មន្ត្រីកាំកុងត្រូលរឹតបន្តឹងការត្រួតពិនិត្យគីមីក្នុងអាហារ តាមរយៈឧបករណ៍ទំនើប
មន្ត្រីកាំកុងត្រូលនៅទូទាំងរាជធានី-ខេត្តនៃព្រះរាជាណាចក្រកម្ពុជា បានទទួលឧបរណ៍សម្រាប់ពិសោធន៍រកធាតុគីមី ដែលហាមឃាត់ក្នុងអាហារ កាលពីថ្ងៃទី០៧ ខែសីហា។ ឧបករណ៍តេស្ត៍ទាំង ១១គ្រឿងនោះ នឹងត្រូវដាក់នៅតាមច្រកព្រំដែនមួយចំនួន ដោយសារតែវាមានគុណភាព និងសមត្ថភាពខ្ពស់ រហូតដល់ ៩៥ភាគរយ ក្នុងការចាប់សារធាតុគីមីហាមឃាត់។ នេះបើតាមការបញ្ជាក់របស់មន្ត្រីកាំកុងត្រូល។
ចុះផ្សាយនៅថ្ងៃ៖
ស្តាប់ - ០១:៥០
ដើម្បីចូលរួមក្នុងការលើកស្ទួយសុខភាពប្រជាពលរដ្ឋកម្ពុជា រួមទាំងការបង្កើនសុវត្ថិភាពចំណីអាហារនាំចូល និងចំណីអាហារក្នុងស្រុក មន្ត្រីកាំកុងត្រូលកម្ពុជា បានបញ្ជាទិញឧបករណ៍សម្រាប់ពិសោធន៍រកសារធាតុគីមីហាមឃាត់ក្នុងអាហារចំនួន១១គ្រឿងពីប្រទេសថៃ។ នេះបើតាមការបញ្ជាក់របស់ លោក ផាន អូន អគ្គនាយករងនៃអគ្គនាយកដ្ឋានកាំកុងត្រូលកម្ពុជា។
ឧបករណ៍ទាំង ១១គ្រឿងនោះ មានសមត្ថភាពក្នុងការស្វែងរកសារធាតុគីមីហាមឃាត់ ដែលប្រើប្រាស់ក្នុងអាហារ ដោយចំណាយរយៈពេលពី ៥នាទី ទៅ១០នាទីតែប៉ុណ្ណោះ។ មិនតែប៉ុណ្ណោះ លទ្ធផលរបស់វាគេអាចជឿជាក់បានរហូតដល់ប្រមាណ ៩៥ភាគរយ។ ហើយឧបករណ៍ទាំងអស់នោះ នឹងត្រូវប្រើនៅតាមច្រកនាំចូលទំនិញតាមព្រំដែន និងតាមទីផ្សារក្នុងប្រទេស។ ហើយវានឹងត្រូវដាក់ឲ្យប្រើប្រាស់ចាប់ពីថ្ងៃទី ០៧ ខែសីហា នេះតទៅ។
បើតាមលោកអគ្គនាយករងនៃអគ្គនាយកដ្ឋានកាំកុងត្រូលរូបនេះ បានអះអាងថាសារធាតុគីមីចម្បង ដែលត្រូវហាមឃាត់មិនឲ្យប្រើប្រាស់ក្នុងចំណីអាហារមានដូចជា បូរ៉ាក និងហ្វមមីលាន រួមទាំងសារធាតុគីមី ដែលធ្វើឲ្យប៉ះពាល់ដល់សុខភាពមួយចំនួនទៀត។ សារធាតុគីមីទាំងនោះ គឺជាប្រភេទសារធាតុគីមី ដែលដាក់ក្នុងម្ហូបអាហារ ដើម្បីរក្សាសោភ័ណភាពរបស់អាហារឲ្យស្រស់ជានិច្ច។
សារធាតុគីមីទាំងអស់នោះ នឹងធ្វើឲ្យប៉ះពាល់ដល់សុខភាពខ្លាំងជាងសារធាតុគីមីមួយចំនួនទៀត ដោយសារតែវាចូលទៅក្នងរាងកាយរបស់មនុស្ស និងបង្កជាជំងឺផ្សេងៗ ដែលបណ្តាលឲ្យខូចសិរីរាង្គក្នុងរាងកាយដូចជាក្រពះ ថ្លើម ពោះវៀន បេះដូងជាដើម។ នេះបើតាមលោក ផាន អូន។
យោងតាមរបាយការណ៍ចុងក្រោយ របស់អង្គការសុខភាពពិភពលោក(WHO)ស្តីពីសុខភាពប្រជាពលរដ្ឋកម្ពុជាឆ្នាំ២០១២ បានឲ្យដឹងថា ជំងឺដែលបណ្តាលឲ្យប្រជាពលរដ្ឋកម្ពុជាបាត់បង់ជីវិតច្រើនជាងគេនោះ គឺជំងឺបេះដូងស្លោក ឬ IHD ដែលបណ្តាលពីកង្វះឈាមទៅចិញ្ចឹមបេះដូង។ ហើយបើតាមតួលេខដដែលនោះ ជំងឺនេះមានការកើនឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ