មរណភាព នួន ជា មិនសូវមានការលូកមាត់ពីអ្នកនយោបាយក្នុងនាមគណបក្ស?
ពីរថ្ងៃក្រោយមរណភាពរបស់ជនជាប់ចោទ នួន ជា អ្វីគួរឲ្យកត់សម្គាល់គេមិនឃើញមានការលូកមាត់ពីអ្នកនយោបាយខ្មែរឡើយ លើកលែងតែអ្នកនយោបាយពីររូបមកពីអតីតគណបក្សសង្គ្រោះជាតិប៉ុណ្ណោះ ម្នាក់ប្រកាសអហោសកម្ម និងម្នាក់ទៀតប្រកាសមិនលើកលែងទោស។ ទោះជាបែបនេះក្ដីអ្នកនាំពាក្យគណបក្សប្រជាជនកម្ពុជាគូសបញ្ជាក់ថា ជុំវិញមរណភាពរបស់ នួន ជា អ្នកនយោបាយនិយាយ ឬមិននិយាយអាស្រ័យលើបបូរមាត់របស់ពួកគេរៀងៗខ្លួន។
ចុះផ្សាយនៅថ្ងៃ៖
ស្តាប់ - ០១:៥៤
លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជាបានគូសបញ្ជាក់ថា គ្មានការណែនាំណាមួយមិនឲ្យអ្នកនយោបាយក្នុងជួរគណបក្សប្រជាជនកម្ពុជា បញ្ចេញមតិជុំវិញមរណភាពរបស់ជនជាប់ចោទ នួន ជា ឡើយ។ មិនចំពោះតែជនជាប់ចោទ នួន ជា បុគ្គលណាទទួលមរណភាពក៏គណបក្សមិនបានធ្វើការហាមឃាត់ដែរ ឲ្យតែសិទ្ធិបញ្ចេញមតិនោះស្ថិតក្នុងក្របខណ្ឌច្បាប់។
សម្រាប់លោក ឈឹម ផលវរុណ មរណភាពរបស់ នួន ជា ជារឿងធម្មជាតិរបស់មនុស្ស ខណៈដែលគាត់មានវ័យចំណាស់ទៅហើយ ហើយម្យ៉ាងទៀតសាធារណៈគួរតែឲ្យគ្រួសារលោក នួន ជា ធ្វើបុណ្យដោយភាពស្ងៀមស្ងាត់។
ដោយឡែកលោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិមើលឃើញថា ទាំងគណបក្សកាន់អំណាច និងអតីតគណបក្សប្រឆាំងមានជំហរប្រយ័ត្នប្រយែងក្នុងការបញ្ចេញមតិជុំវិញមរណភាពរបស់លោក នួន ជា។ ចំណែកគណបក្សប្រឆាំងទំនងជាមិនចង់បញ្ចេញមតិនានា ដោយសារខ្លាចមានការចោទប្រកាន់បន្ថែម។
រីឯបក្សកាន់អំណាចរឹតតែមានភាពប្រុងប្រយ័ត្ន ព្រោះអ្នកកាន់អំណាចបច្ចុប្បន្ន មានជាប់ទាក់ទងជាមួយខ្មែរក្រហមកាលពីអតីតកាល។ នេះបើតាមលោក អ៊ូ ច័ន្ទរ័ត្ន។ លោក អ៊ូ ច័ន្ទរ័ត្ន ដែលជាអ្នកនយោបាយម្នាក់បញ្ចេញមតិជុំវិញការស្លាប់របស់ នួន ជា បានអហោសកម្មដល់ជនជាប់ចោទ នួន ជា ហើយថា នេះជាមេរៀនប្រវត្តិសាស្ត្រ។
បើតាមអ្នកតាមដាននយោបាយ មួយផ្នែកនៃភាពស្ងៀមស្ងាត់ របស់អ្នកនយោបាយ ក្នុងប្រទេសអាចថា ដោយសារជនជាប់ចោទ នួន ជា មេដឹកនាំខ្មែរក្រហមតែម្នាក់គត់ ដែលហ៊ាននិយាយចំៗទៅកាន់ថ្នាក់ដឹកនាំជាន់ខ្ពស់ក្នុងជួររដ្ឋាភិបាលថា មានជាប់ទាក់ទងនឹងសំណុំរឿងប្រវត្តិសាស្ត្រដ៏ជូរចត់មួយនេះ។ ផ្ទុយពីអ្នកនយោបាយមរណភាពរបស់ជនជាប់ចោទ នួន ជា គេសង្កេតឃើញថា អ្នកវិភាគ សង្គមស៊ីវិលបានបញ្ចេញយោបល់ផ្សេងៗគ្នា។ អ្នកខ្លះទាមទារឲ្យតុលាការកំពូលនៃអង្គជំនុំជម្រៈសាលាក្ដីខ្មែរក្រហម ពន្លឿននីតិវិធីកាត់ទោសចំពោះមេដឹកខ្មែរក្រហមដែរនៅមានជីវិតឲ្យបានឆាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ