សាការីខ្មែរជំនាន់ទីមួយបញ្ចប់កម្មសិក្សានៅ ប្រទេសបារាំង
ក្រុមប្រឹក្សា ជាន់ខ្ពស់នៃ សាការីរបស់ប្រទេសបារាំង កាលពីថ្ងៃព្រហស្បតិ៍ ម្សិលមិញ បានធ្វើពិធីបិទវគ្គកម្មសិក្សារបស់សាការីកម្ពុជា ចំនួន១៥នាក់ នៅក្នុងទីក្រុងប៉ារីស។ បន្ទាប់ពីបានធ្វើកម្មសិក្សា រយៈពេល ៦ខែ នៅតាមមន្ទីរសាការីក្នុងប្រទេសបារំាង សាការី ខ្មែរ ទាំង១៥រូបត្រូវចាកចេញពីប្រទេសបារាំង សំដៅកម្ពុជា នៅថ្ងៃសុក្រទី ២៧កុម្ភៈ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៤
កម្មសិក្សា សាការីជំនាន់ទីមួយរបស់កម្ពុជាក្នុងប្រទេសបារាំងបានឈានដល់ទីបញ្ចប់ នៅថ្ងៃព្រហស្បតិ៍ម្សិលមិញ។ វត្តមានរបស់សិស្សសាការីខ្មែរនៅប្រទេសបារាំង ធ្វើឡើង នៅក្នុងក្របខ័ណ្ឌនៃសហប្រតិបត្តិការរវាងក្រុមប្រឹក្សាជាន់ខ្ពស់នៃសាការី បារំាង ជាមួយរាជ បណ្ឌិតសភា វិជ្ជាជីវៈតុលាការក្នុងទីក្រុងភ្នំពេញ។ លោកJean Deleage ជាអ្នកតំណាងរបស់ក្រុមប្រឹក្សាសាការី របស់បារំាង ដើម្បីបណ្តុះបណ្តាលសាការីនៅអាស៊ី ដែលមានកម្ពុជា ឡាវ និងវៀតណាម។
សាការី ជាអ្នកច្បាប់ ដែលប្រកបវិជ្ជាជីវៈសេរី ដែលដើរតួនាទីជាអ្នកធានាប្រយោជន៍ផ្នែកច្បាប់សម្រាប់ប្រជាជន។ ប៉ុន្តែ សាការី មិនមែនជាមេធាវីទេ។ នេះជាអ្វីដែលសិស្សសាការីលី រានាថចង់ ឲ្យប្រជាជនខ្មែរយល់ និងបែងចែកឲ្យបានច្បាស់។ សម្រាប់កាំង ផេងវិញ សាការីអាចដើរតួយ៉ាងសំខាន់ នៅក្នុងសង្គមខ្មែរ។
តាមលោកJean Deleage សេចក្តីព្រាងច្បាប់ស្តីពីសាការីនឹងត្រូវសភាកម្ពុជាបោះឆ្នោត នៅក្នុងឆ្នាំនេះ។ ក្រុមប្រឹក្សាជាន់ខ្ពស់របស់បារាំងកំពុងរង់ចាំមើលលទ្ធផលនៃច្បាប់ថ្មីកម្ពុជា ដើម្បីសម្រេចថា នឹងបន្តឲ្យមានកម្មសិក្សាសាការី ជំនាន់ទីពីរ នៅប្រទេសបារាំង ដែរឬទេ។ សម្រាប់ភាគីបារាំង ដែលចង់ឲ្យមានសាការី ប្រកបវិជ្ជាជីវៈសេរី ឯករាជ្យ មិនស្ថិតក្រោមក្របខ័ណ្ឌរដ្ឋាភិបាល វាច្បាស់ណាស់ថា កម្មសិក្សានឹងអាចជាថ្មី នៅប៉ារីស បើសិនជារដ្ឋាភិបាលកម្ពុជាអនុញ្ញាតឲ្យសាការីអាចប្រកបវិជ្ជាជីវៈ សេរី ព្រោះថា ក្រុមប្រឹក្សាសាការីមិនចង់ទេបណ្តុះបណ្តាលសាការីខ្មែរ ដែលនឹងធ្វើការជាមន្រ្តីរាជការ នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ