សង្គមស៊ីវិលជាង៣០ អំពាវនាវឲ្យទម្លាក់ចោលការចោទប្រកាន់លើគណៈកម្មការរៀបចំបុណ្យសពលោកបណ្ឌិត កែម ឡី
អង្គការសង្គមស៊ីវិលជាង៣០ បានចេញសេចក្តីថ្លែងការណ៍រួមគ្នាមួយនៅថ្ងៃទី ៣០ មករា នេះ ដោយអំពាវនាវឲ្យទម្លាក់ចោលការចោទប្រកាន់ ទៅលើមេដឹកនាំអង្គការសង្គមស៊ីវិលនៅកម្ពុជាចំនួន៣រូប ដែលកំពុងនិរទេសខ្លួននៅក្រៅប្រទេស។ សេចក្តីថ្លែងការណ៍បានកត់សំគាល់ថា ការចោទប្រកាន់តាមផ្លូវតុលាការ និងការយាយីទៅលើមេដឹកនាំអង្គការមិនមែនរដ្ឋាភិបាលនៅកម្ពុជា ហាក់កំពុងបន្តកើតមានឡើង។
ចុះផ្សាយនៅថ្ងៃ៖
ស្តាប់ - ០២:១០
គណៈកម្មការរៀបចំបុណ្យសពលោក កែម ឡី ទាំង៣រូបនោះ រួមមាន លោកប៉ា ងួនទៀង ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក មឿន តុលា នាយកប្រតិបត្តិ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស និងព្រះតេជគុណ ប៊ុត ប៊ុនតិញ ស្ថាបនិកនៃបណ្តាញព្រះសង្ឃឯករាជ្យដើម្បីយុត្តិធម៌សង្គម។ ពួកគេ ត្រូវបានចោទប្រកាន់ ពីបទ “រំលោភលើសេចក្តីទុកចិត្ត” តាមមាត្រា ៣៩១ និងមាត្រា ៣៩២ នៃក្រមព្រហ្មទណ្ឌកម្ពុជា កាលពីថ្ងៃទី ៤ មករា ឆ្នាំ២០១៨ ។ ប៉ុន្តែសេចក្តីថ្លែងការណ៍រួមរបស់អង្គការសង្គមស៊ីវិលទាំង៣៥ បានចាត់ទុកការចោទប្រកាន់ដែលធ្វើឡើងតាមពាក្យបណ្តឹងរបស់លោក ពេជ្រ ស្រស់ ប្រធានគណបក្សយុវជនកម្ពុជា កាលពីថ្ងៃទី ៨ កញ្ញា ឆ្នាំ២០១៧ ថា ជាការចោទប្រកាន់ដែលគ្មានមូលដ្ឋាន និងបានបង្ហាញយ៉ាងច្បាស់ថា ជាការគំរាមកំហែង យាយី ដើម្បីបំបិទសំឡេងសង្គមស៊ីវិល និងអ្នកការពារសិទ្ធិមនុស្សនៅកម្ពុជា។
សេចក្តីថ្លែងការណ៍ដែលនាំមុខដោយសហគមន៍បឹងកក់ សហគមន៍បឹងត្របែក មជ្ឈមណ្ឌល សិទ្ធិមនុស្សកម្ពុជា និងអង្គការសង្គមស៊ីវិលជាច្រើនទៀត បានបន្តថា ការចោទប្រកាន់ដោយមិនមានភស្តុតាងទាំងនេះ ហាក់កំពុងកើតឡើង ចំពេលដែលរដ្ឋាភិបាលបានបង្រ្កាបយ៉ាងតឹងរឹង មកលើសំឡេងជំទាស់នៅកម្ពុជា ដែលធ្វើឲ្យលំហការងាររបស់អ្នកការពារសិទ្ធិមនុស្ស និងសង្គមស៊ីវិលមានការរួមតូចកាន់តែខ្លាំង។ ឧទាហរណ៍ ដូចជា ការផ្អាកសកម្មភាពរបស់អង្គការសមធម៌កម្ពុជា ការបិទវិទ្យាស្ថានជាតិប្រជាធិបតេយ្យ ការលុបឈ្មោះអង្គការមាតាធម្មជាតិចេញពីបញ្ជីក្រសួងមហាផ្ទៃ ការបិទការិយាល័យវិទ្យុបរទេសនិយាយភាសាខ្មែរនិងកាសែត The Cambodia Daily ព្រមទាំងការដាក់ទោសទណ្ឌទៅលើអ្នកការពារសិទ្ធិមនុស្សដីធ្លី អ្នកស្រី ទេព វន្នី សកម្មជនបរិស្ថានលោក ហ៊ុន វណ្ណៈ លោក ឌឹម គុណឌី រួមទាំងអតីតអ្នកសារព័ត៌មានវិទ្យុអាស៊ីសេរី លោក យាង សុធារិន និងលោក អួន ឈិន ជាដើម។
នៅចុងបញ្ចប់នៃសេចក្តីថ្លែងការណ៍នេះ បានអំពាវនាវជារួម សុំឲ្យអាជ្ញាធរកម្ពុជាទម្លាក់ចោលការចោទប្រកាន់ប្រឆាំងនឹងអ្នកទាំង៣រូប និងអំពាវនាវឲ្យរដ្ឋាភិបាលកម្ពុជាគោរពរដ្ឋធម្មនុញ្ញកម្ពុជា និងច្បាប់ ស្តីពីសិទ្ធិមនុស្សអន្តរជាតិ ដើម្បីធ្វើឲ្យអង្គការសង្គមស៊ីវិល អាចដំណើរការទៅមុខ ដោយគ្មានការរឹតត្បិត និងការយាយី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ