ពលរដ្ឋកម្ពុជាផ្លាស់ប្តូរមកប្រើប្រាស់ប្រព័ន្ធផ្សព្វផ្សាយទំនើប
តាមរយៈវេទិកានៃព្រឹត្តិការណ៍អ៊ីនធឺណិតបើកទូលាយ នៅថ្ងៃទី១៦ សីហា នេះ ក្រុមអ្នកសារព័ត៌មានកម្ពុជា បានបញ្ជាក់ថា ប្រជាពលរដ្ឋកម្ពុជាបច្ចុប្បន្ន បានផ្លាស់ប្តួរទំលាប់នៃការប្រើប្រាស់ប្រព័ន្ធផ្សព្វផ្សាយ ដែលមានដូចជាវិទ្យុ ទូរទស្សន៍ កាសែតជាដើមនោះ មកប្រើប្រាស់ប្រព័ន្ធផ្សព្វផ្សាយបែប Digital ទំនើប ជាពិសេសការប្រើប្រាស់ប្រព័ន្ធអ៊ីនធឺណិត ដើម្បីទទួលបានព័ត៌មាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
បច្ចុប្បន្ននេះ ប្រជាពលរដ្ឋកម្ពុជា មួយភាគបានបោះបង់ចោលការប្រើប្រាស់ប្រព័ន្ធផ្សព្វផ្សាយចាស់ ដោយបានងាកមកប្រើប្រព័ន្ធផ្សព្វផ្សាយបែបទំនើបវិញ។ មូលហេតុនៃ ការផ្លាស់ប្តូរនិន្នាការនៃការប្រើប្រាស់ឬទទួលយកប្រព័ន្ធផ្សព្វផ្សាយទំនើបនេះ ត្រូវបានលោក សាយ មុន្នី ជាសាស្ត្រាចារ្យផ្នែកសារព័ត៌មាន នៅសាកលវិទ្យាល័យភូមិន្ទភ្នំពេញបានបញ្ជាក់ថា នេះគឺជាការវិវឌ្ឍរបស់ពិភពលោក ដែលមានការជឿនលឿនផ្នែកបច្ចេកវិទ្យា។ ដូច្នេះ ចង់ ឬមិនចង់ ប្រជាពលរដ្ឋកម្ពុជា ត្រូវតែសម្របខ្លួនទៅនឹងការប្រើប្រាស់បច្ចេកវិទ្យាទាំងនោះ ដើម្បីទទួលបានព័ត៌មាន។
ម្យ៉ាងវិញទៀត ដោយសារតែប្រព័ន្ធអ៊ីនធឺណិត ឬប្រព័ន្ធផ្សព្វផ្សាយសម័យថ្មីនេះ អាចផ្តល់ជូនអ្នកស្តាប់ អ្នកទស្សនា អ្នកអាននូវព័ត៌មានគ្រប់បែបយ៉ាង ដូចជាវីដេអូ សម្លេង អត្ថបទជាដើម ធ្វើឲ្យពួកគាត់ងាយស្រួលក្នងការជ្រើសរើស។
ក្នុងវេទិកា ដែលមានសិស្សនិស្សិតចូលរួមប្រមាណ ៤០នាក់នេះ លោក លាង ឌឺលុច មកពីគេហទំព័រសារព័ត៌មានថ្មីៗ បានឲ្យដឹងដែរថា ការងាកមកប្រើប្រាស់ប្រព័ន្ធអ៊ីនធឺណិត ឬប្រព័ន្ធផ្សព្វផ្សាយថ្មីនេះ គឺដោយសារតែព័ត៌មានលឿនជាងប្រព័ន្ធផ្សព្វផ្សាយកាលពី១០ឆ្នាំមុន និងតម្លៃឧបរកណ៍ ដែលអាចភ្ជាប់អ៊ីនធឺណិតបានក៏មានតម្លៃសមរម្យក្នុងប្រើប្រាស់។ ម៉្យាងទៀតដោយសារ តែធម្មជាតិរបស់មនុស្សចង់ដឹងព័ត៌មានផងនោះ ទើបធ្វើឲ្យមានការតាមដានព័ត៌មានច្រើនក្នុងពេលបច្ចុប្បន្ន។
សេចក្តីបំភ្លឺទាក់ទងនឹងសេចក្តីព្រាងច្បាប់ឧក្រិដ្ឋកម្មតាមប្រព័ន្ធអ៊ីនធឺណិតរបស់ក្រសួងប្រៃសនីយ៍ កាលពីថ្ងៃទី ២៥ ខែឧសភា បានឲ្យដឹងថាចំនួនអ្នកប្រើប្រាស់អ៊ីនធឺណិតបានហក់ពីជាង៣សែននាក់ ក្នុងឆ្នាំ២០១០ មកដល់ ជាង ៥លាននាក់ ក្នុងខែកុម្ភៈឆ្នាំ២០១៥ គឺកើនឡើងប្រមាណ១៦ដង ។ចំនួនអ្នកប្រើប្រាស់សេវាទូរស័ព្ទចល័តបានកើនឡើងចំនួន ២១,៩២ លាននាក់ ត្រឹមខែមិថុនាឆ្នាំ២០១៤។
ខណៈពេលដែលប្រជាពលរដ្ឋកម្ពុជាបានងាកមកប្រើប្រាស់អ៊ីនធឺណិត ឬប្រព័ន្ធផ្សព្វផ្សាយ Digital កាន់តែច្រើននោះ រដ្ឋាភិបាលបានត្រៀមនឹងបង្កើតច្បាប់មួយ ដើម្បីប្រឆាំងនឹងឧក្រិដ្ឋកម្ម និងបទល្មើសទាំងឡាយតាមប្រព័ន្ធបច្ចេកវិទ្យាគមនាគមន៍។ យ៉ាងណាមិញ សង្គមស៊ីវិលមួយចំនួនកំពុងតែមានការព្រួយបារម្ភចំពោះសេចក្តីព្រាងច្បាប់ថ្មីនេះ។
សូមបញ្ជាក់ថាព្រឹត្តិការណ៍អ៊ីនធឺណិតបើកទូលាយ ធ្វើឡើងនៅភោជនីយដ្ឋានទន្លេបាសាក់២ នៅថ្ងៃទី១៦ សីហា នេះ បានលើកឡើងនូវប្រធានបទចំនួនបួន ដែលមានដូចជា សិទ្ធិប្រើប្រាស់អ៊ីនធឺណិត បណ្តាញសង្គមយក្ស ឧក្រិដ្ឋកម្មតាមប្រព័ន្ធបច្ចេកវិទ្យា និងសុវត្ថិភាពអ៊ីនធឺណិត និងសារព័ត៌មានលើបណ្តាញ និងព័ត៌មានទាន់ហេតុការណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ