ទីបំផុតហ៊្វុនស៊ិនប៉ិចបែកគ្នាសារជាថ្មី
នៅថ្ងៃទី៣ កុម្ភៈនេះ ក្រុមលោកញឹក ប៊ុនឆៃ អតីតអនុប្រធានគណបក្សហ្វ៊ុនស៊ិនប៉ិច បានធ្វើសន្និសីទសារព័ត៌មាន ដើរចេញពីគណបក្សហ្វ៊ុនស៊ិនប៉ិច និងបង្កើតគណបក្សថ្មី។គណបក្សថ្មីនេះ មានឈ្មោះថា គណបក្សរួបរួមជាតិ។ ការបែកគ្នានេះ កើតឡើងបន្ទាប់ពីជម្លោះផ្ទៃក្នុងរវាងសម្តេចក្រុមព្រះ និងលោកញឹក ប៊ុនឆៃ បានផ្ទុះនាពេលថ្មីៗចុងក្រោយនេះ។ គណបក្សថ្មីដែលលោក ញឹក ប៊ុនឆៃជាប្រធាន កំពុងរៀបចំឯកសារដើម្បីស្នើបង្កើតគណបក្សទៅកាន់ក្រសួងមហាផ្ទៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
នៅទីបំផុតលោកញឹក ប៊ុនឆៃ និងគ្នីគ្នាបានសម្រេចដើរចេញពីគណបក្សហ្វ៊ុនស៊ិនប៉ិចដែលមានសម្តេចក្រុមព្រះជាប្រធាន ហើយបង្កើតគណបក្សថ្មីខ្លួនឯងដែលមានឈ្មោះថា គណបក្សរួបរួមជាតិ។ ការបែកគ្នានេះ គឺក្រោយការរួមរស់សាជាថ្មីរវាងក្រុមសម្តេចក្រុមព្រះ និងក្រុមលោក ញឹក ប៊ុនឆៃបានជាង១ឆ្នាំពោលគឺក្រោយការបង្រួបបង្រួមកាលពីខែមករា ២០១៥ ។
ថ្លែងក្នុងសន្និសីទសារព័ត៌មាននៅគេហដ្ឋានក្នុងខណ្ឌជ្រោយចង្វា លោកញឹក ប៊ុនឆៃ បានថ្លែងថ្លា៖ “ខ្ញុំបានខិតខំព្យាយាមក្នុងការបង្រួបបម្រួមរវាងគណបក្សហ្វ៊ុនស៊ិនប៉ិច និងគណបក្សសង្គមរាស្ត្ររាជាធិបតេយ្យ។ ខ្ញុំបានសរសេរលាយលក្ខណ៍អក្សរ អស់លទ្ធភាពហើយ។ ដើម្បីកុំឱ្យមានបញ្ហាតទៅទៀតនៅព្រឹកម៉ិញហ្នឹងគឺថាខ្ញុំបានសម្រេច នៅព្រឹកមិញ ដោយសារខ្ញុំបានប្រជុំព្រឹកមិញថ្នាក់ដឹកនាំទាំង២៥ខេត្តក្រុង មានក្រុមការងារប្រតិបត្តិខេត្តហ្នឹង ពិគ្រោះយោបល់ទាំងអស់គ្នាហ្នឹងគឺថាហ្វ៊ុនស៊ិនប៉ិចទៅមុខមិនរួចទេ"។
លោកបានបញ្ជាក់ថា ក្រុមរបស់លោកមិនអាចធ្វើការក្រោមដំបូលដែលមានសម្តេចក្រុមព្រះជាអ្នកដឹកនាបាននោះទេ ព្រោះថាក្នុងគណបក្សហ្វ៊ុនស៊ិនប៉ិច លោកគ្មានអំណាច និងប្រៀបដូចជាទីម៉ោង ក្នុងឋានៈលោកជាអនុប្រធានទី២ ។ បើតាមលោកញឹក ប៊ុនឆៃ ក្រុមលោក៏មិនចង់ឱ្យគណបក្សរាជានិយមដែលជាកេរ្តិ៍ដំណែលរបស់អតីតព្រះមហាក្សត្រសម្តេចឪនរោត្តមសីហនុមានបញ្ហានោះដែរ។
ទន្ទឹមនឹងនេះ ក្រុមគណបក្សហ្វ៊ុនស៊ិនប៉ិចរបស់សម្តេចក្រុមព្រះ មិនមានប្រតិកម្មអ្វីនោះទេ។ ក្រុមដែលបែកចេញមកជាមួយលោក ញឹក ប៊ុនឆៃ មានលោក ទា ចំរ៉ាត់ ខាន់ សាវឿន និងមន្ត្រីជាហ្វ៊ុនស៊ិនប៉ិចប្រមាណជា៣០រូប។
គណបក្សបង្រួបប្រួមដែលមានលោកញឹក ប៊ុនឆៃជាប្រធាននេះ គឺមានសញ្ញាលោឡូហ្គូ វិមានឯករាជ្យ និងឆោព័ន្ធរស្សីចំនួន២៨ ពណ៌មាស និងផ្ទៃពណ៌ខៀវ។ដែលជាសញ្ញាហ្វ៊ុនស៊ិនប៉ិចមុនការបង្រួបបង្រួមជាមួយសម្តេចក្រុមព្រះ។
សូមរំលឹកថា ក្រោយបង្រួបបង្រួមអស់ជារយៈពេលជាងមួយឆ្នាំ តាំងពី២០១៥ ក្រុមរបស់លោក ញឹក ប៊ុនឆៃ និងក្រុមសម្តេចក្រុមព្រះ បានផ្ទុះជម្លោះផ្ទៃក្នុងយ៉ាងស្រួចស្រាវក្នុងរយៈពេលចុងក្រោយនេះ។ ជាជម្លោះដែលលោក ញឹក ប៊ុនឆៃ បានអះអាងសម្តេចក្រុមព្រះតែងតែធ្វើការគាបសង្កត់មកលើក្រុមរបស់លោក និងរុះរើរចនាសម្ព័ន្ធគណបក្សចាស់ដែលធ្វើឱ្យសមាជិកមួយចំនួនធំមិនសប្បាយចិត្ត។ បន្ថែមពីលើនេះលោក ញឹកប៊ុនឆៃ បានបញ្ជាក់ថា សម្តេចក្រុមព្រះបានធ្វើខុសគោលការណ៍ព្រមព្រៀង មុនការបង្រួបបង្រួមខែមករា ២០១៥ ដោយតែងតែរំលឹករឿងចាស់ ហើយទម្លាក់កំហុសមកឱ្យលោកជាអ្នកទទួលខុសត្រូវទាំងស្រុង ដូចជាការទម្លាក់ព្រះអង្គកាលពីឆ្នាំ២០០៦ ការលក់ និងការដោះដូរគណបក្ស និងចោទលោកជាអ្នកធ្វើឱ្យហ្វ៊ុនស៊ិនប៉ិចសូន្យកៅអីជាដើម។
យ៉ាងណាក៏ដោយ ក្រោយការបង្កើតគណបក្សថ្មីចេញពីហ្វ៊ិនស៊ិនប៉ិច លោកញឹក ប៊ុនឆៃអះអាងថា គ្មានការគាំទ្រពីគណបក្សប្រជាជននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ