តុលាការកំពូលសម្រេចប្រកាសសាលក្រមលោក អ៊ុំ សំអាននៅថ្ងៃទី ១៧ សីហា
តុលាការកំពូលនឹងប្រកាសសាលក្រមលោក អ៊ុំ សំអាន តំណាងរាស្រ្តគណបក្សសង្គ្រោះជាតិ នៅថ្ងៃទី ១៧ សីហាសប្តាហ៍ក្រោយ។ ការប្រកាសរបស់តុលាការកំពូលដូច្នេះបានធ្វើឡើងបន្ទាប់ពីសាវនាការដែលផ្ដោតទៅលើបណ្តឹងសុំនៅក្រៅឃុំបណ្តោះអាសន្ន ដែលប្តឹងដោយលោក អ៊ុំ សំអាននៅព្រឹកថ្ងៃ ទី ១០ សីហាឆ្នាំ ២០១៦នេះ។អត្តបទដោយ ប៉ោ គីមហុក៖
ចុះផ្សាយនៅថ្ងៃ៖
ស្តាប់ - ០១:៥៣
បន្ទាប់ពីបញ្ចប់ការជំនុំជម្រះលោក ហែម សុជាតិ ការពារក្ដីឲ្យ លោក អ៊ុំ សំអាន បានប្រាប់អ្នកសារព័ត៌មានថាលោកមានក្ដីរំពឹងទុកខ្ពស់ថា តុលាការកំពូលនឹងធ្វើការពិចារណាលើការស្នើសុំនៅក្រៅឃុំរបស់កូនក្ដីលោក។ ការរំពឹងទុកនេះដោយលោក លើកហេតុផលថាមេធាវីទាំង៣រូប ដែលការពារក្ដីអោយលោក អ៊ុំ សំអាន សុទ្ធតែបានលើកឡើងនូវ សំអាងផ្លូវច្បាប់ដែលអាចបញ្ជាក់ថា លោក អ៊ុំ សំអានអាចមានសិទ្ធិនៅក្រៅឃុំបាន។ ការលើកឡើងនេះដោយសារតែ ទី១ ក្រមព្រហ្មទណ្ឌនៃព្រះរាជាណាចក្រកម្ពុជាមិនបានចែងថាការប្រើប្រាស់បណ្ដាញសង្គម ហ្វេសប៊ុកជាបទល្មើសនោះទេ។ លុះត្រាតែ មនុស្សណាម្នាក់ចូលទៅបំផ្លាញទិន្នន័យតាមប្រព័ន្ធកំព្យូទ័រទើបចាត់ទុកថាជាបទល្មើស។
សំអាងផ្លូវច្បាប់ទី២ គឺដោយសារតែ ករណីរបស់លោក អ៊ុំ សំអាន នេះមិនមែនជាបទល្មើសជាក់ស្ដែងនោះទេ។ តាមមាត្រា៨៦ នៃក្រមនីតិវិធីព្រហ្មទណ្ឌបញ្ជាក់ថា ការចាត់ទុកជាបទល្មើសជាក់ស្ដែងលុះត្រាណាតែ មានការឃាត់ខ្លួនភ្លាមៗបន្ទាប់ពីការកើតហេតុ។ ការឃាត់ខ្លួនលោក អ៊ុំ សំអាន នេះបានធ្វើឡើងនៅឆ្នាំ ២០១៦ ខណៈដែលការបង្ហោះសារនៅលើប្រព័ន្ធ ហ្វេសប៊ុក របស់គាត់ធ្វើឡើងតាំងពីឆ្នាំ ២០១៥មកម៉្លេះ។ បែបនេះហើយករណីនេះត្រូវតែធ្វើឡើងតាម និតិវិធីដោយស្នើសុំទៅរដ្ឋសភាឲ្យមានការដក អភ័យឯកសិទ្ធិ ដែលត្រូវធ្វើឡើងតាមសម្លេងភាគច្រើន ២ភាគ ៣។ ហើយមកដល់ពេលនេះនៅមិនទាន់មានការដកអភ័យឯកសិទ្ធិលោក អ៊ុំ សំអាននៅឡើយទេ។
ហេតុផលមួយទៀតដោយសារតែ លោក អ៊ុំ សំអាន ជាតំណាងរាស្រ្ត ដែលគាត់មានសិទ្ធិក្នុងការបញ្ចេញមតិនេះបើតាមការអះអាងរបស់មេធាវីលោក អ៊ុំ សំអាន ផ្អែកលើច្បាប់រដ្ឋធម្មនុញ្ញ ដែលបានចែងនៅក្នុងមាត្រា ៨០។
គួររម្លឹកថា លោក អ៊ុំ សំអាន ត្រូវបានសមត្ថកិច្ច ចាប់ខ្លួននៅលើទឹកដីខេត្តសៀមរាប ថ្ងៃទី១០ ខែមេសា ឆ្នាំ២០១៦ ក្រោមបទចោទ ញុះញង់ឲ្យប្រព្រឹត្តបទឧក្រិដ្ឋជាអាដិ៍ និងបទញុះញង់ឲ្យមានការរើសអើងប្រព្រឹត្តនៅចំណុចរាជធានីភ្នំពេញ អំឡុងឆ្នាំ២០១៥ រហូតដល់ថ្ងៃទី ១០ ខែ មេសាឆ្នាំ ២០១៦ បន្ទាប់ពីលោកបានបង្ហោះសារផែនទីក្លែងក្លាយស្ដីពីព្រំដែន កម្ពុជា វៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ