លោកអ៊ូ វីរៈ ចេញផ្សាយកំណត់ត្រា និងការវិភាគស្ថានភាពនយោបាយកម្ពុជាបច្ចុប្បន្ន
កំណត់ត្រាសង្ខេបស្តីពីទិដ្ឋភាពរួម និងការវិភាគស្ថានភាពនយោបាយនាពេលបច្ចុប្បន្ននៅកម្ពុជា ដែលមានកំរាស់៣៩ ទំព័រជាភាសាខ្មែរ និងជាភាសាអង់គ្លេស កំរាស់២០ទំព័រ របស់វេទិកាអនាគត ដែលមានលោកអ៊ូ វីរៈជាប្រធាននោះ ត្រូវបានដាក់ចេញផ្សាយជាសាធារណៈ នៅថ្ងៃទី៣ កុម្ភៈម្សិលមិញនេះ តាមរយៈអនឡាញ។ កំណត់ត្រាសង្ខេបនេះមាន៧ចំណុចធំៗដែលនិយាយពីស្ថានភាពនយោបាយនៅកម្ពុជា។ ក្នុងនោះមានសេចក្តីផ្តើម បរិបទរួម ការវិភាគ ហានិភ័យ យុទ្ធសាស្ត្រ អនុសាសន៍ផ្នែកគោលនយោបាយ និងចំណុចចុងក្រោយគឺសេចក្តីសន្និដ្ឋាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
ក្នុងសេចក្តីផ្តើមបានបង្ហាញថា កំណត់ត្រាសង្ខេបនេះលើកឡើងពីទិដ្ឋភាពរួម និងការវិភាគដែលមានលក្ខណៈស៊ីជម្រៅជុំវិញស្ថានភាពនយោបាយនាពេលបច្បុប្បន្ន។ ដំបូងកំណត់ត្រានេះ ពិនិត្យមើលលើការវិវឌ្ឍស្ថានភាពនយោបាយនានា ដែលបានកើតឡើងនៅក្នុងអំឡុងពេល៦ខែចុងក្រោយ នៃឆ្នាំ២០១៥ មុននឹងធ្វើការតាមដានការវិវឌ្ឍជុំវិញការបោះឆ្នោតជាតិឆ្នាំ២០១៣ ទាំងដំណើរការឆ្ពោះទៅកាន់ការបោះឆ្នោត និងលទ្ធផលក្រោយការបោះឆ្នោត ដែលជាបរិបទសំខាន់នាំឲ្យមានស្ថានភាពនយោបាយមួយដែលមិនមានការផ្លាស់ប្តូរទាល់តែសោះ។
ក្នុងបរិបទរួម បង្ហាញថា បើសង្កេតមើលចាប់ពីអំឡុងពេលបោះឆ្នោតជាតិឆ្នាំ២០១៣ ដែលគណបក្សប្រជាជនបានទទួលជ័យជម្នះយ៉ាងប្រកៀកប្រកិតគ្នា និងប្រឈមនឹងបាតុកម្មតវ៉ាទ្រង់ទ្រាយធំប្រឆាំនិងរដ្ឋាភិបាលអស់ជាច្រើនខែរួចមក លោកនាយករដ្ឋមន្ត្រីហ៊ុនសែន និងគណបក្សគ្រប់គ្រងអំណាចរបស់ខ្លួនទំនងដូចជាគ្រប់គ្រងស្ថានការនយោបាយឡើងវិញ។ ក៏ប៉ុន្តែពាក់កណ្តាលឆ្នាំ២០១៥ គណបក្សប្រជាជនបានធ្វើការបង្រ្កាបយ៉ាងហិង្សា និងដោយគ្មានការរំពឹងទុក ប្រឆាំងនឹងគណបក្សសង្គ្រោះជាតិ ដោយប្រើយុទ្ធសាស្ត្រជាច្រើន រួមទាំងអំពើហិង្សា ការបំភិតបំភ័យ និងការយាយីតាមផ្លូវតុលាការ។
បន្តចូលមកដល់ចំណុចវិភាគវិញ។ ការបោះឆ្នោតជាតិឆ្នាំ២០១៣ ជារបត់នៃការផ្លាស់ប្តូរមួយ។ ថ្វីបើមានភាពមិនប្រក្រតីនៃការបោះឆ្នោតដ៏គួរឲ្យកត់សម្គាល់ជាច្រើន និងយុទ្ធនាការបោះឆ្នោតនៅតាមមូលដ្ឋានដែលមិនមានលក្ខណៈស្មើភាពគ្នាយ៉ាងណាក្តី គណបក្សសង្គ្រោះជាតិបានបង្កបញ្ហាជាខ្លាំងដល់គណបក្សប្រជាជនកម្ពុជា ដែលបញ្ហាដំបូងនៅមណ្ឌលបោះ ឆ្នោត និងបញ្ហាបន្ទាប់គឺនៅតាមដងវិថីក្នុងរាជធានីភ្នំពេញ។ ការផ្លាស់ប្តូរមួយដែលគណបក្សប្រជាជនបានធ្វើនោះគឺ លោកនាយករដ្ឋមន្ត្រីហ៊ុន សែន បានផ្តល់ទំនុកចិត្តដល់លោកសាយ សំអាល់ ដែលត្រូវជាកូនប្រុសរបស់លោកសាយ ឈុំ ធ្វើជារដ្ឋមន្ត្រីក្រសួងបរិស្ថាន ដើម្បីដោះស្រាយករណីរំលោភបំពានធ្ងន់ធ្ងរកើតចេញពីដីសម្បទានសេដ្ឋកិច្ច។ បន្ទាប់មកមានលោកហង់ ជួនណារ៉ុន រដ្ឋមន្ត្រីថ្មីទទួលបន្ទុកដឹកនាំក្រសួងអប់រំ យុវជន និងកីឡា កំពុងតែធ្វើកំណែទម្រង់យ៉ាងប្រាកដប្រជា និងឃើញលទ្ធផលជាក់ស្តែងនៅក្នុងវិស័យអប់រំ។
ស្រដៀងគ្នានេះដែរ ក៏មាន រដ្ឋមន្ត្រីថ្មីទទួលបន្ទុកដឹកនាំក្រសួងពាណិជ្ជកម្ម លោកស៊ុន ចាន់ថុល បានធ្វើការធានាថា សហគ្រាសអាជីវកម្មអាចចុះបញ្ជីពាណិជ្ជកម្មថ្មីតាមប្រព័ន្ធអនឡាញផ្ទាល់ គិតត្រឹមថ្ងៃទី៤ មករា ឆ្នាំ២០១៦ ដែលធ្វើឲ្យដំណើរការនេះមានតម្លៃថោក ឆាប់រហ័ស និងកាត់បន្ថយអំពើពុករលួយបានច្រើនជាងមុន។
ក្នុងកំណត់ត្រាសង្ខេបរបស់លោកអ៊ូ វីរៈ បានលើកឡើងថា ថ្វីបើមានចំណុចអវិជ្ជមានច្រើនក្តី តែទាំងអស់នេះក៏ជារឿងសំខាន់មួយដែរ ដែលគួរតែលើកសរសើរពីគុណសម្បត្តិខ្លះរបស់គណបក្សប្រជាជនកម្ពុជា។ គណបក្សសង្គ្រោះជាតិមានហេតុផលច្រើនណាស់ ដើម្បីបង្កើតឡើងក្នុងការចាប់ផ្តើមប្រកួតប្រជែងជាមួយនឹងគណបក្សប្រជាជនដោយផ្តោតលើមូលដ្ឋានគ្រឹះនៃគោលនយោបាយ និងបង្ហាញថាខ្លួនមានសមត្ថភាពគ្រប់គ្រាន់ក្នុងការរៀបចំដឹកនាំរដ្ឋាភិបាល។
ក្រៅពីចំណុចដែលបានរៀបរាប់ខាងលើ នៅមានចំនុចហានិភ័យ យុទ្ធសាស្រ្ត អនុសាសន៍ផ្នែកគោលនយោបាយ និងសេចក្តីសន្និដ្ឋានចុងក្រោយ ដែលមានលម្អិតនៅក្នុងកំណត់ត្រាសង្ខេបជាភាសាខ្មែរ ដែលមានកំរាស់៣៩ ទំព័ររបស់លោកវិទ្យាស្ថានវេទិកាអនាគត ដែលត្រូវបានបង្កើតឡើងដោយលោកអ៊ូ វីរៈ ជាប្រធាន និងជាសកកម្មជនសិទ្ធមនុស្ស និងជាអ្នកវិភាគស្ថានភាពនយោបាយដ៏សកម្មម្នាក់នៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ