអំណាចខ្មែរ បានប្រកាសអំពាវនាវឲ្យពលរដ្ឋខ្មែរទាំងអស់ចូលរួមជាមួយគណបក្សរបស់លោក ដើម្បីរួមគ្នាធ្វើការផ្លាស់ប្តូរ។
ចុះផ្សាយនៅថ្ងៃ៖
ស្តាប់ - ០២:២៧
គណបក្សអំណាចខ្មែររបស់លោកសួន សេរីរដ្ឋា អាចនឹងលេចចេញរូបរាងក្នុងពេលឆាប់ៗខាងមុខនេះ ដើម្បីចូលរួមប្រកួតប្រជែងការបោះឆ្នោតជ្រើសរើសតំណាងរាស្ត្រឆ្នាំ២០១៨។ ក្រសួងមហាផ្ទៃកាលពីថ្ងៃសុក្រ បានសម្រេចឲ្យគណបក្សអំណាចខ្មែររបស់លោកសួន សេរីរដ្ឋា អាចចុះបញ្ជីជាផ្លូវការនៅក្រសួងមហាផ្ទៃបាន។ នៅក្នុងលិខិតផ្ញើទៅកាន់លោកសួន សេរីរដ្ឋា ប្រធានស្ថាបនិកគណបក្សអំណាចខ្មែរ ក្រសួងមហាផ្ទៃបានបញ្ជាក់ថា ដើម្បីទទួលបានសុពលភាព គណបក្សអំណាចខ្មែរ ត្រូវបំពេញបែបបទ និងលក្ខខណ្ឌដូចមានចែងក្នុងមាត្រា២០ ជំពូកទី៥ នៃច្បាប់ស្តីពីគណបក្សនយោបាយ។
ភ្លាមៗលោកសួន សេរីរដ្ឋា តាមរយៈលិខិតចំហរបស់ខ្លួនបានបញ្ជាក់ថា គណបក្សអំណាចខ្មែរនឹងបំពេញបែបបទតាមការតម្រូវហើយដាក់ទៅកាន់ក្រសួងមហាផ្ទៃក្នុងពេលឆាប់។ លោកសៀង សុភារក្ស អគ្គលេខាធិការ និងជាអ្នកនាំពាក្យគណបក្សអំណាចខ្មែរបានបន្ថែមថា នៅពេលនេះ ក្រុមការងារគណបក្សអំណាចខ្មែរបានត្រៀមឯកសារពាក់ព័ន្ធរួចជាស្រេចហើយ ដើម្បីរៀបចំដាក់ទៅកាន់ក្រសួងមហាផ្ទៃ។ ប៉ុន្តែលោកមិនទាន់បញ្ជាក់ទេថា នឹងដាក់ទៅនៅពេលណាឲ្យប្រាកដនោះទេ ព្រោះត្រូវរង់ចាំលិខិតបែបបទថ្មីរបស់ក្រសួងមហាផ្ទៃ។
ការស្នើសុំចុះបញ្ជីបង្កើតគណបក្សនយោបាយថ្មី ហើយត្រូវបានអនុញ្ញាតគឺជារឿងធម្មតា។ក៏ប៉ុន្តែរឿងដែលមិនធម្មតានោះ គឺថាអ្នកដែលមានទោសហើយ តែបែរជាអាចស្នើសុំ និងត្រូវបានអនុញ្ញាតឲ្យបង្កើតគណបក្សនៅបានទៅវិញ ដូចយ៉ាងករណីលោកសួន សេរីរដ្ឋា។ លោកសួន សេរីរដ្ឋា ដែលកាលពីថ្ងៃទី១៤ មករា ត្រូវបានតុលាការសាលាដំបូងរាជធានីភ្នំពេញ បានផ្តន្ទាទោសឲ្យជាប់ពន្ធនាគាររយៈពេល៧ឆ្នាំ និងពិន័យជាទឹកប្រាក់ចំនួន២៥ លានរៀលពីបទរួមគំនិតក្បត់ជាតិ។ ចំពោះរឿងនេះ លោកខៀវ សុភ័គ អ្នកនាំពាក្យក្រសួងមហាផ្ទៃ បានគូសបញ្ជាក់ថា ការសម្រេចឲ្យលោកសួន សេរីរដ្ឋា បង្កើតគណបក្សបានទាំងខ្លួនមានទោសបែបនេះ មិនមានខុសនឹងច្បាប់ស្តីពីគណបក្សនយោបាយនោះឡើយ ដោយកន្លងមកក៏ករណីបែបនេះកើតមាននៅក្នុងប្រទេសកម្ពុជាផងដែរ។
ចំពោះការបង្កើតគណបក្សថ្មី សម្រាប់ត្រៀមចូលរួមការប្រកួតប្រជែងការបោះឆ្នោតនាពេលខាងមុខ ធ្លាប់ត្រូវបានលោកសម រង្ស៊ី ប្រធានគណបក្សសង្គ្រោះជាតិបរិហារថា បង្កើតឡើងគ្រាន់តែចង់បំបែកសំឡេងគណបក្សប្រឆាំងប៉ុណ្ណោះ។ ការចោទប្រកាន់នេះ ត្រូវបានតំណាងគណបក្សថ្មីចេញមុខទាត់ចោលជាបន្តបន្ទាប់។
យ៉ាងណាក៏ដោយ លោកសួន សេរីរដ្ឋា បានប្រកាសអំពាវនាវឲ្យប្រជាពលរដ្ឋ យុវជនខ្មែរអ្នកស្នេហាជាតិទាំងអស់ ចូលរួមជាមួយគណបក្សអំណាចខ្មែរ ដើម្បីរួមគ្នាជាមួយនឹងនាវានយោបាយថ្មីដែលមានជំហរនយោបាយ និងមានបេសកកម្មច្បាស់លាស់សម្រាប់ការផ្លាស់ប្តូរពិតៗដែលជាសុបិនរបស់ប្រជាពលករដ្ឋជាយូរយារណាស់ហើយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ