សមត្ថកិច្ច ផ្អាកការផាកពិន័យលើលិខិតស្នាមយានយន្ត រហូតដល់មានបទបញ្ជាថ្មី
ការផាកពិន័យចំពោះលិខិតស្នាមយានយន្ត នឹងត្រូវផ្អាកជាបណ្ដោះអាសន្នសិន រហូតដល់មានបទបញ្ជាថ្មី។ នេះគឺជាចំណាត់ការថ្មីមួយទៀតរបស់អគ្គស្នងការនគរបាលជាតិ ដើម្បីសម្រួលដល់ប្រជាពលរដ្ឋដែលកំពុងតែសម្រុកទៅធ្វើលិខិតស្នាមយានយន្តទាំងនេះ។ បើទោះបីជាការផាកពិន័យចំពោះលិខិតស្នាមយានយន្តត្រូវបានផ្អាកក៏ដោយ សមត្ថកិច្ចបានបញ្ជាក់ថា ការត្រួតពិនិត្យការអនុវត្តច្បាប់ចរាចរណ៍នឹងនៅតែធ្វើដដែល ហើយការពិន័យចំពោះបទល្មើសចរាចរណ៍ផ្សេងៗនៅតែបន្តអនុវត្តតាមធម្មតា។
ចុះផ្សាយនៅថ្ងៃ៖
ស្តាប់ - ០២:០២
អគ្គស្នងការដ្ឋាននគរបាលជាតិ នៅថ្ងៃពុធ ទី០៦ខែមករានេះ បានចេញបទបញ្ជាថ្មីទៅកាន់ស្នងការដ្ឋាននគរបាលរាជធានី ខេត្ត និងអធិការដ្ឋាន ក្រុង ស្រុក ខណ្ឌ ឲ្យផ្អាកការផាកពិន័យមួយរយៈចំពោះលិខិតស្នាមយានយន្ត។ លិខិតស្នាមយានយន្តដែលមានជាអាថិ៍ បណ្ណសម្គាល់យានយន្ត បណ្ណបើកបរ បណ្ណត្រួតពិនិត្យលក្ខណៈបច្ចេកទេសយានយន្ត និងអាជ្ញា បណ្ណអាជីវកម្មសម្រាប់រថយន្តដឹកជញ្ជូន។ រយៈពេលនៃការផ្អាកលែងផាកពិន័យលើលិខិតស្នាមយានយន្តនេះ មិនមានកាលកំណត់ទេ គឺត្រូវផ្អាករហូតមានបទបញ្ជាថ្មី។
លោក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ មានប្រសាសន៍ប្រាប់វិទ្យុបារាំងនៅល្ងាចថ្ងៃពុធនេះថា បទបញ្ជាថ្មីរបស់អគ្គស្នងការនគរបាល ជាតិនេះ ធ្វើឡើងក្នុងគោលដៅសម្រួលដល់ប្រជាពលរដ្ឋ ដែលកំពុងតែសម្រុកទៅធ្វើលិខិត ស្នាមយានយន្តទាំងនេះ។ បទបញ្ជាថ្មីនេះ ក៏ផ្ដល់ឱកាសឲ្យក្រសួងសាធារណៈការនិងដឹកជញ្ជូន មានពេលគ្រប់គ្រាន់ក្នុងការផ្ដល់លិខិតស្នាមយានយន្តដល់ប្រជាពលរដ្ឋផងដែរ។ នេះបើតាម លោក រុន រ័ត្នវាសនា។
បើទោះបីជាការផាកពិន័យចំពោះលិខិតស្នាមយានយន្តត្រូវបានផ្អាកក៏ដោយ លោក រុន រ័ត្នវាសនា បញ្ជាក់ថា ការត្រួតពិនិត្យលិខិតស្នាមយានយន្ត និងការអនុវត្តចរាចរណ៍ នៅតែបន្តធ្វើដដែល។ ក្នុងនោះ ប្រសិនបើត្រួតពិនិត្យឃើញថា អ្នកប្រើប្រាស់ផ្លូវនៅមិនទាន់មានលិខិតស្នាមយានយន្តគ្រប់សព្វ សមត្ថកិច្ចនឹងអប់រំណែនាំឲ្យទៅធ្វើ ដោយមិនមានការផាកពិន័យទេ។ នេះចំពោះករណីខ្វះលិខិតស្នាមយានយន្ត។ ដោយឡែក ការពិន័យចំពោះបទល្មើសចរាចរណ៍ផ្សេងៗ នៅតែបន្តអនុវត្តតាមធម្មតា។
គួរជម្រាបជូនថា បញ្ហាលិខិតស្នាមយានយន្ត បានក្លាយទៅជាប្រធានបទក្ដៅនៃការជជែកពិភាក្សា ទាំងពីសំណាក់សង្គមស៊ីវិល និងប្រជាពលរដ្ឋអ្នកប្រើប្រាស់ផ្លូវ។ ភាពចម្រូងចម្រាស់នេះ នាំឲ្យមានការសម្រេចផ្អាកធ្វើបណ្ណបើកបរយានយន្ត និងផ្អាកផាកពិន័យចំពោះបណ្ណបើកបរយានយន្តរួចហើយ កាលពីសប្ដាហ៍មុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ