លោកញឹក ប៊ុនឆៃ ទាមទារយកបក្សចាស់
ក្រុមលោកញឹក ប៊ុនឆៃ នៅថ្ងៃព្រហស្បតិ៍ទី៤ កុម្ភៈនេះបានផ្ញើលិខិតមួយច្បាប់ទៅកាន់ក្រសួងមហាផ្ទៃដើម្បីសុំឱ្យក្រសួងមហាផ្ទៃមោឃៈលើសំណើរបស់គណបក្សហ៊្វុនស៊ិនប៉ិច ដែលបានសមាជច្របាច់បញ្ចូលគ្នាជាមួយគណបក្សសង្គមរាស្ត្ររាជាធិបតេយ្យរបស់សម្តេចក្រុមព្រះ កាលពីថ្ងៃទី១៩ ខែមករា ២០១៥។ ជាលិខិតដើម្បីក្រុមលោកអាចរក្សារូបសញ្ញា បាវចនា និងរចនាសម្ព័ន្ធចាស់។
ចុះផ្សាយនៅថ្ងៃ៖
ស្តាប់ - ០១:៥២
ក្រុមលោកញឹក ប៊ុនឆៃ ចង់ទាមទារយកគណបក្សហ៊្វុនស៊ិនប៉ិចចាស់មកវិញ។ ក្នុងលិខិតផ្ញើទៅកាន់រដ្ឋមន្ត្រីក្រសួងមហាផ្ទៃ លោកញឹក ប៊ុនឆៃ បានបញ្ជាក់ថា ក្រុមលោកអាចមានលទ្ធភាពយកគណបក្សហ៊្វុនស៊ិនប៉ិចចាស់មកវិញបាន ព្រោះថាមុនថ្ងៃទី១៩ មករា ក្រុមលោក និងក្រុមសម្តេចក្រុមព្រះមានគណបក្សពីរផ្សេងគ្នា។ ដូចនេះប្រសិនបើក្រសួងមហាផ្ទៃសម្រេចមោឃភាពលទ្ធផលសមាជថ្ងៃទី១៩រវាងគណបក្សហ៊្វុនស៊ិនប៉ិច និងគណបក្សសង្គមរាស្ត្ររាជាធិបតេយ្យនោះ ក្រុមលោកនៅតែជាម្ចាស់នៃគណបក្សហ៊្វុនស៊ិនប៉ិចដដែល ហើយសម្តេចក្រុមព្រះអាចត្រឡប់ទៅកាន់គណបក្សចាស់វិញបាន។
សូមបញ្ជាក់ថាក្រោយការធ្វើសន្និសីទសារព័ត៌មានដើរចេញពីហ៊្វុនស៊ិនប៉ិចកាលពីថ្ងៃទី៣ កុម្ភៈ លោកញឹក ប៊ុនឆៃ បានសរសេរលិខិតមួយច្បាប់ទៅកាន់ក្រសួងមហាផ្ទៃដោយ បរិហារថាសមាជដែលធ្វើឡើងកាលពីមួយឆ្នាំមុន គឺគ្មានបានផ្ទុយពីលក្ខន្តិកៈគណបក្សហ៊្វុនស៊ិនប៉ិច ហើយការអនុវត្តការងារ ក្រោយសមាជបានរំលោភទៅលើគោលការណ៍នៃការកិច្ចប្រជុំច្របាច់បញ្ចូលគ្នារវាងគណបក្សហ៊្វុនស៊ិនប៉ិច និងគណបក្សសង្គមរាស្ត្ររាជាធិបតេយ្យ។ ជាគោលការណ៍ដែលមិនអនុញ្ញាតឱ្យរំលាយរចនាសម្ព័ន្ធគ្រប់ជាន់ថ្នាក់របស់គណបក្សចាស់នោះទេ។ ហើយការសម្តេចក្រុមព្រះបានផ្លាស់ប្តូរបាវចនាផ្លាកសញ្ញា Logo របស់បក្សចាស់ថែមទៀតផង។ បើតាមការបញ្ជាក់ពីលោក ញឹក ប៊ុនឆៃ ក្រោយការទទួលបានគណបក្សហ៊្វុនស៊ិនប៉ិច ក្រុមលោកនឹងយាងព្រះអង្គម្ចាស់ក្សត្រីនរោត្តម អរគុណរស្មី មកធ្វើជាប្រធានគណបក្សឡើងវិញ និងរក្សារចនាសម្ព័ន្ធចាស់មុនការប្របាច់បញ្ចូលគ្នាដដែល។
សូមរំលឹកថា ក្រុមលោក ញឹក ប៊ុនឆៃកាលពីថ្ងៃទី៣ កុម្ភៈបានសម្រេចដើរចេញពីគណបក្សហ៊្វុនស៊ិនប៉ិច ដែលមានសម្តេចក្រុមព្រះជាប្រធាន បន្ទាប់ពីជម្លោះផ្ទៃក្នុងរវាងលោក និងសម្តេចក្រុមព្រះបានផ្ទុះឡើងក្រោយច្របាច់បញ្ចូលគ្នាប្រមាណ១ឆ្នាំ។ ជាជម្លោះដែលកើតឡើងពីការរំលឹករឿងអតីតកាល និងការបែងចែកអំណាចមិនស្នើគ្នា។ គណបក្សថ្មីរបស់ក្រុមលោក ញឹក ប៊ុនឆៃ មានឈ្មោះថា គណបក្សរួបរួមជាតិ ដែលប្រើប្រាស់សញ្ញាឡូហ្គូចាស់របស់គណបក្សហ៊្វុនស៊ិនប៉ិចចាស់ដដែល។ ទន្ទឹមនឹងការស្នើទាមទារគណបក្សហ៊្វុនស៊ិនប៉ិចត្រឡប់មកវិញនេះ ក្រសួងមហាផ្ទៃបានបញ្ជាក់ថា ក្រសួងនឹងចាត់ការតាមនីតិវិធីច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ