កម្មករបន្តសន្លប់ឈានដល់ថ្ងៃទី៣ ខណៈសង្គមស៊ីវិលស្នើឲ្យមានការស៊ើបអង្កេតមូលហេតុជាក់លាក់
កម្មករ ដែលបំរើការងារនៅរោងចក្រដែរស្បែកជើង Pontus Footwear Ltd មានទីតាំងនៅខេត្តតាកែវ នៅថ្ងៃពុធនេះ បានបន្តសន្លប់បន្ថែមទៀត បន្ទាប់ពីពួកបានដួលសន្លប់ជាង៦០០នាក់ រយៈពេល ២ថ្ងៃកន្លងទៅ។ តាមកម្មករដែល បានផ្តល់ព័ត៌មានដល់មន្ត្រីអង្គការសង់ត្រាល់ មានកម្មករប្រមាណជា១៣០នាក់ទៀត ត្រូវបានរាយការណ៍ថា បានសន្លប់នៅថ្ងៃនេះ ខណៈពួកគេបានចូលទៅធ្វើការនៅក្នុងរោងចក្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
មិនមែនជាការដួលសន្លប់ទេ គឺកម្មករ ដែលមានសុខភាពចុះខ្សោយ បានត្រលប់មកចូលធ្វើការវិញ ពួកគេត្រូវបានពិនិត្យឃើញថា មានអាការៈ មិនទាន់ប្រសើរនិងរកកលសន្លប់ បន្ទាប់ពីពួកគេបានដួលសន្លប់ កាលពីថ្ងៃចន្ទ និងថ្ងៃអង្គារ។ នេះបើតាមលោក ជាវ ប៊ុនរិទ្ធ អ្នកនាំពាក្យ បេឡាជាតិរបបសន្តិសុខសង្គម (ប.ស.ស) ដែលបានដាក់ពង្រាយក្រុមការងារទប់ស្កាត់ករណីដួលសន្លប់ និងគ្រោះថ្នាក់ការងារនៅតាមរោងចក្រ។
ទោះយ៉ាងណា បើតាមគោលការណ៍ កម្មករ ដែលទទួលរងនូវការដួលសន្លប់ ដោយប្រការណាមួយអំឡុងពេលដែលពួកគេបំពេញការងារនៅក្នុងរោងចក្រ ត្រូវបានយកចិត្តទុកដាក់និងផ្តល់ការសម្រាក ពី២ទៅ៣ថ្ងៃ រហូតទាល់តែពួកគេមានស្ថានភាពសុខភាពប្រសើរឡើងវិញ។
ក៏ប៉ុន្តែ តាមការឲ្យដឹងពីកម្មករ នៅពេលដែលពួកគេកំពុងសម្រាកព្យាបាលនៅមន្ទីរពេទ្យ និងមានការព្រួយបារម្មណ៍អំពីសុវត្ថិភាពការងារ ពួកគេត្រូវបានប្រធានក្រុមទូរស័ព្ទហៅឲ្យចូលធ្វើការវិញនៅថ្ងៃស្អែក ហើយប្រឈមនឹងការបញ្ឈប់ពីការងារប្រសិនបើពួកគេមិនចូលធ្វើការតាមការកោះហៅនោះទេ។ នេះបើតាម មជ្ឈមណ្ឌលសម្ព័ន្ធភាពការងារ និងសិទ្ធមនុស្ស (សង់ត្រាល់)។
ចំណុចនេះ ត្រូវបានលោក ជាវ ប៊ុនរិទ្ធ អ្នកនាំពាក្យ ប.ស.ស លើកឡើងថា ផ្តើមចេញពីការវាយឡេវ ត្រូវរបួសដៃរបស់កម្មការិនីម្នាក់ ហើយបានដួលសន្លប់ច្រើនគ្នាដោយអារម្មណ៍រយៈពេល២ថ្ងៃកន្លងទៅ គឺតម្រូវឲ្យពួកគេមានការសម្រាកច្រើនថ្ងៃ ទាល់តែសុខភាពរបស់ពួកគាត់វិលត្រលប់ទៅរកសភាពដើមវិញ។
កាលពីថ្ងៃអង្គារម្សិលមិញ អង្គការសង់ត្រាល់បានចេញសេចក្តីថ្លែងការណ៍មួយ ដោយទទូចឲ្យសមត្ថកិច្ចពាក់ព័ន្ធធ្វើការសើបអង្កេត ជុំវិញបញ្ហាកម្មករដួលសន្លប់ដ៏សន្ធឹកនេះ។ ជាមួយគ្នានេះ អង្គការសង់ត្រាល់ ក៏បានស្នើឲ្យក្រុមហ៊ុនបញ្ជាទិញផលិតផលស្បែកជើង VF Coporation ពីរោងចក្រដែលមានថៅកែជាជនជាតិចិនតៃវ៉ាន់នេះ ដាក់អ្នកស៊ើបអង្កេតឯករាជ្យទៅលើរោងចក្រមួយនេះ ដែលមានការសង្ស័យថា អាចបណ្តាលមកពីក្លិនអាក្រក់នៅក្នុងរោងចក្រ និងកំដៅខាងក្នុងមានការកើនឡើង។
សូមបញ្ជាក់ថា កាលពីឆ្នាំ ២០១៧ កន្លងទៅពេញមួយឆ្នាំ របាយការណ៍ក្រសួងការងារបានកត់ត្រាថា មានកម្មករចំនួនជាង១៦០០នាក់បានសន្លប់ នៅកន្លែងធ្វើការរបស់ពួកគេ។ ស្ថានភាពនេះ បានបន្តស្ទើរតែជាប្រពៃណីមកដល់ខែកក្កដា ឆ្នាំ២០១៨នេះទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ