ជំនួប១ម៉ោងកន្លះរវាងបក្សប្រឆាំង និងក្រសួងមហាផ្ទៃ គ្មានបានដោះស្រាយបញ្ហាអីចេញ
តំណាងបក្សសង្រ្គោះជាតិ និងតំណាងក្រសួងមហាផ្ទៃ បានចំណាយពេល ១ម៉ោងកន្លះកាលពីរសៀលម្សិលមិញ ដើម្បីពិភាក្សាពីបញ្ហាសមាជជ្រើសរើសក្បាលម៉ាស៊ីនបក្សប្រឆាំងដែលក្រសួងចោទថា ខុសនឹងលក្ខន្តិកបក្ស។ ប៉ុន្តែជំនួបនេះ មិនបានផ្តល់លទ្ធផលអ្វីទេ គឺគ្មានបានដោះស្រាយបញ្ហាអ្វីចេញឡើយ ។
ចុះផ្សាយនៅថ្ងៃ៖
ស្តាប់ - ០២:២៦
បញ្ហាគឺនៅត្រង់ថា ក្រសួងមហាផ្ទៃនៅតែអះអាងថា សមាជជ្រើសរើសក្បាលម៉ាស៊ីនថ្មីរបស់គណបក្សសង្រ្គោះជាតិ បានធ្វើឡើងផ្ទុយនឹងលក្ខន្តិកគណបក្សប្រឆាំងដែលតម្កល់ទុកនៅក្រសួងមហាផ្ទៃដដែល។ ក៏ប៉ុន្តែគណបក្សសង្រ្គោះជាតិវិញ បានបញ្ជាក់បញ្រ្ចាសគ្នាវិញថា ក្រសួងមហាផ្ទៃបានទទួលស្គាល់នូវដំណើរការនៃសមាជវិសាមញ្ញរបស់គណបក្សសង្រ្គោះជាតិ ហើយថែមទាំងមិនយល់ទាស់ការធ្វើវិសោធនកម្មប្រការ ៤៥ និងប្រការ ៤៧នៃលក្ខន្តិករបស់គណបក្សសង្រ្គោះជាតិ។ បន្ថែមលើនេះ លោកអេង ឆៃអ៊ាង ដែលជាអនុប្រធានថ្មីគណបក្សប្រឆាំង ចង់ឲ្យក្រសួងមហាផ្ទៃចេញលិខិតផ្លូវការមួយ ដើម្បីបញ្ជាក់ពីភាពត្រឹមត្រូវនៃដំណើការទាំងនេះថែមទៀត។
សូមជំរាបជូនថា មុនកិច្ចប្រជុំនេះកើតឡើង ក្រសួងមហាផ្ទៃបានរកឃើញថា គណបក្សសង្រ្គោះជាតិបានធ្វើសមាជវិសាមញ្ញដើម្បីជ្រើសរើសក្បាលម៉ាស៊ីនគណបក្សកាលពីថ្ងៃទី ២ មីនាកន្លងទៅ គឺ ខុសនឹងលក្ខន្តិករបស់ខ្លួនឯងត្រង់ប្រការ ៤៧ ចំណុចទី ២ ។ គឺប្រការនោះ តម្រូវឲ្យអនុប្រធានគណបក្សគឺលោកកឹម សុខាឡើងធ្វើជាប្រធានស្តីទី ខណៈដែលលោកសម រង្ស៊ីលាលែងតិចជាង ១៨ខែ ហើយគណបក្សត្រូវជ្រើសរើសអនុប្រធានថ្មីមួយរូបទៀតចេញពីគណៈកម្មាធិការនាយកគណបក្ស ដើម្បីជួយការងារប្រធានស្តីទី ហើយក្នុងរយៈពេលលើសពី ១៨ខែទើបគណបក្សអាចធ្វើសមាជ ដើម្បីជ្រើសរើសប្រធាន និងអនុប្រធានបាន ដើម្បីដឹកនាំរហូតដល់ចប់អាណត្តិ។ ក៏ប៉ុន្តែគណបក្សសង្រ្គោះជាតិ បានធ្វើសមាជជ្រើសរើសក្បាលម៉ាស៊ីនគណបក្ស គឺបន្ទាប់ពីលោកសម រង្ស៊ី បានលាលែងប្រមាណជាពីរខែប៉ុណ្ណោះ។
នៅត្រង់ចំណុចនេះ ក្រសួងមហាផ្ទៃបានសង្កត់ធ្ងន់ថា គណបក្សប្រឆាំងត្រូវធ្វើសំណើរមកកាន់ក្រសួងមហាផ្ទៃឲ្យទទួលស្គាល់លក្ខន្តិកថ្មីសិន ទើបគណបក្សអាចជ្រើសរើសក្បាលម៉ាស៊ីនថ្មីដែលមានប្រធាន ១រូប និងអនុប្រធាន ៣រូបបាន ដែលនេះ គឺត្រឹមត្រូវតាមលក្ខន្តិក។ លោកប្រាក់ សំអឿន ដែលអគ្គនាយក អគ្គនាយកដ្ឋានរដ្ឋបាលនៃក្រសួងមហាផ្ទៃ បានតម្រូវឲ្យគណបក្សសង្រ្គោះជាតិកែតម្រូវឲ្យស្របតាមលក្ខន្តិកដែលបានតម្កល់ទុកនៅក្រសួងមហាផ្ទៃ បើមិនដូច្នេះទេ ក្រសួងមហាផ្ទៃនឹងមានវិធានការផ្សេងទៀត តែលោកមិនបានបង្ហាញថា ជាវិធានការបែបណាឡើយ។
សម្រាប់គណបក្សសង្រ្គោះជាតិ លោកអេង ឆៃអ៊ាង បានគូសបញ្ជាក់ថា រឿងទាំងនេះ គឺជារឿងផ្ទៃក្នុងរបស់គណបក្ស ហើយក្រសួងមហាផ្ទៃបានលូកដៃចូលមកជ្រៅ ដូច្នេះ គណបក្សសង្រ្គោះជាតិនឹងពិនិត្យពិភាក្សាបន្ថែមទៀត ដើម្បីដោះស្រាយបញ្ហានេះ។ ប៉ុន្តែលោកអេង ឆៃអ៊ាង បានអះអាងហើយថា បើទោះបីលក្ខន្តិកចាស់ក្តីឬថ្មីក្តី ក៏លោកកឹម សុខា នៅតែជាប្រធានគណបក្សសង្រ្គោះជាតិដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ