អនុប្រធានគណៈកម្មការទី៦ ៖មិនទាន់មានការកោះប្រជុំលើសំណើវិសោធនកម្មច្បាប់បោះឆ្នោត
អនុប្រធានគណៈកម្មការនីតិកម្ម និងយុត្តិធម៌ លោកអ៊ូ ច័ន្ទឫទ្ធិ បានឲ្យដឹងថារហូតមកដល់ពេលនេះលោកមិនទាន់បានទទួលលិខិតកោះប្រជុំ ដើម្បីជជែកពីសំណើវិសោធនកម្មច្បាប់បោះឆ្នោត ដែលបញ្ជូនមកពីគណៈកម្មាធិការអចិន្ត្រៃយ៍នៃរដ្ឋសភាកាលពីថ្ងៃទី២១ សីហានៅឡើយទេ។
ចុះផ្សាយនៅថ្ងៃ៖
ស្តាប់ - ០១:៥៣
លោកអ៊ូ ច័ន្ទឫទ្ធិបញ្ជាក់ថាលោកមិនដឹងថាសំណើវិសោធនកម្មច្បាប់បោះឆ្នោតបញ្ជូនមកដល់គណៈកម្មការនីតិកម្ម និងយុត្តិធម៌ ដែលមានលោកប៉ែន បញ្ញាជាប្រធានហើយឬនៅទេ។ នៅថ្ងៃទី២៦ ខែសីហានេះ លោកប៉ែន បញ្ញា មិនអាចទាក់ទងសុំការបញ្ជាក់បានទេ។
លោកឡេង ប៉េងឡុង អគ្គលេខាធិការរដ្ឋសភាបានបញ្ជាក់ប្រាប់វិទ្យុបារាំងអន្តរជាតិថា ពេលនេះ គណៈកម្មការនីតិកម្ម និងយុត្តិធម៌ កំពុងតែជជែកពិភាក្សា និងសិក្សាស្រាវជ្រាវ លើសេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ។ បើតាមនីតិវិធីក្រោយពីការជជែក និងសិក្សាស្រាវជ្រាវលើសំណើរួចរាល់ហើយ គណៈកម្មការទី៦ និងចេញរបាយការណ៍មួយបញ្ជាក់ប្រាប់មកគណៈកម្មាធិការអចិន្ត្រៃនៃរដ្ឋសភាវិញ។
សូមជម្រាបជូនថាកាលពីថ្ងៃទី២១ ខែសីហា គណៈកម្មាធិការអចិន្ត្រៃយ៍នៃរដ្ឋសភាបានប្រជុំអនុម័តប្រគល់សេចក្តីស្នើច្បាប់ស្តីពី វិសោធនកម្មច្បាប់ស្តីពី ការបោះឆ្នោតជ្រើសតាំងតំណាងរាស្ត្រទៅឲ្យគណៈកម្មការទី៦នៃរដ្ឋសភា បន្ទាប់ពីតំណាងរាស្ត្រគណបក្សសង្រ្គោះជាតិបានដាក់សំណើកែប្រែមាត្រាមួយចំនួននៃច្បាប់នេះ។ ជាការកែប្រែ និងបន្ថែមមាត្រាមួយចំនួន ដើម្បីឲ្យប្រជាពលរដ្ឋខ្មែរ ដែលកំពុងរស់នៅ និងធ្វើការនៅក្រៅប្រទេសអាចចូលរួមបោះឆ្នោតនាឆ្នាំ២០១៨ខាងមុខនេះ។
លោកសុន ឆ័យ តំណាងរាស្ត្រគណបក្សប្រឆាំង ដែលជាអ្នករៀបចំសំណើកែប្រែច្បាប់នេះ បានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី២៦ ខែសីហានេះថា លោកក៏មិនទាន់បានទទួលព័ត៌មានចុងក្រោយអំពីការពិភាក្សាលើសំណើច្បាប់នេះដែរ។
លោកសុន ឆ័យបន្ថែមថានៅពេលដែលមានសំណើធ្វើវិសោធនកម្មច្បាប់ ដោយដាក់ថាជាការប្រញាប់ និងមានការដាស់តឿនពីរដ្ឋាភិបាល នោះគណៈកម្មការនីតិកម្ម និងយុត្តិធម៌ ហាក់ដូចជាធ្វើបានលឿនជាង។ លោកបញ្ជាក់ថា បើគ្មានការដាស់តឿនពីរដ្ឋាភិបាលទេ នោះគណៈកម្មការសភាអាចប្រើរយៈពេលយូររហូតដល់១ខែ ឬ២ខែក៏មាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ