ជំងឺមិនឆ្លងសម្លាប់ជីវិតប្រជាជនកម្ពុជាស្ទើ់រពាក់កណ្តាល ក្នុងចំនោមការស្លាប់ទាំងអស់
ជំងឺមិនឆ្លងនៅប្រទេសកម្ពុជាបានសម្លាប់ជីវិតមនុស្ស៥៦% ច្រើនជាងជំងឺឆ្លងទូទៅដែលមានត្រឹមតែ ៤៤%ប៉ុណ្ណោះ។ ជំងឺមិនឆ្លងជាជំងឺរុំារៃ មិនកើតឡើងដោយសារមេរោគនោះទេ តែវាកើតឡើងដោយរបបអាហារ និងបរិស្ថានជុំវិញខ្លួន។ ហើយបណ្តាលឲ្យមានពិការភាព បាត់បង់ពលកម្ម និង កំពុងតែគំរាមកំហែងដល់ភាពក្រីក្រកាន់តែខ្លាំង ព្រមទាំងបង្កឲ្យខាតបង់សេដ្ឋកិច្ចជាតិយ៉ាងច្រើន។
ចុះផ្សាយនៅថ្ងៃ៖
ស្តាប់ - ០២:០៧
អត្ថបទដោយ៖ តាន់ គឹមច័ន្ទវាសនា និងហេង ពុធីរៈ
លោកម៉ម ប៊ុនហេង រដ្ឋមន្រ្តីក្រសួងសុខាភិបាល នៅថ្ងៃទី ៨ សីហា បានលើកឡើងថា ផែនការសកម្មភាពពហុវិស័យជាតិសម្រាប់ការការពារនិងការប្រយុទ្ឋនឹងជំងឺមិនឆ្លង (២០១៧-២០២៦) គឺជាការឆ្លើយតបរបស់រដ្ឋាភិបាលកម្ពុជាចំពោះបញ្ហាប្រឈម ដែលកំពុងតែកើនឡើងនៃជំងឺបេះដូង សរសៃឈាម ជំងឺមហារីក ជំងឺផ្លូវដង្ហើមរុំារៃ និងជំងឺទឹកនោមផ្អែម។ ការថ្លែងនេះធ្វើឡើង នៅក្នុងកិច្ចប្រជុំ បេសកកម្មរួមគ្នារបស់ក្រុមការងារអន្តរស្ថាប័ននៃ អង្គការសហប្រជាជាតិ ស្តីពីការបង្ការ និងទប់ស្កាត់ជំងឺមិនឆ្លងមកកាន់ប្រទេសកម្ពុជា។
ជំងឺមិនឆ្លងទាំងបួនប្រភេទខាងលើនេះ ត្រូវបានព្យាករណ៍ថា នឹងមានការកើនឡើងថែមទៀត ដោយសារតែផលវិបាកនៃការផ្លាស់ប្តូរការរស់នៅ និងបរិស្ថាន ដែលកំពុងតែមានការប្រែប្រួល។ ចំពោះវិធានការសម្រាប់ការពារ និងប្រយុទ្ឋនឹងជំងឺមិនឆ្លងឲ្យមានប្រសិទ្ធភាពត្រូវអនុវត្ត ដូចជា កត្តាចំណីអាហារ និងបរិស្ថានដែលយើងរស់នៅ។
លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាព កម្ពុជា បានឲ្យដឹងថា កត្តា៤យ៉ាងដែលជាហានិភ័យរបស់ជំងឺមិនឆ្លង គឺដោយសារការប្រើប្រាស់ថ្នាំជក់ ការប្រើប្រាស់គ្រឿងស្រវឹង ការបរិភោគអាហារដែលមានជាតិប្រៃ ផ្អែម ជាតិខ្លាញ់ច្រើន និង កង្វះកាយវប្បកម្ម។ លោកវេជ្ជបណ្ឌិតក៏បានអំពាវនាវ អោយប្រជាពលរដ្ឋទាំងអស់ចូលរូម កាត់បន្ថយការប្រើប្រាស់ថ្នាំជក់ គ្រឿងស្រវឹង ទទួលទានអាហារដែលមានជាតិប្រៃ និងជាតិខ្លាញ់តិច និងធ្វើលំហាត់ប្រាណ លេងកីឡាឲ្យបានជាប្រចាំ ក្នុងនៃកាត់បន្ថយជំងឺមិនឆ្លងនៅប្រទេសកម្ពុជា។
គួរបញ្ជាក់ផងដែលថា ជំងឺមិនឆ្លងមិនត្រឹមតែជាបញ្ហាសុខភាពតែមួយប៉ុណ្ណោះទេ ប៉ុន្តែវាគឺជាបញ្ហាប្រឈមមួយចំពោះការអភិវឌ្ឍន៍ប្រទេសជាតិផងដែរ ដែលវាគំរាមកំហែងដល់កំណើនសេដ្ឋកិច្ចរបស់កម្ពុជា ក្នុងកិច្ចខិតខំប្រឹងប្រែងកាត់បន្ថយភាពក្រីក្រ និងសង្គមទាំងមូល។ ជំងឺមិនឆ្លងក៏ជាការព្រួយបារម្ភរបស់ពិភពលោកផងដែរ ដែលបានសម្លាប់ជីវិតមនុស្សនៅប្រទេសកម្ពុជាក៏ដូចទូទាំងសកលលោកដែលប្រមាណ៥៦% ។
ជុំវិញបញ្ហានេះ រាជរដ្ឋាភិបាលកម្ពុជាស្នើអោយក្រសួងពាក់ព័ន្ធទាំងអស់ និងដៃគូអភិវឌ្ឍចាត់ទុកជំងឺមិនឆ្លងជាបញ្ហាអាទិភាព និងធ្វើការរួមគ្នាអនុវត្តសកម្មភាពនៅក្នុងផែនការសកម្មភាពពហុវិស័យជាតិនេះ ដើម្បីអោយប្រទេសកម្ពុជាមានលទ្ធភាពកាត់បន្ថយបន្ទុកជំងឺដែលអាចការពារបាន និងកាត់បន្ថយការចំណាយថវិកាជាតិ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ