ក្រុមហ៊ុនបញ្ជាទិញទទូចឲ្យកម្ពុជាទម្លាក់ចោលការចោទប្រកាន់លើមេដឹកនាំសហជីពនិងគោរពសិទ្ធិការងារ
តំណាងក្រុមហ៊ុនបញ្ជាទិញទំនិញល្បីៗពីប្រទេសកម្ពុជា កាលពីថ្ងៃទី ១៩ មីនា បានផ្ញើលិខិតចំហមួយទៅកាន់លោកនាយករដ្ឋមន្រ្តី ហ៊ុន សែន ដោយបានអំពាវនាវឲ្យទម្លាក់ចោលការចោទប្រកាន់លើប្រធានសហជីពមួយចំនួននៅកម្ពុជា និងគោរពសិទ្ធិមនុស្សនិងសិទ្ធិការងារ។ តាមរយៈលិខិតចំហនេះ ក្រុមអ្នកបញ្ជាទិញយីហោម៉ាកល្បីៗមកពីសហរដ្ឋអាមេរិកនិងអឺរ៉ុបនេះ ក៏បានសំដែងការព្រួយបារម្ភកាន់តែខ្លាំង ជុំវិញច្បាប់ស្តីពីសហជីព និងច្បាប់ការងារបច្ចុប្បន្ននៅក្នុងប្រទេសកម្ពុជា។
ចុះផ្សាយនៅថ្ងៃ៖
ស្តាប់
នៅក្នុងលិខិតចំហដែលផ្ញើទៅកាន់លោកនាយករដ្ឋមន្រ្តី ហ៊ុន សែន កាលពីថ្ងៃទី ១៩ មីនា ក្រុមអ្នកបញ្ជាទិញយីហោល្បីៗ មកពីសហរដ្ឋអាមេរិក និងសហភាពអឺរ៉ុប បានទទូចឲ្យរដ្ឋាភិបាលកម្ពុជា ទម្លាក់ចោលការចោទប្រកាន់លើមេដឹកនាំសហជីព និងអ្នកការពារសិទ្ធិមនុស្សនៅក្នុងប្រទេសកម្ពុជា ចាប់តាំងពីឆ្នាំ២០១៤មក។ ក្នុងនោះរួមមាន លោក មឿន តុលា ប្រធានមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស, ព្រះតេជគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ ដើម្បីយុត្តិធម៌សង្គម និងលោក ប៉ាង ងួងទៀង ប្រធានមជ្ឈមណ្ឌលកម្ពុជាសម្រាប់ប្រព័ន្ធផ្សព្វផ្សាយឯករាជ្យ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ), លោក រ៉ុង ឈុន លោកស្រី ម៉ម ញឹម, លោក ជា មុនី, លោក ប៉ាវ ស៊ីណា រួមទាំងករណីក្តីក្តាំនៅក្នុងតុលាការជាច្រើនករណីទៀត ដែលប្រឆាំងនឹងមេដឹកនាំសហជីព និងអ្នកការពារសិទ្ធិមនុស្សនាពេលកន្លងមក។
ក្រុមអ្នកបញ្ជាទិញទាំងនោះ គឺមកពីសហរដ្ឋអាមេរិក អឺរ៉ុប និងនៅលើពិភពលោក ដែលមានលោក Rick Helfenbein ប្រធានសមាគមអ្នកបញ្ជាទិញអាមេរិកកាំង លោក Christian Ewert នាយកប្រតិបត្តិក្រុមហ៊ុន amfori រួមជាមួយតំណាងក្រុមហ៊ុនអ្នកបញ្ជាទិញមួយចំនួនទៀត ដូចជា ក្រុមហ៊ុន Fair Wear Foundation ជាដើម។ ពួកគេបានសំដែងការព្រួយបារម្ភកាន់តែខ្លាំងឡើង ជុំវិញច្បាប់ការងារបច្ចុប្បន្ន ដែលពួកគេបានពិពណ៌នាថា ជាការរឹតត្បិត និងជារឿងអយុត្តិធម៌។ ក្រៅពីនោះ ពួកគេក៏បានអំពាវនាវឲ្យរដ្ឋាភិបាលដកចោលបំរាមសំណើសុំស្រាវជ្រាវដោយឯករាជ្យមួយ លើការចរចាប្រាក់ខែអប្បបរមារបស់កម្មករ និងសេចក្តីព្រាងច្បាប់ស្តីពីវិវាទការងារផងដែរ។ នេះគឺជាលិខិតចំហទី២ហើយ បន្ទាប់ពី៥ខែមុន ក្រុមអ្នកបញ្ជាទិញទាំងនេះ បានទទូចម្តងរួចមកហើយ និងបានមើលឃើញថា មានការជឿនលឿនតិចតួចប៉ុណ្ណោះ។
តាមរយៈលិខិតចំហនេះ ក្រុមអ្នកបញ្ជាទិញអះអាងថា ពួកគេបានត្រៀមខ្លួនរួចជាស្រេចដើម្បីសហការធ្វើការងារជាមួយរដ្ឋាភិបាលកម្ពុជា ដើម្បីធ្វើឲ្យប្រសើរឡើងនូវសិទ្ធិការងារ សិទ្ធិមនុស្ស និងការរស់នៅកាន់តែប្រសើរឡើងរបស់កម្មករកម្ពុជា ហើយជាអ្វីដែរលោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ) បានគាំទ្រ។
យ៉ាងណាក៏ដោយ លិខិតចំហនេះ ត្រូវគេសង្កេតឃើញថាផ្ទុយពីជំហររបស់ក្រុមហ៊ុនអាមេរិកមួយ ដែលទើបតែសន្យាថា ខ្លួននឹងបន្តទិញទំនិញពីប្រទេសកម្ពុជា។ ការអះអាងនោះ បានធ្វើឡើងកាលពីថ្ងៃទី ១៩ មីនា បន្ទាប់ពីមានជំនួបរវាងរដ្ឋមន្ត្រីក្រសួងការងារកម្ពុជា លោក អ៊ិត សំហេង និងលោក Bradford Van Voorhees អ្នកគ្រប់គ្រងជាន់ខ្ពស់នៃក្រុមហ៊ុន VF Corporation កាលពីថ្ងៃទី១៩ ខែមីនា។ ក្រុមហ៊ុននេះបានអះអាងថា ខ្លួនជាក្រុមហ៊ុនសារជីវកម្មដ៍ធំមួយរបស់សហរដ្ឋអាមេរិក ដែលបានទិញទំនិញពីកម្ពុជា ក្នុងទំហំទឹកប្រាក់ចន្លោះពី៣៥០លានដុល្លារ ទៅ៤០០លានដុល្លារក្នុងមួយឆ្នាំៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ