កិច្ចព្រមព្រៀងរង្គោះរង្គើ នៅពេលកម្ពុជាថា មិនមានគម្រោងទទួលជនភៀសខ្លួនពីអូស្ត្រាលីបន្ថែមទៀត
បីខែបន្ទាប់ពីជនភៀសខ្លួន៤នាក់ពីកោះណេរុប្រទេសអូស្ត្រាលី បានមកតាំងទីលំនៅថ្មីនៅទីក្រុងភ្នំពេញ រដ្ឋាភិបាលកម្ពុជាបានអះអាងថា ខ្លួននៅមិនទាន់មានគម្រោងទទួលជនភៀសខ្លួនពីអូស្ត្រាលីបន្ថែមទៀតទេ។ ការបញ្ជាក់ដូច្នេះ ហាក់ដូចជាផ្ទុយពីជំហរបស់ទីក្រុងកង់បេរ៉ា។ ទីក្រុងកង់បេរ៉ា ដែលនៅតែបញ្ជាក់ពីការបន្តការងាររបស់ខ្លួនជាមួយទីក្រុងភ្នំពេញ ដើម្បីបញ្ជូនជនភៀសខ្លួនមកកម្ពុជាបន្ថែមទៀត តាមគោលការណ៍ស្ម័គ្រចិត្ត។
ចុះផ្សាយនៅថ្ងៃ៖
ស្តាប់ - ០២:០៩
កិច្ចព្រមព្រៀងបញ្ជូនជនភៀសខ្លួនពីអូស្ត្រាលីមកកម្ពុជា កំពុងតែរង្គោះរង្គើរ នៅពេលដែលរដ្ឋាភិបាលកម្ពុជា និងរដ្ឋាភិបាលអូស្ត្រាលីបង្ហាញជំហផ្សេងគ្នា។
បីខែបន្ទាប់ពីជនភៀសខ្លួន៤នាក់ពីកោះណេរុប្រទេសអូស្ត្រាលី បានមកតាំងទីលំនៅថ្មីនៅទីក្រុងភ្នំពេញ រដ្ឋាភិបាលកម្ពុជាបានអះអាងថា ខ្លួននៅមិនទាន់មានគម្រោងទទួលជនភៀសខ្លួនពីអូស្ត្រាលីបន្ថែមទៀតទេ។ លោក ខៀវ សុភ័គ អ្នកនាំពាក្យក្រសួងមហាផ្ទៃ មានប្រសាសន៍ប្រាប់វិទ្យុបារាំង នៅថ្ងៃទី៣១ខែសីហានេះថា ឥឡូវ កម្ពុជាមិនទាន់គិតពីការទទួលជនភៀសខ្លួនពីអូស្ត្រាលីបន្ថែមទេ ដោយផ្ដោតការយកចិត្តទុកដាក់ចម្បងចំពោះជនភៀសខ្លួន៤នាក់ដំបូង ដែលត្រូវបានបញ្ជូនមកកម្ពុជាកាលពីដើមខែមិថុនាជាមុនសិន។
ការបញ្ជាក់ដូច្នេះ ហាក់ដូចជាផ្ទុយពីជំហរបស់ទីក្រុងកង់បេរ៉ា។ ទីក្រុងកង់បេរ៉ា ដែលនៅតែអះអាងពីការបន្តការងាររបស់ខ្លួនជាមួយទីក្រុងភ្នំពេញ ដើម្បីបញ្ជូនជនភៀសខ្លួនមកកម្ពុជាបន្ថែមទៀត តាមគោលការណ៍ស្ម័គ្រចិត្ត។ រដ្ឋមន្ដ្រីអន្តោប្រវេសន៍អូស្ត្រាលី លោក Peter Dutton ប្រាប់សារព័ត៌មានអូស្ត្រាលីថា រដ្ឋាភិបាលទីក្រុងកង់បេរ៉ានៅតែបន្តធ្វើការជាមួយទីក្រុងភ្នំពេញ និងប្រទេសជាដៃគូដទៃទៀត ដើម្បីសម្របសម្រួលការបញ្ជូនត្រឡប់ ឬការតាំងទីលំនៅថ្មីរបស់ជនអន្តោប្រវេសន៍នៅលើកោះណេរុ និងកោះមេនុស។
យ៉ាងណាក៏ដោយ មន្ដ្រីគណបក្សប្រឆាំងអូស្ត្រាលី បានទាមទារឲ្យលោក Peter Dutton ស្រាយបំភ្លឺអំពីករណីនេះ។ ព្រោះបើតាមបក្សប្រឆាំង អូស្ត្រាលីបានចំណាយប្រាក់ច្រើនលានដុល្លារណាស់ សម្រាប់ការបញ្ជូនជនភៀសខ្លួន៤នាក់ ឲ្យមកតាំងទីលំនៅថ្មីនៅកម្ពុជា។
គួរជម្រាបជូនថា រហូតមកទល់ពេលនេះ ជនភៀសខ្លួនពីអូស្ត្រាលីទាំង៤នាក់ កំពុងរស់នៅ ទទួលការបណ្ដុះបណ្ដាលភាសានិងទំនៀមទម្លាប់វប្បធម៌ខ្មែរ នៅក្នុងខណ្ឌច្បារអំពៅ។ រដ្ឋាភិបាលអូស្ត្រាលីបានចំណាយទឹកប្រាក់ប្រមាណ៤៣លានដុល្លារអាមេរិកដល់រដ្ឋាភិបាលកម្ពុជា ជាថ្នូរនឹងការផ្ដល់ទីតាំងស្នាក់នៅរបស់ជនភៀសខ្លួនពីអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ