សាលក្រមលើសំណុំរឿងសហជីពនឹងប្រកាសនៅថ្ងៃទី១១ធ្នូ
គ្មានឡើយវត្តមានប្រធានសហជីពទាំង៦រូប នៅក្នុងសវនាការជំនុំជម្រះនៅព្រឹកថ្ងៃសុក្រទី៧ខែធ្នូនេះ នាសាលាដំបូងរាជធានីភ្នំពេញ ខណៈសវនាការបានបិទបញ្ចប់នៅម៉ោងប្រមាណ១១ ព្រឹកនេះ ។ ដ្បិតតែគ្មានវត្តមានមេសហជីពទាំង៦រូបក៏ដោយ តែមេធាវីរបស់អ្នកទាំង៦មានវត្តមាននៅក្នុងការជំនុំជម្រះនោះ។ បើតាមមេធាវី សាលក្រមលើសំណុំរឿងនេះនឹងប្រកាសនៅថ្ងៃទី១១ធ្នូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
តាមរយៈសវនាការ ដែលបិទបញ្ចប់នៅម៉ោងប្រមាណជា១១ព្រឹកនេះ សហមេធាវីការពារក្ដីឲ្យប្រធានសហជីពទាំង៦រូប លោក ជឹម ធាង បានថ្លែងប្រាប់វិទ្យុបារាំងនៅថ្ងៃសុក្រនេះដោយបង្ហាញក្ដីសង្ឃឹមថា តុលាការនឹងទម្លាក់ចោលបទចោទទាំងស្រុងទៅលើកូនក្ដីរបស់ខ្លួន។ មានក្ដីសង្ឃឹមព្រោះប្រធានសហជីពទាំង៦ ពុំបានស្ថិតនៅក្នុងហេតុការណ៍ ដែលបានកើតឡើងនៅក្នុងឆ្នាំ២០១៣ឡើយ។ ដូច្នេះហើយការប្រកាសសាលក្រមជាក្ដីរំពឹងមួយរបស់ក្រុមមេធាវីនិងជនត្រូវចោទទាំង៦រូប ដែលជាប្រធានសហជីពរំពឹងថា សំណុំរឿងរបស់ខ្លួននឹងបញ្ចប់ត្រឹមថ្ងៃទី១១ខែធ្នូ។ នេះលោក ជឹម ធាង សហមេធាវីការពារក្ដី។
បន្ថែមលើនេះប្រធានសហជីព២រូបក្នុងចំណោម៦រូបជឿជាក់ថា តាមរយៈសវនាការនៅថ្ងៃសុក្រទី៧ខែធ្នូនេះ នឹងទម្លាក់ចោទបទចោទលើពួកគេ ដើម្បីបើកផ្លូវឲ្យសហជីពមានសេរីភាពពេញលេញក្នុងការធ្វើសកម្មភាពទៅតាមវិជ្ជាជីវៈរបស់ខ្លួន ដោយគ្មានសំពាធពីតុលាការទៀតឡើយ ជុំវិញពាក្យបណ្ដឹងប្ដឹងដោយក្រុមហ៊ុនកន្លងមក។
គួររំឭកថា មេដឹកនាំសហជីពទាំងនាក់រួមមាន លោកអាត់ ធន់ លោកប៉ាវ ស៊ីណា លោកស្រីម៉ម ញឹម លោកជា មុនី លោក រ៉ុង ឈុន និងលោកស្រី យ៉ាង សោភ័ណ្ឌ ត្រូវបានតុលាការចោទប្រកាន់ពីបទ ប្រព្រឹត្តហិង្សាដោយចេតនាមានស្ថានទម្ងន់ទោស បទធ្វើឲ្យខូចខាតដោយចេតនាមានស្ថានទម្ងន់ទោស បទគំរាមកំហែងថានឹងធ្វើឲ្យខូចខាតដែលភ្ជាប់នូវបញ្ជាអ្វីមួយ និងបទប្រើមធ្យោបាយ ដើម្បីជាឧបសគ្គដល់ចរាចរណ៍សាធារណៈ។ សកម្មភាពទាំងនេះ បានប្រព្រឹត្តទៅនៅចំណុចមុខសួនឧស្សាហកម្មកាណាឌីយ៉ា ផ្លូវវ៉េងស្រេង កាលពីអំឡុងថ្ងៃទី២៥ ខែធ្នូ ឆ្នាំ២០១៣។
សូមបញ្ជាក់ថា សវនាការនៅថ្ងៃនេះ ធ្វើឡើងបន្ទាប់ពីលោកនាយករដ្ឋមន្ត្រីហ៊ុន សែន បានស្នើជាបន្តបន្ទាប់ឲ្យតុលាការឆាប់បញ្ចប់សំណុំរឿងមេដឹកនាំសហជីពនៅកម្ពុជា ឲ្យបានចប់សព្វគ្រប់នៅត្រឹមឆ្នាំ២០១៨នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ